CHILOLO AMTOSA RASMI LOWASSA

Na waandishi wetu

MWENYEKITI wa UWT Mkoa wa Singida, Diana Chilolo, amewaponda wanachama wa CCM waliohama na kukimbilia upinzani baada ya kuangukia pua kwenye kura za maoni kuwa wanafanya siasa za kitoto.

Diana, ambaye alikuwa akimuunga mkono Waziri Mkuu aliyejiuzulu kwa kashfa ya Richmond, Edward Lowassa, alisema kushinda ama kushindwa kwenye uchaguzi ni jambo la kawaida.

“Asiyekubali kushindwa huyo si mshindani, katika kitu jambo kushinda na kushindwa ni mambo ya kawaida,” alisema Diana, ambaye amekuwa mbunge wa Viti Maalumu mkoani hapa kwa vipindi vitatu kabla ya kuanguka.

Alikuwa akizungumza kwenye mkutano wa hadhara katika viwanja vya Soko la Kijiji cha Makiungu, Wilaya ya Ikungi. Mkutano huo ulikuwa maalumu kwa mgombea mwenza wa urais, Samia Sahuhu Hassan, kuomba kura.

Diana, alisisitiza kuwa wana- CCM walioangushwa kwenye uchaguzi wa kura za maoni wakakichukia Chama na kukiona hakifai na kukimbilia upinzani, muda wote walipokuwa CCM, hawakuwa wanachama wa kweli , walikuwa wana-CCM maslahi.

“Kwa upande wangu, kwenye uchaguzi wa kura za maoni hivi karibuni, kura zangu hazikutosha na kwa kitendo hicho nilifeli kutetea nafasi yangu. Tukio hilo kwangu niliona ni la kawaida kabisa, lakini nilitoka nje ya ukumbi wa mkutano na nilikutana na kundi la wajumbe wa UWT, wananililia kisa mimi nimeshindwa kutetea nafasi yangu,” alisema.

Aidha, Diana alitumia nafasi hiyo kukanusha vikali uvumi  unaooenezwa kwamba, wakati wowote atahama CCM na kukimbilia upinzani.

“CCM binafsi imenijengea umaarufu na heshima kubwa, siwezi kukikimbia asilani. Kwanza sina uroho wa madaraka, kwangu kupata kura ambazo hazikukidhi mahitaji, naliona tukio hilo limetokana na mapenzi ya Mungu,” alisisitiza.

Kwa upande wake, mbunge wa zamani wa Jimbo la Nkenge mkoani Kagera, ambaye pia ameshindwa kwenye kura za maoni, Assumpta Mshama, amewataka wakazi wa Singida Mashariki, kufanya uamuzi sahihi ifikapo Oktoba 25, mwaka huu.

Alisema lengo liwe ni kuliletea maendeleo jimbo hilo ambalo kwa miaka mitano iliyopita lilidorora katika maendeleo.

Alisema wakazi wa jimbo hilo kwa kipindi cha miaka mitano walichagua mbunge, ambaye kazi yake kubwa ilikuwa ni kususia vikao vya bunge wakati shughuli zikiendelea na kutumia muda mwingi kwa kubishana.

“Kwa miaka mitano ya Tundu Lissu bungeni, hakuweza kupata nafasi ya kuwakilisha kero zenu, kazi yake ilikuwa ni kususia vikao na kuanzisha mabishano yasiyo na tija kwa wapiga kura,” alisema huku akishangiliwa na umati uliofurika.

Aliwataka wananchi kutumia fursa hiyo kuziba ‘tundu' kwa kumchagua Jonathan Andrew Njau wa CCM, ambaye tayari ameanza kuwatumikia vema kupitia nafasi yake ya UNEC.

WAFUASI UKAWA WAZUSHA VURUGU

WATU wanaodaiwa kuwa ni wafuasi wa UKAWA,  juzi waliwashambulia  kwa magongo, ngumi na visu baadhi ya wafuasi wa CCM, waliokuwa  wakifanya mkutano wa hadhara Kata ya Jangwani, Dar es Salaam.

Uhuru, ambalo lilishuhudia varangati hilo, lilishuhudia vijana hao, wakitumia nguvu kutaka kupita katikati ya mkutano na kukaidi  amri ya vijana wa CCM waliokuwa wakiwazua  kwa madai kuwa eneo hilo lilikuwa limefungwa kwa muda kutokana na mkutano uliokuwa ukiendelea.

Mkutano huo  ulihudhuriwa na viongozi mbalimbali wa CCM, akiwemo mbunge wa jimbo hilo, Mussa Azan ‘Zungu’,  wagombea wote wa udiwani jimbo la ilala na vuiongozi wa Chama Wilaya ya Ilala.

Katika hali ya kushangaza, vijana hao walianza kutoa maneno ya kejeli  dhidi ya CCM na kwamba hawatambui Chama hicho bali  UKAWA, hivyo hawawezi kuzuiliwa kufanya lolote mahali hapo.

Huku wakionekana dhahiri kutaka kuvuruga mkutano huo, vijana hao walianza kupambana na walinzi  ili waweze kujipenyeza kwenda sehemu ya katikati ya mkutano, ambako mbele yake kulikuwa na meza ya viongozi.

Kufuatia hatua hiyo, vijana wa CCM walisimama imara kuwazuia na ndipo vijana hao walipoanza kuwashambulia vijana wa CCM kwa ngumi, mateke na  vipande vya mbao kabla ya kuchukua visu na mapanga.

Vurugu hizo zilisababisha mkutano huo kusimama kwa muda, ambapo wafuasi wa CCM walianza kujitetea huku wengine wakiwanusuru vijana hao  ambao walianza kuzidiwa kwa kipigo.

Polisi walifika muda mfupi na kutuliza ghasia, hivyo mkutano kuendelea kama kawaida huku wafuasi wa CCM wakilaani  vibaya tukio hilo.

“Hawa  vijana wa UKAWA wana matatizo sana. Muda wote wao wanataka kujiona  ndiyo wanaoongoza nchi kwa sasa na huyo  Lowassa (Edward) wao. Wanatudharau  sana watu wa CCM.

“Wanataka hapa mjini kila kitu wafanye wao. Wao ndiyo wana haki ya kuzungumzia uchaguzi na kufanya mikutano. Ukizungumza mtu wa CCM basi  hawachelewi kurusha ngumi,”alisema Othma Faki, mkazi wa kata hiyo.

Mkazi mwingine wa kata hiyo mwenye asili ya kiasia,  alilaani vurugu hizo  na kueleza kwamba  huenda vijana hao walijipanga kuvuruga mkutano  huo wa kata.

“Hawa vijana  wa  UKAWA  hawaelewi lolote la maana na hawajui kanuni za uchaguzi  wala kampeni, ndiyo maana wamekuwa wakitutukana wanachama wa CCM mitaani, lakini wao wanajiona wasafi.  Huu ujasiri wa kushambulia mkutano wameutoa wapi?” Alihoji mtu huyo.

Wananchi hao walioomba serikali kuwachunguza  vijana ambao wanajifanya wana msimamo mkali kiasi cha kutishia usalama katika mikutano ya  kampeni inayoendelea nchini hivi sasa.