MTOTO WA KOMBANI ASHINDA KURA ZA MAONI CCM ULANGA

NA LATIFA GANZEL, MOROGORO

HATIMAYE mtoto wa marehemu Celina Kombani, Goodluck Milinga, ameibuka na ushindi katika kura za maoni za kuwania nafasi ya ubunge katika jimbo la Ulanga Mashariki kwa tiketi ya Chama Cha Mapinduzi (CCM).

Milinga, ambaye ni mtoto wa kwanza wa Celina (aliyekuwa Waziri wa Nchi, Ofisi ya Rais Menejimenti ya Utumishi wa Umma), aliibuka na ushindi huo jana, katika uchaguzi wa kura za maoni wa CCM uliofanyika katika jimbo hilo. Nafasi hiyo ilikuwa ikiwaniwa na watu wanane.

Akitangaza matokea hayo, Msimamizi wa Uchaguzi huo, Hamza Mfaume alisema Milinga aliibuka kidedea kwa kupata kura 731, akifutiwa na Azizi Jawadi aliyepata kura 134.

Wengine na kura zao katika mabano ni Thabit Dokodoko (52), Agustino Matefu (41), Wencheslous Ikumla (39), Pontian Kipao (11), Herrieth Mwakifulefule (tisa) na Daud Kitolelo (nane).

Mfaume alisema katika uchaguzi huo, kura zilizopigwa zilikuwa 1,029, ambapo nne ziliharibika, hivyo halali zilikuwa 1,025.

Kwa upande wake, Milinga aliwashukuru wananchi wa jimbo hilo kwa kumpa kura nyingi na kuwaahidi atatekeleza yote ambayo aliahidi na hata yale aliyoahidi marehemu mama yake enzi za uhai wake.

Alisema akipata ridhaa ya kuongoza jimbo hilo, atahakikisha anaboresha huduma za afya, barabara, mawasiliano ya simu, elimu na makazi hususan nyumba za walimu.

“Wananchi wa Ulanga wamenipa ridhaa hii kwa sababu muda wa kampeni zote za kura za maoni wakati mama akigombea, waliniona nafanya mimi,  nawajua watu kwa sura na majina na wao wananijua hata utendaji wangu wa kazi,” alisema

Alisema atahakikisha analitendea haki jimbo hilo kwa kufanyakazi kwa kasi kubwa zaidi kwa kuzingatia yeye ni kijana na anamudu kasi hiyo.

Celina alifariki dunia Septemba 24, mwaka huu, nchini India, alikokuwa akipatiwa matibabu ya ugonjwa wa saratani ya kongosho. Alikuwa mgombea ubunge katika Jimbo la Ulanga Mashariki.

Aliongoza jimbo la Ulanga kwa vipindi viwili mfululizo tangu mwaka 2005 hadi 2015. Pia aliwahi kuwa Mwenyekiti wa Umoja wa Wanawake Tanzania (UWT) wilaya ya Morogoro mjini.