UKAWA WASHINDWA KUELEWANA WAGOMBEA UBUNGE

NA WAANDISHI WETU

MTAFARUKU umeendelea kutikisa kwenye kundi la UKAWA baada ya vigogo wa vyama vya upinzani vinavyounda kundi hilo kukiuka makubaliano ya kugawana nafasi za ubunge na udiwani.

Licha ya Mwenyekiti wa Chadema, Freeman Mbowe, kuahidi kuwa ndani ya siku tatu watamaliza mvutano huo, lakini imedhihirika wameshindwa kufanya hivyo baada ya siku tatu kupita pasipo kufikia makubaliano.

Awali, vyama hivyo vilisema vitasimamisha mgombea ubunge na udiwani mmoja katika kila eneo la uchaguzi ili kukabiliana na Chama Cha Mapinduzi (CCM), lakini vimeshindwa kutimiza lengo hilo kufuatia uroho wa madaraka waliokuwa nao.

Inadaiwa kuwa majimbo ambayo UKAWA wameshindwa kusimamisha mgombea mmoja ni matatu ya mkoani Dar es Salaam ambayo ni Ukonga, Segerea na Kigamboni; Serengeti mkoani Mara, Mtama (Lindi), Mtwara Mjini na Kilombero lililoko mkoani Morogoro.

Mgawanyiko wa UKAWA ulionekana wakati wa uzinduzi wa kampeni za mgombea urais kupitia CHADEMA, Edward Lowassa, ambaye aliwahi kuwa waziri mkuu na kujiuzulu nafasi hiyo kwa kashfa ya Richmond.

Katika uzinduzi huo, UKAWA iliwatambulisha wagombea ubunge wawili wawili katika majimbo matatu ya Dar es Salaam, pia hali hiyo bado imeendelea kujitokeza katika jimbo la Temeke.

Kwa mujibu wa makubaliano ya UKAWA,  Jimbo la Temeke lilikuwa upande wa CUF, lakini Chadema wameendelea kumsimamisha kibabe mgombea wao, Richard Mwakyembe, ambaye pia amekamilisha taratibu za ushiriki kwenye uchaguzi  mkuu utakaofanyika Oktoba 25.

Licha ya Mwakyembe kupewa Kata ya Mtoni kuwania nafasi ya udiwani, ametoa masharti kuwa lazima CHADEMA wapewe kata tano ambazo awali zilikuwa mikononi mwa CUF ili aweze kuachia nafasi hiyo.

Akizungumza sakata hilo, Mwenyekiti wa CUF Wilaya ya Temeke, Rehema Kawamba, alisema wanashangazwa na madai hayo ya Mwakyembe ambayo yana lengo la kuubomoa umoja huo.

Alisema katika kikao cha awali cha usuluhishi, Mwakyembe aligoma kuhudhuria kwa madai kuwa sio halali na wala hatokubaliana na kufanyika kwake kwa kuwa yeye ni mkubwa zaidi kuliko wajumbe wengine.

Mvutano huo ulisababisha wanachama wa CUF kuhisi baadhi ya viongozi wao wanahusika katika kukihujumu chama  chao.

Imeelezwa kuwa licha ya jitihada zinazofanywa na uongozi wa CUF Wilaya ya Temeke kuutafutia ufumbuzi mvutano huo, Mwakyembe anadaiwa  kuendelea kukaidi.

Katika Jimbo la Segerea, kufuatia mzozo unaoendelea ndani ya UKAWA, mgombea ubunge wa NCCR amejitoa kwenye mbio hizo ili kulinda heshima yake.

Kwa mujibu wa chanzo chetu cha habari, mgombea huyo ambaye ni Makamu Mwenyekiti wa NCCR, Leticia Musole, amejiengua kutokana na malumbano yaliyopo ndani ya UKAWA yasiyokuwa na majibu, hivyo kuhofia kuchafuliwa jina lake.

Hivyo wagombea waliobaki katika jimbo hilo ni kutoka vyama vya CUF na CHADEMA ambavyo vimekuwa viking’ang’ania nafasi hiyo.

Viongozi wa juu wa UKAWA wamenyooshewa kidole kuwa ni chanzo cha mvutano huo wa kimaslahi kwa wagombea ubunge kutokana na kuchelewa kutoa uamuzi.

Mvutano huo pia umejitokeza kwenye Jimbo la Mtwara Mjini ambapo Mwenyekiti wa NCCR Mkoa wa Mtwara, Hassan Uledi, anawania nafasi ya ubunge sambamba na mgombea wa CUF, Maftaha Nachuma.

Wagombea hao wote wanadai kupewa baraka zote na umoja huo.

MBATIA AKIRI

Akizungumza na waandishi wa habari, Mwenyekiti wa NCCR, James Mbatia, alisema bado kuna majimbo yana mvutano na kusababisha kushindwa kufikia muafaka.

Alisema bado UKAWA wanaendelea na vikao vya majadiliano ili kufanya maamuzi na kuwataka wagombea wa vyama vinavyounda kundi hilo kuacha kulumbana.

Licha ya kuwepo kwa mzozo huo majimboni, Mbatia alidai kwenye majimbo matatu pekee ndiyo wameshindwa kukubaliana.

Aliyataja majimbo hayo kuwa ni Serengeti, Mwanga na Mtwara Mjini.

“Ni kweli majimbo hayo yana utata, lakini yapo majimbo tuliyoyatolea maamuzi likiwemo Segerea ambalo mgombea wake atakuwa Julius Mtatiro kutoka  CUF.

“Jimbo la Serengeti lina wagombea wawili ambao ni kutoka CHADEMA na NCCR-Mageuzi, jimbo la Mwanga mgombea ni kutoka NCCR na Chadema huku Mtwara mjini ni kutoka CUF na NCCR,” alisema.

00000