MWIGULU: ACHENI KUTUMIA VIBAYA WOSIA WA NYERERE

Na Mwandishi Wetu, Bumbuli

MJUMBE wa Kamati ya Kampeni ya Chama Cha Mapinduzi (CCM), Mwigulu Nchemba, amewananga watu ambao wanatumia vibaya maneno ya Baba wa Taifa Mwalimu Julius Nyerere, kuhusu mabadiliko.

Amesisitiza kwamba mabadiliko ya kweli si lazima yawe ya vyama bali ni ya kiutendaji ambayo CCM imedhamiria kuyafanya.

Akihutubia katika mikutano mbalimbali ya kampeni ya kumnandi mgombea ubunge wa Jimbo la Bumbuli kupitia CCM, January Makamba, Nchemba alisema wanaonukuu maneno hayo ya Mwalimu Nyerere wananukuu sehemu ya dhana ya mabadiliko aliyoyasema.

Wagombea wa vyama vinavyounda Umoja wa Katiba ya Wananchi (UKAWA), wamekuwa mara kwa mara wakinukuu maneno hayo, ambayo alisema kama Watanzania watayakosa mabadiliko ndani ya CCM, watayatafuta nje ya chama hicho.

Kwa mujibu wa Nchemba, wanaonukuu maneno hayo hawataji mambo makuu manne aliyotaja Mwalimu, ambayo Watanzania wanatarajia.

Alitayaja mambo hayo kuwa ni Watanzania kuchukia rushwa na kutaka anayewatambua Watanzania kwa Utanzania wao na wala sio kwa dini, madhehebu au makabila yao.

Alisema CCM imemchagua mgombea urais Dk. John Magufuli kupeperusha bendera kwa ajili ya malengo ya kuleta mabadiliko ndani ya CCM na serikali, kutokana na rekodi yake katika miaka 20 ya utendaji  kazi.

“Mabadiliko wanayoyatafuta Watanzania ni mabadiliko ya utendaji na wala si mabadiliko ya vyama,” alisema na kuongeza kuwa wanaonadi na kutumia maneno ya Mwalimu ni wale ambao walishindwa kusimamia utendaji ndani ya serikali.

Akimtaja Waziri Mkuu wa zamani, Frederick Sumaye, Nchemba alisema  kwa miaka 10 alikuwa msimamizi mkuu wa utendaji wa serikali, lakini hivi sasa  anakinyooshea kidole Chama na serikali yake ambayo yeye aliwahi kuwa mtendaji wake mkuu.

Nchemba alihoji kuwa ni jambo la ajabu watu ambao wametumia nguvu kubwa kwa miaka kadhaa kutaka kuteuliwa kuwa wagombea wa CCM na kudai ndio chama bora, wawe ndio wanaokilaani hivi sasa.

Aliwataka Watanzania kuchagua watu watakaowatumikia kwa malengo na sio watu ambao wameonyesha wazi wamekwenda kugombea waliko kwa kutumia dili.

“Magufuli ndiye mgombea pekee ambaye ana rekodi ya utendaji mzuri na ya kuchukia rushwa na kwamba ni mgombea pekee wa urais ambaye ameonyesha nia ya dhati ya kupambana nayo,” alieleza.

Akimzungumzia mgombea ubunge wa jimbo la Bumbuli kupitia CCM, January, aliwataka wakazi wa Bumbuli kumthamini na kumtunza kwa kuwa ni hazina ya taifa.

Alisema January anathaminika Tanzania nzima na wananchi hao watafanya makosa kama wakimwacha na kumchagua mtu ambaye hana hata anuani.

Kwa upande wake, January alifafanua kuhusu sh. milioni 50 zilizoahidiwa na serikali kwa ajili ya vijiji na kusema kuwa ahadi hiyo ni ya kweli kwa sababu imefanyiwa kazi kitaalamu.

Aliwahakikishia wakazi wa Bumbuli kuwa watasimamia wenyewe fedha hizo kupitia kamati za vijiji zitakazoundwa na vijiji vyenyewe ili kuepuka fedha hizo kuangukia kwa watendaji ambao watazila.