WANAHABARI WATAKIWA KUTOWACHAGULIA WANANCHI VIONGOZI

 

NA MWANDISHI WETU

UMOJA wa Klabu za Waandishi wa Habari Tanzania (UTPC), umeviomba vyombo vya habari  nchini viache kuwachagulia Watanzania viongozi, badala yake watangaze sera za vyama na sifa za wagombea.

Ombi hilo lilitolewa jana na Mkurugenzi Mtendaji wa UTPC, Abubakar Karsan wakati wa maadhimisho ya kumbukumbu ya kifo cha aliyekuwa Mwandishi wa Habari wa Channel Ten, Daud Mwangosi, yaliyofanyika katika Hotel ya Peacock, Dar es Salaam.

Mwangosi alifariki  dunia Septemba 2, mwaka 2012, eneo la Nyororo, mkoani Iringa, wakati akiwa anatimiza majukumu yake kama mwandishi wa habari.

Mkurugenzi Mtendaji wa UTPC, Karsan alisema vyombo vya habari vimekuwa vikiwachagulia na kuwaambia Watanzania wamchangue mtu fulani nzuri na mwingine mbaya.

Alisema kazi ya vyombo vya habari ni kuwaeleza Watanzania uzuri na ubaya wa sera za vyama pamoja na sifa za wagombea kutokana na mambo waliyoyafanya huko nyuma.

Karsan, aliwataka wandishi wa habari kuacha kujiingiza  katika kazi ya kuchagua na wasipige kura kwenye  magazeti, redio na televisheni, badala yake watawachagua wenyewe Oktoba 25, mwaka huu.

Kwa upande wake, Rais wa UTPC, Kenneth Simbaya, aliwaomba waandishi wa habari wasiwe na upande wowote badala yake wafanyekazi huku wakijua wanafanya kazi iliyotukuka.

Pia, aliwataka waandishi wa habari wazingatie maadili ya uandishi wa habari na kwamba kujiingiza katika mambo hayo watakuwa wanakwenda kinyume na maadili.

Simbaya alisema kuna wengine wanachangia katika mitandao ya kijamii, wamejisahau kuwa ni waandishi wa habari, hivyo aliwaasa waache kuchanganya siasa na habari.

Naye, Makamu Mwenyekiti wa UTPC, Jane Mihanji, aliwataka waandishi wa habari kuwa wamoja na kwamba wasipokuwa wamoja, wataendelea kulaumiana.