TUKATAE KUFUATA MKUMBO KWENYE MASUALA YANAYOHUSU MASLAHI YA TAIFA LETU

NA WILLIAM SHECHAMBO

WAINGEREZA wakisema ‘days are numberd’,  sisi kwa lugha yetu tamu ya Kiswahili tunaweza kusema siku zinahesabika kwa Watanzania kwenda kwenye shughuli muhimu ya kupigakura za kumchagua Rais wa Tanzania, wabunge majimboni na madiwani wa kata husika.

Ni jukumu zito linalohitaji akili tulivu, busara na uzalendo mkubwa utakaomwezesha mpigakura kufikiria tulikotoka, tulipo na tunakoelekea kwenye suala zima la maendeleo ya taifa katika sekta zote. Tukio hili linatungoja sote Oktoba 25, mwaka huu (zimesalia siku 46 tu).

Licha ya kwamba umeshakuwa wimbo, bado ninawiwa kuitumia nafasi hii kusisitiza Watanzania wenzangu kuachana na mikumbo ya kisiasa isiyo na tija kwa maendeleo ya taifa hili lenye maendeleo makubwa yanayotusubiri miaka michache ijayo.

Turudi nyuma kipindi tukiwa darasani, jambo linalofanya nimkumbuke mwalimu wangu aliyenifundisha msamiati unaoitwa kwa lugha ya kigeni crowd/mob psychology; Alisema maana nzuri ya msamiati huo inaelezewa na wataalamu wa saikolojia ya jamii.

Aliwataja wanasaikolojia kadhaa, lakini ninaikumbuka tafsiri ya Gustave Le Bon, Mfaransa aliyefanya tafiti mbalimbali za masuala ya saikolojia ya watu, ambaye alisema ni tabia ya mtu kufuata anachoona wengi wanakifuata mahali alipo.

Alieleza kuwa kitendo cha mtu kufuata mkumbo ni kutokana na kupungua kwa uwezo binafsi wa kujiongoza na kufuata anachokiamini, hivyo ni sawa na ugonjwa wa kuambukiza na kutokana na tafiti zake Gustave Le Bon, alisema mwisho wa wale wanaofuata mkumbo ni mbaya kwa sababu hawakujua kile walichokuwa wakikifanya.

Unaweza kujiuliza kwanini nimekulazimisha kurudi darasani kujifunza kuhusu masuala ya mikumbo kama ilivyoelezwa na wataalamu wa saikolojia ya watu; maana yangu ni kukuleta karibu unielewe zaidi juu ya kilichonisukuma kuandika hoja hii leo.

Siasa za Tanzania zimeingiwa na hili jambo baya kabisa kwa mustakabali wa taifa letu. Mikumbo kwenye maeneo mbalimbali huwatesa watu wasio na hatia na kusababisha vilio vya kusaga meno mara matokeo ya mkumbo huo yanapokuja. Mfano halisi ni migomo shuleni na kazini.

Kwa namna moja au nyingine ni wazi utakuwa umekutana na moja ya machungu ya kufuata mkumbo na kama jibu ni ndio, basi unapaswa kurudi nyuma na kujiuliza nafasi yako ni ipi na namna gani utatumia nafasi hiyo kuzungumza na Watanzania hasa vijana juu ya athari za mkumbo.

Baada ya kuzungumza na watu mbalimbali, matokeo niliyoyapata ni kwamba baadhi ya Watanzania wamekosa uzalendo kwa kujihusisha na siasa chafu zinazoendelea kufanywa na vyama vya upinzani nchini hasa vile vilivyoko chini ya genge linalojiita UKAWA.

Siasa zao zimejaa hila, ulaghai na kila aina ya uchafu? Inasikitisha kwasababu vijana wamekuwa ngazi ya wanasiasa hao kutaka kupata madaraka serikalini huku wakiwa hawana chembe ya malengo yanayoweza kusemwa kuwa ni madhubuti kwa maendeleo ya taifa hili.

Hivi hatujiulizi kwanini wanatufanyia maigizo majukwaani? Watu wanafuata mkumbo kwa kuzungumza kwa ghadhabu kutetea viongozi hao kuwa wako sahihi kwa wanalolifanya huku wakijua kabisa kuwa hawako sahihi.

Siasa za Tanzania yetu watu wanazifanya maigizo, na bado watu tunawaunga mkono. Kweli hii ni sahihi? Tunaitendea haki nchi hii iliyowekewa misingi imara na waasisi wetu? Hapana, umefika wakati turudi kwenye akili zetu. Tusiwe kama vile tumerogwa.

Tanzania ni nchi ambayo kimataifa inafahamika kama kisiwa cha amani. Tunapaswa kuendeleza hadhi hii kwa kuendelea kuipa ridhaa CCM ambayo ndicho chama chenye ilani imara yenye dhamira ya dhati kwa maendeleo ya taifa hili.

Watanzania leo hii wamekuwa kama watazamaji kwenye ukumbi wa maigizo. Watu mbalimbali wanatumiwa na wanasiasa uchwara mpaka viongozi wa dini kuwasafishia njia ya tamaa ya madaraka wanasiasa hao.  

Zipo dalili nyingi mno ambazo Watanzania tunatakiwa kuzizingatia na kutozipuuza ili kuiokoa nchi hii kwenda kwenye mikono ya wasiostahili; lakini kama nilivyosema kwenye kiini cha hoja hii, watu wanafahamu na wanaziona, lakini wanafuata mkumbo.

Vitabu vya dini vimeeleza kuwa mwanamke mpumbavu huibomoa nyumba yake kwa mikono yake mwenyewe. Watanzania tunatakiwa kufikiria kwa kina kwenye kufanya maamuzi katika uchaguzi wa mwaka huu. Tusije tukawa wapumbavu baadae kwa kuiharibu nchi yetu kutokana na mkumbo usiokuwa na maana.

Yapo mataifa yameshaanza kutoa udenda kwa matamanio ya kutuvuruga Watanzania, kisha waje na kuchukua waliyokuwa wakiyatamani kwa miaka mingi tangu awamu ya kwanza ya taifa hili, baada ya uhuru kutokana na utajiri wa rasilimali tuliojaliwa na Mwenyezi Mungu.

Hili halipingiki. Kila kiongozi wa kisiasa unayemwona anatumia kila njia kufika anapopataka, fahamu kuwa yuko mtu anamshika mkono kwa makubaliano maalumu ambayo mwisho wa siku wote watahitaji kunufaika.

Binafsi katu sikubali kuwa miongoni mwa watakaolia kwa kusaga meno baada ya wasiostahili kufanikiwa kuwalaghai wafuata mkumbo kwa tamaa ya wachache. Sikubali na sitakuja kukubali hata miaka 30 ijayo kwasababu tulipo sasa ni mikono salama.

Nakamilisha hoja yangu kwa kushauri kuwa, haya maigizo ni vyema tuyatizame kwa kujifurahisha na kama darasa la kuwasoma zaidi wanasiasa hao uchwara ambao wanaiona nchi hii kama ukoo au kabila fulani na wao wanahitaji kuwa machifu kisha tuwapuuze Oktoba 25. Lakini tukumbuke ‘days are numbered’

MUNGU Ibariki Tanzania, MUNGU bariki uchaguzi mkuu 2015.