DOVUTWA AWAONYA VIONGOZI WANAOTAKA KULETA MAAFA

NA MWANDISHI WETU

CHAMA cha UPDP kimezindua kampeni zake za urais huku kikionya wananchi kuepuka viongozi wanaoweza kulipeleka taifa kwenye maafa makubwa.

Akizungumza kwenye uzinduzi wa kampeni hizo juzi katika viwanja vya Garden, Kilwa Kivinje, wilaya ya Kilwa mkoani Lindi, mgombea urais wa chama hicho, Fahmi Dovutwa, alisema kuna viongozi wanajaza mafuta kwenye pikipiki na magari ili kushawishi watu waende kwenye mikutano yao.

Alisema kilichomsukuma kugombea urais ni kutaka kuwakomboa watu dhidi ya dhuluma mbalimbali wanazowafanyia wananchi ikiwemo uporaji wa ardhi.

Dovutwa, ambaye alianza kwa mtindo wa kuruhusu maswali, alisema bado anainadi Ilani ya Uchaguzi ya chama hicho iliyotengenezwa tangu 2005.

Akijibu maswali ya wananchi ambao walimuuliza kuhusu kuchelewa kuzindua kampeni huku zikiwa zimebaki siku chache za kupigakura, alisema kila mmoja ana namna ya kuwafikia wananchi na si lazima kuzunguka majimboni.

"Wananchi hawapo katika majimbo, wapo kwenye vituo vya kupigiakura na si wagombea wote wataweza kufika katika kila kituo cha kupigia kura.

"Kuna  namna nyingi za kuwafikia wananchi, ikiwemo kupitia vyombo vya habari na keshokutwa naenda kushiriki mdahalo wa wagombea urais na hapo wananchi watanielewa zaidi,"aliongeza.

Akizungumzia sera, alisema watashughulikia maeneo muhimu ya ardhi, elimu na maslahi ya wafanyakazi, ambao wamekuwa wakibaguliwa kwenye malipo kinyume na katiba.

Alisema sera ya chama hicho ni ardhi ambayo ndio msingi wa maendeleo na kwamba watapambana kutetea ardhi zilizoporwa kutoka kwa wananchi.

Dovutwa alisema uongozi ni wito hivyo hawezi kusubiri hadi apate mamlaka, bali anaanza kusimamia na kulitekeleza hilo kabla hajaingia madarakani.

Alisema ametoa fomu kwa kila ofisi za UPDP nchi nzima na kila mwenye malalamiko ya ardhi, aende akajaze na atashughulikia malalamiko yote bila gharama zozote.

Alisema endapo atapewa ridhaa, atashughulikia kwa ufanisi zaidi na kurudisha haraka ardhi zilizoporwa kwa wananchi.

Pia, atainua kilimo kwa sababu ndio kiwanda mama na kuhakikisha wakulima wanainuka kiuchumi, ikiwemo kuruhusu vyama vya ushirika huru ili kila mtu akauze mazao yake anapoona panamfaa.

Aliongeza kuwa tatizo la mkulima si kulima kwa trekta bali ni uhakika wa soko la mazao.

Akizungumzia kuhusu elimu, alisema endapo ataingia madarakani ataweka mfumo wa elimu ya pamoja kwa kuunganisha msingi na sekondari.

"Nitaweka hadi darasa la 10 baada ya hapo mtoto anaenda chuo kikuu, lakini pia nitahakikisha mitaala inabadilishwa hasa kwenye msingi, maana wanachofanya mitaala ya sasa ni uozo, hasa kwenye masomo yanayohusu afya ya uzazi,"aliongeza.

Alisema wanafunzi wa darasa la tatu wanafundishwa mambo yanayochochea vitendo viovu hali inayotishia usalama wa taifa.

Aliahidi neema kwa wenyeviti wa serikali za mitaa, ambao alidai wana haki sawa kama wafanyakazi wengine wa serikali na wamo kikatiba kwa kuwa inatambua serikali kuu na serikali za mitaa.

Katika mkutano huo, Dovutwa alimnadi mgombea ubunge wa Kilwa Kusini, Fatuma Machalala na mgombea udiwani wa kata ya Kivinje Singino, Ismail Namiwa.

Kwa nyakati tofauti wagombea hao walisema wanakubalika kwa sababu hawafanyi siasa za matusi jukwaani bali kuhamasisha maendeleo tofauti na wagombea wa vyama vingine.

Fatuma alisema UKAWA wamekuwa wakitapatapa na kuwatuhumu wao kwamba wanatumika na Chama Cha Mapinduzi (CCM).

"Eti kwa  sababu hatutukani jukwaani, basi ndio tunatumiwa, wengine wanasema tunatumiwa kugawa kura, sisi hatuna habari, tunaendeleza sera za kutetea wananchi, hatuna ubabe," aliongeza