LETICIA NYERERE AFARIKI

ALIYEKUWA Mbunge wa Viti Maalumu (CHADEMA), Leticia Nyerere amefariki dunia.

Leticia, alifariki juzi, katika Hospitali ya Doctors Community, iliyoko Lanham, Maryland nchini Marekani, saa mbili usiku kwa saa za Afrika Mashariki.

Mwanasiasa huyo, ambaye Julai 27, mwaka jana, alitangaza rasmi kuihama CHADEMA na kujiunga na Chama cha Mapinduzi (CCM), alilazwa kwenye hospitali hiyo akisumbuliwa na ugonjwa wa kansa ya damu.

Pia, alikuwa miongoni mwa wajumbe wa Bunge Maalumu la Katiba, ambaye alikuwa mstari wa mbele kupigania haki ya uraia wa nchini mbili kwa Watanzania waishio nje ya nchini (Diaspora).

Leticia, ambaye ni mtoto wa Mzee Musobi Mageni, aliolewa kisha kutengana na mtoto wa Hayati Baba wa Taifa, Madaraka Nyerere, mwaka 1996, ambapo walifanikiwa kupata watoto watatu.

Kufuatia kifo hicho, Rais Dk. John Magufuli, jana, alifika nyumbani kwa mjane wa Baba wa Taifa, Mwalimu Julius Nyerere, Mama Maria Nyerere kumpa pole.

Pamoja na kutoa mkono wa pole kwa Mama Maria Nyerere, nyumbani kwake Msasani, Jijini Dar es Salaam, Rais Magufuli pia amewapa pole wanafamilia wote na amewaomba kuwa wavumilivu katika kipindi hiki kigumu cha kuondokewa na ndugu yao.

Msemaji wa familia ya Mwalimu Nyerere, Joseph Butiku, alimueleza Rais Magufuli kuwa, familia inaendelea na taratibu za kuusafirisha mwili wa marehemu kutoka nchini Marekani na itatoa taarifa baadaye.

Tangu Desemba 27, mwaka jana, Leticia alikuwa amelazwa kwenye chumba cha wagonjwa mahututi hospitalini hapo na kuelezwa kuwa hali yake ilikuwa sio nzuri.