MAMBO SHWARI ZANZIBAR-DK SHEIN

 

RAIS wa Zanzibar, Dk. Ali Mohammed Shein, amewaomba wananchi kuendelea kuwa wavumilivu na wastahamilivu na waendelee na shughuli zao za maisha za kila siku kwa amani, katika kipindi hiki ambacho wanasubiri kutangazwa kwa tarehe nyingine ya marudio ya uchaguzi.

Amesema uchaguzi wa Zanzibar, ulifutwa Oktoba 28, mwaka jana, baada ya kubainika kutokea kasoro kadhaa kama zilizoelezwa na Tume ya Uchaguzi ya Zanzibar (ZEC) na kwamba, uamuzi huo wa tume ulitangazwa katika gazeti rasmi la serikali la Novemba 6, mwaka jana.

"Tume ya Uchaguzi ya Zanzibar ndio yenye jukumu la kusimamia na kuendesha uchaguzi wa rais, wajumbe wa Baraza la Wawakilishi na   madiwani, hivyo nawaomba wananchi waendelee   kuishi kwa amani na kupendana huku tukisubiri Tume ya Uchaguzi Zanzibar itangaze tarehe nyingine ya kurudia uchaguzi," alisema.

Dk. Shein alisema baada ya uchaguzi huo kufutwa, viongozi walishauriana wakutane ili wafanye mazungumzo ya kutafuta suluhu kwa njia ya amani ili nchi iendelee kuwa ya umoja na mshikamano.

Akizungumza katika Maadhimisho ya Miaka 52 ya Mapinduzi Matukufu ya Zanzibar, yaliyofanyika jana, katika Uwanja wa Amaan, mjini hapa, Dk. Shein alisema mazungumzo hayo yanahusisha viongozi sita waliopo madarakani, wastaafu na kwamba yeye ndiye mwenyekiti.

Dk. Shein alisema mazungumzo hayo bado yanaendelea na taarifa ya pamoja ya mazungumzo hayo itatolewa na wajumbe mara yatakapokamilika.

“Katika kipindi hiki ni vyema wananchi wakaendelea kuwa wavumilivu, wastahamilivu na waendelee na shughuli zao za maisha ya kila siku kwa amani,” alisema.

Alisema kudumishwa kwa Mapinduzi ya Zanzibar, ni lazima kuendelezwe na kudumishwa Muungano wa Tanzania, kwani ni kielelezo muhimu cha umoja wa wananchi.

Alisema serikali ya awamu ya saba, anayoiongoza itaendelea kuwa muumini wa dhati wa Muungano na kuyatekeleza kwa vitendo malengo ya waasisi wa taifa, Mwalimu Julius Nyerere na Sheikh Abeid Karume.

MAFANIKIO

Dk. Shein alisema serikali imeongeza ufanisi katika ukusanyaji wa mapato na kudhibiti uvujaji wa mapato hayo, ambapo katika kipindi cha miezi sita ya kwanza ya mwaka wa fedha 2015/2016, mapato yalifikia sh. bilioni 188.4.

Alisema serikali inaendelea na juhudi za kukusanya mapato, ikiwa ni pamoja na kupunguza misamaha ya kodi katika baadhi ya miradi ya uwekezaji na kufanya viwango vya ada mbalimbali.

Dk. Shein alisema juhudi za kufufua viwanda zilipata mafanikio mwaka jana, ikilinganishwa na miaka iliyopita, ambapo bidhaa zilizozalishwa viwandani, zikiwemo maziwa, sukari, maji ya kunywa, unga wa ngano, juisi, sabuni, bidhaa za nguo na viungo zilikuwa na thamani ya sh. bilioni 136.0.

Alisema sekta ya utalii, ambayo ndio kiongozi kwa uchumi wa Zanzibar, inaendelea kuboreshwa ili kuleta tija zaidi.

Dk. Shein alisema sekta ya kilimo imeimarishwa kwa lengo la kuhakikisha kuwa uhakika wa chakula na lishe unakuwepo muda wote.

Kuhusu uendelezaji wa maliasili, alisema serikali itaendelea kusimamia ulinzi na udhibiti wa misitu, ukiwemo msitu wa Jonzani Unguja, msitu wa Ngezi Pemba na misitu mingine ya asili.

Akizungumzia miradi ya maji, Dk. Shein alisema jitihada kubwa zilifanywa katika kuimarisha upatikanaji wa maji safi na salama kupitia miradi mbalimbali ya maji mijini na vijijini, ambapo upatikanaji wa maji mijini umefikia asilimia 87 na asilimia 70 vijijini.

Alisema serikali imeongeza bajeti ya dawa kutoka sh. bilioni moja kwa mwaka 2013/2014, hadi kufikia sh. bilioni, 4.3 mwaka 2015/2016.

Dk. Shein alisema Zanzibar, imepiga hatua kubwa katika kupunguza vifoo vya wajawazito na watoto, kutokana na wanawake kujifungulia hospitalini na huduma za uzazi kusambazwa vijijini.

Akizungumzia ugonjwa wa kipindupindu, alisema umedhibitiwa na kwamba hivi sasa umepungua kwa kiasi kikubwa.

Kuhusu tatizo la ajira, alisema serikali kupitia mfuko wa uwezeshaji wananchi kiuchumi, imeongeza fedha za dhamana katika Benki ya CRDB kutoka sh. milioni 100, hadi kufikia sh. milioni 150, katika mwaka 2015.

Dk. Shein alisema serikali inaendelea na matayarisho ya uanzishwaji wa mpango wa pensheni jamii kwa wazee walio na umri wa miaka 70 na kuendelea.

Kuhusu watu wenye ulemavu, alisema tayari serikali imechukua hatua ya kuhakikisha wanapatiwa haki zao na kuwekewa mazingira mazuri yanayozingatia mahitaji yao pamoja na kushirikishwa katika masuala mbalimbali ya kijamii.

BALOZI IDI

Makamu wa Pili wa Rais wa Zanzibar, Balozi Seif Ali Iddi, alisema Sherehe za Mapinduzi  zilizinduliwa Januari 3, mwaka huu, na kufikia kilele chake jana.

Alisema jumla ya miradi 16 ya maendeleo ilizinduliwa na miradi minane iliwekwa mawe ya msingi.

HALI ILIVYOKUWA

Milango ya Uwanja wa Amaan ilifunguliwa kuanzia saa 12:00, asubuhi, ambapo wananchi walijitokeza kwa wingi kushuhudia sherehe hizo.

Aidha, viongozi mbalimbali walianza kuwasili kuanzia saa 1:30, asubuhi na kupokelewa kwa shangwe na nderemo kutoka kwa wananchi.

Miongoni mwa viongozi waliohudhuria ni Rais Dk. John Magufuli, ambaye anaandika historia ya kushiriki sherehe kubwa tangu kuapishwa kwake.

Pia, Dk. Magufuli ameandika historia nyingine kwa kusafiri kwa mara ya pili tangu kuapishwa, ambapo mara ya kwanza alisafiri kutoka Dar es Salaam kwenda Dodoma.

Viongozi wengine waliohudhuria ni marais wastaafu Ali Hassani Mwinyi, ambaye aliambatana na wake zake, Benjamini Mkapa, akiwa na mke wake, Jakaya Kikwete akiwa na mkewe. Pia Makamu wa Rais mstaafu, Dk. Mohammed Gharib Bilal na Rais mstaafu wa Zanzibar, Amani Abeid Karume.

Wengine ni Makamu wa Rais, Samia Suluhu Hassan, Waziri Mkuu, Kasimu Majaliwa, Makamu Mwenyekiti wa CCM (Bara), Philip Mangula, Katibu Mkuu wa CCM, Abdulrahman Kinana, Katibu wa Halmashauri Kuu ya Taifa, NEC, Itikadi na Uenezi, Nape Nnauye, Spika wa Baraza la Wawakilishi, Pandu Ameri Kificho, Mkuu wa Majeshi, Jenerali, Davis Mwamunyange, Mkuu wa Jeshi la Polisi, IGP Ernest Mangu na viongozi wengine wakiwemo, mawaziri wa Zanzibar na Tanzania Bara na mabalozi.

JECHA AIBUKIA AMAAN

Katika sherehe hizo, Mwenyekiti wa Tume ya Uchaguzi ya Zanzibar (ZEC), Jecha Salim Jecha, aliibuka na kuwa kivutio kikubwa.

Jecha, muda mwingi alionekana akiwa na furaha na tabasamu huku akibadilishana mawazo na viongozi mbalimbali.

GWARIDE

Sherehe hizo zilipambwa kwa gwaride la vyombo vya ulinzi na usalama, ambavyo  vilipita mbele ya rais kwa mwendo wa pole na wa haraka.

Gwaride liliingia uwanjani saa 3:00, asubuhi, likiongozwa na kamanda wake, Luteni Kanali Mohamed Adamu.

Ilipofika saa nne, asubuhi, Dk. Shein aliingia uwanjani akiwa kwenye gari la wazi la Jeshi la Wananchi wa Tanzania (JWTZ), akiongozwa na pikipiki 21 za askari polisi, ambapo alikuwa akiwapungia wananchi mikono.

Baadaye rais alisimama kwenye jukwaa maalumu, ambapo wimbo wa taifa ulipigwa pamoja na mizinga 21.

Aidha, katika sherehe hizo kikosi maalumu cha jeshi kilipita mbele ya rais na kutoa salamu kikiwa kimevalia kivita.

MAANDAMANO

Sherehe hizo zilipambwa kwa maandamano ya wananchi wa mikoa yote ya Zanzibar pamoja na maandamano ya wafanyakazi wa serikali na mashirika ya umma.

USIKU WA MAPINDUZI

Ilipofika saa sita kamili usiku wa Januari 12, wananchi wa mji wa Zanzibar na viunga vyake walijitokeza kwa wingi kwenye maeneo mbalimbali ambapo walikuwa wakishuhudia upigaji wa fataki kama ishara ya sherehe hiyo.

Tukio hilo lilivuta hisia za wananchi wengi ambao walikusanyika kwenye maeneo tofauti na kushangilia huku anga la mji wa Zanzibar,  likimeremeta.