MICHANGO YAMNG'OA MKURUGENZI WA MANISPAA

KASI ya wakurugenzi na watendaji wengine wa taasisi na mamlaka za serikali kutumbuliwa majipu, imezidi kupamba moto, ambapo safari hii rungu limetua ndani ya Manispaa ya Dodoma.

Jana, Waziri  wa TAMISEMI, George Simbachawene, alitangaza kumvua madaraka Mkurugenzi wa Manispaa ya Dodoma, Augustino Kalinga na kumsimamisha kazi Ofisa Elimu Vifaa na Takwimu wa Manispaa hiyo na kumpa onyo kali Ofisa Elimu Msingi wa Manispaa.

Watendaji hao wanatuhumiwa kushindwa kusimamia na kutekeleza waraka wa utoaji wa Elimu Bure.

Akizungumza mjini hapa jana, Simbachawene alisema amefikia uamuzi huo kutokana na kubainika wazazi kuchangishwa michango ya mlinzi, umeme na maji, ambayo ni kinyume cha agizo na azma ya serikali ya kutoa elimu bure.

Alisema Kalinga amevuliwa madaraka yake kuanzia jana, kutokana na kubainika kushindwa kuwasimamia watumishi walio chini yake hadi kusababisha kuandika na kusambaza barua kwa walimu wakuu wa shule za msingi Manispaa ya Dodoma.

Alisema hiyo inakwenda kinyume na maelekezo ya serikali yaliyo kwenye mwongozo na ameshindwa pia kusimamia utekelezaji wa maelekezo sahihi ya serikali kuhusu utoaji wa elimu ya msingi bila malipo.

"Kutokana na kasoro hizo na kwa mamlaka niliyonayo, namvua madaraka kuanzia leo tarehe 25/1/2016," alisema Simbachawene.

Kwa upande wa Ofisa Elimu Vifaa na Takwimu Msingi wa Manispaa ya Dodoma, Josephine Akimu, alisema amemsimamisha kazi kwa kosa la kudharau maekezo ya kiongozi wake, kutia saini barua kwa niaba ya mkurugenzi huku akitumia jina la Ofisa Elimu wake bila ridhaa yake.

Alisema uamuzi huo unalenga pia kupisha uchunguzi dhidi yake, ikiwemo kufahamu uwezo wake kiutendaji.

Akizungumzia Ofisa Elimu Msingi wa Manispaa ya Dodoma, Scola Kapinga, alisema anapewa onyo kwa kosa la kutokuwa makini na idara yake hadi kusababisha barua hiyo kuandikwa na kusambazwa katika shule zote za msingi zilizopo ndani ya manispaa hiyo bila yeye kuwa na taarifa.

Simbachawene alitumia fursa hiyo kuwaagiza wakuu wa mikoa, makatibu tawala wa mikoa, wakuu wa wilaya, na wakurugenzi wa mamlaka za serikali za mitaa kuendelea kuwaelimisha wakuu wa shule za msingi na sekondari katika maeneo yao ili kupata uelewa wa pamoja kuhusu utekelezaji wa elimu bure.

Pia, kufanya ufuatiliaji katika maeneo waliyopo kuhakikisha maelekezo ya utoaji wa elimu ya msingi bila malipo inatekelezwa kama ilivyokusudiwa.

Januari 22, mwaka huu, Waziri Simbachawene alimuagiza Katibu Mkuu, TAMISEMI (Elimu), kumuita ofisini mara moja mkurugenzi  pamoja na watendaji wote wanaohusika na idara ya elimu, akiwemo ofisa elimu ili waweze kutoa maelezo ya kina ni kwanini wameandika barua hiyo na msingi wake ulikuwa nini, wakati serikali imeshatoa fedha ambazo zinapaswa kufanya kazi hiyo.

Baada ya viongozi hao kuitwa na kutoa maelezo, ilibainika kuwa kuna kasoro na hivyo kumlazimu waziri kuchukua hatua kama alivyokuwa ameahidi baada ya kufika shule ya msingi Makulu na kukuta wazazi wakiombwa kuchangia fedha ya umeme, maji na mlinzi.

Simbachawene alisema kuwa hatua hiyo iliyochukuliwa ni ya kwanza, uchunguzi unaendelea.