SAMIA: NAONA CHAMA KILEKILE

NA NJUMAI NGOTA

MGOMBEA mwenza wa urais wa Chama Cha Mapinduzi (CCM), Samia Sululu Hassan, amesema hatishwi na watu wanaohamia vyama vya upinzani kwa sababu anachokiona ni chama kilekile kinachogombea upande wa pili.

Amesema kile kinachogombewa upande wa pili amekibatiza jina la CCM maslahi kikichuana dhidi ya CCM halisi, jambo linaloweka uwazi wa msimamo sahihi ulikosimamia kuwa ni CCM halisi ambayo yeye anapeperusha bendera yake.

Samia alisema hayo juzi, usiku alipokuwa akihojiwa katika kipindi cha The Mboni Show kinachorushwa na Shirika la Utangazaji la Tanzania (TBC1).

Mgombea huyo alisema watu wanaohamia vyama vya upinzani wamekuwa ndani ya Chama kwa muda mrefu na wametumika nafasi mbalimbali ndani ya Chama na wengine walikuwa mawaziri na manaibu.

“Sasa kinachotokea ni hiki, mimi hakinitishi sana kwa sababu nachokiona ni CCM ile ile inayogombea kuna  wale CCM halisia wagombea upande mmoja  na CCM maslahi wamenunua chama ili wagombee upande mwingine,”alisema.

Alisema Umoja wa Katiba wa Wananchi (UKAWA), haoni kwa sababu  waanzilishi wa umoja huo  akiwemo Profesa Ibrahim Lipumba ameona misingi yake imekiukwa  na kusema anatoka kwa mujibu wa maneno yake.

Samia kwa upande wake Dk. Willbroad Slaa naye yupo kimya na hawafahamu anachofanya lakini waswahili wanasema kimya kingi kina kishindo.

Alisema hao CCM maslahi walionunua chama ni wanaCCM kwa hiyo aliwahakikisha kuwa Chama kitashinda kwa kishindo kubwa katika uchaguzi mkuu unaotarajiwa kufanyika Oktoba 25, mwaka huu.