ADHA KIVUKO CHA LUDEWA, NYASA KUMALIZWA

 Mgombea wa Urais kupitia Chama Cha Mapinduzi (CCM) Dk. John Pombe Magufuli akihutubia umati wa wakazi wa Songea mjini waliofurika kwenye uwanja wa Maji Majikumsikiliza wakati wa kujinadi kwenye mkutano wa Kampeni za CC

Mgombea wa Urais kupitia Chama Cha Mapinduzi (CCM)Dk. John Pombe Magufuli akihutubia umati wa wakazi wa mji wa Songea ambapo alisema katika serikali yake wakulima hawatokopwa mazao yao, mbolea zitapatikana kwa wakati, barabara zitaboreshwa ,elimu bure mpaka kidato cha nne, kuongeza maslahi ya walimu pamoja na kuboresha huduma za afya

Na Selina Wilson, Ludewa

ADHA ya kutegemea kivuko cha Mto Ruhuhu kwa wananchi wa Ludewa na Nyasa itamalizika baada ya kujengwa daraja linalounganisha wilaya hizo.

Daraja hilo linatarajiwa kujengwa na serikali ya awamu ya tano na ujenzi wake utakwenda sambamba na ujenzi wa barabara ya lami kutoka Njombe/Ludewa/Nyasa.

Ahadi hiyo ilitolewa jana na Mgombea urais wa CCM Dk. John Magufuli alipozungumza na wananchi wa Lipingu kabla ya kuvuka mto huo kwa kivuko cha MV Ruhuhu.

Dk. Magufuli alisema anatambua adha wanayopata wananchi  wa Lituhi na Lipingu vilivyotenganishwa na mto huo kutokana kivuko hicho kushindwa kufanya kazi maji yapopungua.

Alisema baada ya kuingia madarakani ujenzi wa daraja hilo na barabara za lami itakuwa miongoni mwa vipaumbele vyake na kwa kuwa ipo kwenye ilani ya uchaguzi ni lazima itekelezwe.

Aliwataka wananchi wa vijji hivyo wamuamini wampigie kura za ndio ili aingie madarakani atekeleze mipango ya maendeleo na daraja hilo litakuwa la kwanza.

Dk. Magufuli aliwaahidi wananchi wa Lipingu kwamba ataanzisha skimu ya kilimo cha umwagiliaji ili wananchi waendeshe kilimo bora na wapate mazao mengi ya chakula na biashara.

Alisema anazijua changamoto zao za pembejeo na vifaa vya uvuvi hivyo atahakikisha vifaa hivyo vinashuka bei ili wananchi wamudu kuvinunua na kuvua kwa ajili ya biashara.

Akiwa katika kijiji hicho pia alimnadi mgombea ubunge wa Ludewa, Deo Filikunjombe na kuwasisitiza wananchi kwamba: "Deo nampenda, ninamhitaji kwa kuwa ni kijana mchapa kazi mwenye kupenda maendeleo ya wananchi wa jimbo lake."

Dk. Magufuli na msafara wake walivuka kwa kivuko hicho cha MV. Ruhuhu ambacho kilivusha magari manne manne kwa awamu pamoja na abiria.