KAMPENI ZA SAMIA USIPIME, AWAPA SOMO WANAWAKE

 Mgombea Mwenza waa Urais kwa tiketi ya CCM, Mama Samia Suluhu Hassan akilakiwa na Mke wa Waziri Mkuu, Mama Tunu Pinda alipowasili kwenye jengo la White House, Makao Makuu ya CCM mjini Dodoma leo, kuzungumza na kina mama wa makundi mbalimbali

Mama Samia akiwa na Mwenyekiti wa CCM mkoa wa Dodoma, Adam Kimbisa wakati akienda ukumbini Kulia ni Katibu wa CCM wa mkoa huo, Albaert Mgumba.

Mama Samia akivishwa shuka nyeupe kuonyesha kukaribishwa kwa ukarimu na Kina mama wa Dodoma, kabla ya kuingia ukubini.

Mwenyekiti wa CCM wilaya ya Dodoma, Fatuma Mwenda akimzawadia Mama Samia kitenge.

NA EPSON LUWHAGO, BAHI

MJUMBE wa Halmashauri Kuu ya Taifa (NEC) ya CCM, Angellah Kairuki, amesema uongozi wa nchi haupatikani kwa majaribio na maigizo kama wanavyofanya baadhi ya wanasiasa wa upinzani.

Wakati kiongozi huyo akisema hayo, Mgombea Mwenza wa Urais wa CCM, Samia Suluhu Hassan, ameendelea kukonga nyoyo za wananchi kila anakopita kutokana na ahadi zake zilizomo katika Ilani ya Uchaguzi.

Akizungumza katika mkutano wa kampeni wa Mgombea Mwenza wa Urais wa CCM, Samia, katika mji wa Bahi juzi, Angellah alisema baadhi ya wanasiasa wanataka kuingia madarakani kwa kuwadanganya wananchi kuwa wanawaonea huruma kutokana na matatizo waliyo nayo.

Bila kuwataja majina, Angellah ambaye pia ni Naibu Waziri wa Ardhi, Nyumba na Maendeleo ya Makazi, alisema baadhi ya wanasiasa wamekuwa wakienda kwa wananchi huku wakijifanya wanawahurumia kumbe ni usanii mtupu.

Hivi karibuni, mgombea urais wa CHADEMA, Edward Lowassa na mgombea mwenza wake, Juma Duni Haji, walikwenda kwenye Soko la Tandale na kupanda daladala kwa madai ya kujua matatizo na adha wanazozipata.

“Watu hawa wanaigiza kwenda kwa wananchi eti wanataka kujua shida zao ili wakiingia Ikulu waweze kuzishughulikia. Uongozi hauhuitaji maigizo. Hivi walikuwa wapi walipokuwa na nyadhifa kubwa serikalini? Hawakuona matatizo hayo?

“Niwaulizeni ndugu zangu wa Bahi, hivi watu hawa wanaweza kuja hapa Bahi na kushiriki kuvuna na kubeba magunia ya alizeti kutoka mashambani? Tuachane na sanaa hizi. Uongozi ni kazi na anayetaka kuigiza aende Kaole,” alisema.

Aliwataka Watanzania kuacha kudanganyika na usanii huo bali wamchague mgombea urais wa CCM, Dk. John Magufuli kwa kuwa ni mchapakazi ndiyo maana amekuja na falsafa ya ‘Hapa Kazi Tu’.

Kwa upande wake, Katibu Mkuu wa Umoja wa Wanawake Tanzania (UWT) Amina Makilagi, alisema Magufuli ni mwadilifu na hana chembe yoyote ya usanii, hivyo ndiye anayefaa kuwa rais wa Tanzania.

“Tukimchagua Dk. Magufuli atahakikisha matatizo yetu yanapata ufumbuzi. Ameonyesha mfano katika ujenzi wa barabara hivyo tukimchagua tuna uhakika atashughulikia matatizo ya wananchi,” alisema.

Kwa upande wa mgombea mwenza, Samia, katibu mkuu huyo alisema ni mwanamke jasiri na mahiri katika utendaji kazi na kwamba akiwa Makamu wa Rais na kwa kushirikiana na Magufuli, wataipeleka nchi katika mafanikio makubwa.

“Huyu ni mwanamke hodari na mchapakazi. Ni mcha Mungu na anayesikiliza matatizo ya wanawake na vijana. CCM haikubahatisha kumteua kuwa mgombea mwenza, imeona uwezo wake kutokana na historia yake ya utendaji,’ alisisitiza.

SAMIA AKONGA NYOYO

Katika mkutano huo, Samia alikonga nyoyo za wananchi wa Bahi pale alipoeleza kuwa kero zinazolikabili jimbo hilo zikiwemo za maji, afya na elimu zinapatiwa ufumbuzi.

Alisema serikali inatambua kuwa Bahi ina tatizo kubwa la maji na kwamba katika kulitatua, imetenga sh. bilioni 2.3 kwa ajili ya kuvuta maji ambayo yatasambazwa sehemu mbalimbali.

“Niwahakikishie kuwa serikali imeshaliona tatizo la maji hapa Bahi. Suala hili litaanza kushughulikiwa muda mfupi baada ya serikali ya awamu ya tano chini ya CCM kuanza. Tupeni kura ili tuingie ofisini na kuanza kutekeleza suala hili,” alisema.

Pia, alisema atafikisha ujumbe kwa Rais Jakaya Kikwete ili kutekeleza hadi yake ya kutoa sh. milioni 400 kwa ajili ya kusambaza maji kwenye mji huo.

Kuhusu viwanda, alisema mpango kamambe umeandaliwa kwa ajili ya kujenga viwanda vidogo na vya kati ambavyo vitawezesha wananchi kusindika mazao kama vile alizeti na hatimaye kupata maendeleo badala ya kulanguliwa na wafanyabiashara wanaonunua mazao hayo kwa bei ndogo.

Kuhusu tatizo la njaa katika maeneo mbalimbali, ikiwemo Bahi, lililotokana na ukame, Samia alisema serikali imeanza kufanya tathmini ili kuhakikisha wananchi wanapata chakula.

“Hili tunalitambua fika na tutalisimamia kikamilifu. Lakini napenda niwahakikishie kuwa hakuna mwananchi ambaye atakufa kwa njaa kwa sababu ya ukosefu wa chakula,” alisisitiza.

Ili kuhakikisha kilimo kinaleta tija, alisema mpango mahsusi umeandaliwa wa kujenga skimu mpya za umwagiliaji na kukarabati za zamani ili wananchi wa Bahi wajikite katika umwagiliaji badala ya kutegemea mvua.

Mambo mengine aliyoahidi ni ujenzi wa mabweni katika shule za sekondari za kata ili kuhakikisha wanafunzi wote, hususan wa kike wanalala shuleni na kuwaepusha na vishawishi vinavyosababisha baadhi kukatisha masomo kwa sababu ya ujauzito.

AWAPA SOMO WANAWAKE

Katika hatua nyingine, Samia aliwataka wanawake kuhakikisha wanaichagua CCM ili iendelee kuongoza

Alisema Chama kinawategemea wanawake katika kukipatia ushindi katika Uchaguzi Mkuu wa Oktoba 25, mwaka huu, hivyo wana wajibu mkubwa wa kuhakikisha azma hiyo inatimia.

"Kina mama huu ni mwaka wetu kwani sisi wanawake ni jeshi kubwa. Najua tutafanya kazi nyumba kwa nyumba hadi tuingie madarakani,” alisema alipozungumza jana na wanawake wa Mkoa wa Dodoma, katika ukumbi wa White House Makao Makuu ya CCM mjini hapa.

Samia alitumia muda huo pia kuipongeza CCM kwa kuwapa kpaumbele wanawake ili kutimiza azma ya uwiano wa 50 kwa 50 katika uongozi. Alisema katika kutambua hilo, CCM imetoa nafasi kwake kuwa mgombea mwenza wa urais.

“Wanawake wamepewa nafasi za juu za uongozi kutokana na kuwa CCM inawajali na ndio wengi na wapigakura wakubwa. Nitahakikisha nafanya kazi kwa karibu na Dk. John Magufuli,” alisema.

Kuhusu vipaumbele alisema jambo kubwa litakuwa huduma za afya hasa huduma ya mama na mtoto na kwamba dawa katika hospitali zitakuwa za kutosha.

Kuhusu elimu, alisema jambo la kwanza atakalofanya ni kujenga mabweni katika shule zote pamoja na kujenga vyoo vya shule ili watoto wapate stara nzuri. Suala la maabara pia alisema litakuwa la kipaumbele.

Kwa upande wa kilimo, alisema serikali ijayo itahakikisha kinapatiwa msukumo wa kipekee kwa kuwa ndicho mwajiri wa wananachi wengi ili kuhakikisha kilimo kinakuwa na tija, alisema msisitizo utakuwa upatikanaji wa pembejeo hadi vijijini.

Sambamba na hilo, alisema maslahi ya walimu yataboreshwa ambapo katika serikali ijayo itaanzishwa Tume ya Utumishi wa Walimu ambayo alisema itakuwa imara.

Katika hatua nyingine, aliwataka wananchi wasitishike na ukame ambao umetokea katika baadhi ya maeneo na kusababisha njaa kwa kuwa vserikali ina chakula cha kutosha kwenye maghala.

"Nimepita katika maeneo mengi na kushuhudia ukame na njaa inaweza kutokea. Msijali serikali yenu ni sikivu na hakuna mwananchi anayeweza kufa kwa njaa,” alisema.

Kwa upande wake, Mwenyekiti wa CCM Mkoa wa Dodoma, Alhaji Adam Kimbisa, alimhakikishia Samia kuwa Dodoma ni ngome ya CCM miaka yote na wanawake waliowasili katika mkutano huo ndio wanamhakikishia ushindi.

"Hawa wanawake ndio watakaokwenda kufanya kampeni nyumba kwa nyumba, mtaa kwa mtaa, shuka kwa shuka hadi tuhakikishe inaendelea kuwa ngome yetu, hivyo msiwe na wasiwasi na mkoa huu," alisema Kimbisa.

0000