LUHWAVI: KUNA MTU ANATUMIA JINA LANGU KUWATAPELI WANA-CCM

NAIBU Katibu Mkuu wa CCM (Bara) , Rajab Luhwavi, amewatahadharisha wana CCM na wananchi kwa ujumla, kufuatia uwepo wa mtu anayetumia jina lake kutapeli wananchi.

Luhwavi ametoa tahadhari hiyo, kufuatia malalamiko ambayo ameyapokea kutoka kwa wana CCM na wananchi dhidi ya mtu huyo anayetumia simu ya mkononi yenye namba 0788 472076.

Akizungumza jana na gazeti hili, Luhwavi, alisema mtu huyo ambaye anajiita Rajab Luhavi, amekuwa akiwalaghai wanaCCM wanaowania kujaza nafasi zilizo wazi za Wajumbe wa Halmashauri Kuu ya CCM (NEC) na Uenyekiti  wa CCM Mkoa ambazo mchakato wake unaendelea.

Kwa mujibu wa Luhwavi, mtu huyo amekuwa akiomba fedha kutoka kwa wanasiasa hao, kwa madai kwamba atawasaidia katika mchakato huo ili majina yao yaweze kurudi.

Luhwavi alisema CCM haina utaratibu huo na kuwataka wanaCCM kutambua kwamba jambo hilo linaamuliwa na vikao ngazi za Chama na si vinginevyo.

Akifafanua Naibu Katibu Mkuu, alisema hii ni mara ya pili kwa tukio hilo kujitokeza na kwamba kwa mara ya kwanza ilikuwa kipindi cha mchakato wa uchaguzi mkuu, uliofanyika Oktoba mwaka huu.

Luhwavi alisema baadhi ya wanaCCM walibaini jina analotumia mtu huyo, baada ya kujaribu kumtumia fedha kupitia simu yake ya mkononi.

Alisema tayari ameshatoa taarifa polisi na Mamlaka ya Mawasiliano Tanzania (TCRA) na kuwataka wanaCCM na wananchi kwa ujumla kuchukua tahadhari dhidi ya mtu huyo.