UKAWA WAGONGA MWAMBA LUDEWA, WANANCHI WASUSIA MKUTANO WA LOWASSA

Na Mwandishi Wetu
MGOMBEA urais wa CHADEMA, Edward Lowassa, amegonga mwamba baada ya jana kushindwa kufika na kuhutubia mkutano wa kampeni wilayani Ludewa.
Lowassa, aliyejiuzulu wadhifa wa Waziri Mkuu kutokana na kashfa ya Richmond, alishindwa kuendelea na mkutano huo kutokana na kutokuwepo dalili ya watu kuhudhuria.
Habari za kuaminika zilisema kuwa mkutano huo ulikuwa ufanyike saa 5:00 asubuhi, lakini hadi saa 6:30 mchana hakukuwa na dalili zozote za mgombea huyo kuwasili wilayani humo.
Mgombea urais wa CCM, Dk. John Magufuli, alifika wilayani humo akiendelea na utaratibu wake wa kutumia usafiri wa barabara na kufanya mkutano mkubwa mjini Ludewa, juzi kisha kuendelea na ziara yake.
Habari za kuaminika zilisema kundi la UKAWA lilifanya maandalizi makubwa ikiwemo kusafirisha watu kutoka maeneo ya ndani na nje ya Wilaya ya Ludewa ili kuhudhuria mkutano huo. Hata hivyo, wananchi wenyeji walisusa.

Hatua hiyo inatokana na wakazi wa Ludewa  wamechukizwa na ajenda ya Lowassa ya kutaka kuwaachia huru wahalifu, wakiwemo waliohukumiwa kwa ubakaji, mwanamuziki Nguza Viking ‘Babu Seya’ na  mwanaye Papii Kocha.

Kutokana na kukosekana kwa mkutano huo baadhi ya wapambe waliosafiri jana kwa malori kwenda Ludewa walilazimika kuanza safari ya kurudi kwa miguu kwenda Njombe na vijijini.
Wakizungumza kwa jazba wafuasi hao John Haule kutoka Njombe na Kefa Mbilinyi, walisema waliahidiwa kulipwa fedha kwa kazi ya kuweka ulinzi kwenye mkutano huo, lakini wameambulia patupu licha ya kuanza kuifanya kazi hiyo.
Alisema kukwama kwa mkutano huo kumewafanya baadhi ya wafuasi kukosa hata nauli ya kurejea kwenye maeneo waliyotoka kwani, wengine walikodiwa magari.

Hata hivyo, wakazi wa Ludewa walisema walishindwa kuhudhuria mkutano huo kutokana na ajenda za Lowassa na kumtaka kwenda kuomba kura kwenye mitandao ya kijamii kwa kuwa ndiko alikoweka taarifa yake ya ilani.

Wakazi hao hasa wanawake walisema kamwe hawatahudhuria mkutano wa Lowassa, ambaye agenda yake kubwa ni kuwaachia huru wabakaji, hivyo ni sawa na kuwadhalilisha.

Mmoja wa wakazi hao, Suzan Haule, alisema mkutano huo ulipangwa kuanza saa Saa 5.00 asubuhi katika uwanja wa mpira wa wilaya ambapo, hadi muda huo kulikuwa na watu watano tu.

“Tumetosheka na tumemuelewa Dk. Magufuli,  hivyo hatuna haja ya kuhudhuria mikutano ya wagombea wasiokuwa na tija kwani, haiwezekani mgombea ajenda yake kubwa ni kutetea wahalifu na wabakaji… hii nchi itakuwa ya aina gani,” alihoji Suzan.

Alidai kuwa viongozi wa UKAWA walijitetea kwa wananchi kuwa Lowassa alishindwa kufika kutokana na kukosa kibali cha kutua helkopta na kuhoji kama watu wote wanaokwenda Ludewa wanakwenda kwa helikopta.
Waliongeza kuwa utetezi huo hauna mashiko kwa kuwa Dk. Magufuli alikwenda kuzungumza na kuomba kura kwa wananchi kwa kutumia usafiri wa barabara unaotumiwa na walalahoi iweje yeye Lowassa ashindwe.
“Hizi ni dharau, Magufuli amekuja hapa kwa kutumia usafiri wa barabara na kuzungumza na wananchi…yeye anashindwaje na kusingizia hawana kibali cha kurusha helikopta. Kama anatafuta madaraka anashindwa kuja kisa hakuna ndege akipata uongozi si atakuja  hapa kwa kubebwa mgongoni?
“Huko Dar alipanda daladala, huku kwetu anataka helikopta…sasa hatumtaki na wala hatuna mpango naye,” aliongeza.
Taarifa zilizopatikana ndani ya UKAWA zinadai kuwa kutofika Ludewa kwa Lowassa kunatokana na kushindwa kusafiri kwa gari kutoka Njombe hadi Ludewa umbali wa kilomita 70 kwa barabara.

DUNI AZOMEWA MASASI

Wakati Lowassa akikwama Ludewa, mgombea mwenza wake, Juma Duni Haji, ameshindwa kuhutubia mkutano wa hadhara kutokana na wananchi kuzomea viongozi wa jukwaa kuu.

Hatua hiyo ilitokana na Duni kushindwa kuupatia ufumbuzi mgogoro kuhusiana na kumsimamisha mgombea ubunge, ambapo CUF imesimamisha mgombea kama ilivyo kwa NLD.

Hali hiyo imejotokeza jana katika mkutano wa hadhara uliofanyika wilayani Masasi, ambapo hata hivyo ulivunjika kutokana na zomea zomea hiyo isiyokuwa na kikomo.

Kumekuwepo na mvutano mkubwa katika jimbo la Masasi Mjini, ambapo kila chama kimesimamisha mgombea wake huku viongozi wa UKAWA wakitangaza nafasi hiyo kuachiwa Mwenyekiti wa NLD Taifa, Dk. Emmanuel Makaidi.

Mvutano huo ulimfanya Duni kusitisha kuzungumza na kumuomba Habib Mnyaa kusaidia kuwatuliza wananchi waliokuwa na jazba, ambapo hata hivyo hakufanikiwa huku wananchi wakiimba nyimbo za kumkataa Dk. Makaidi.

Wananchi hao walieleza bayana kuwa hawana imani na UKAWA na kwamba, wanamsubiri Dk. Magufuli ili warudishe kadi za vyama vya upinzani na kurejea rasmi CCM.

Katika hatua nyingine, Duni pia alishindwa kuhutubia wananchi wa Wilaya ya Nanyumbu baada ya kutokea kwa mzozo katika ya CHADEMA na CUF juu ya mgawanyo wa majimbo.