UMMY: KIPINDUPINDU KISIGEUZWE MRADI

SERIKALI imesema itawachukulia hatua za kisheria watendaji wa halmashauri wanaotumia fedha nyingi kwa ajili ya kupambana na ugonjwa kipindupindu, lakini ugonjwa huo bado upo kwenye halmashauri zao.

Aidha, imesema hadi mwezi Machi, mwaka huu, wanataka ugonjwa huo uwe umemalizika kwenye maeneo yote.

Mbali na hilo, imesema tangu ugonjwa huo ulipoingia hadi sasa, imetumia takribani sh. bilioni moja kwa ajili ya kupambana nao.

Waziri wa Afya, Maendeleo ya Jamii, Jinsia, Wazee na Watoto, Ummy Mwalimu, alisema hayo jana, alipokuwa akitoa taarifa ya ugonjwa wa kipindupindu katika kipindi cha wiki moja, Bungeni mjini Dodoma.

Alisema wanafikiria kuwawajibisha watendaji wa halmashauri, ambao wanatumia fedha nyingi kwa ajili ya kupambana na ugonjwa wa kipindipindu, lakini wameshindwa kuudhibiti kwenye maeneo yao.

Ummy alisema wizara hiyo imeweka mikakati kuwa ifikapo Machi, mwaka huu, ugonjwa huo uwe umemalizika kwenye maeneo yote.

Alisema hadi kufikia juzi, watu 14,608 wameugua ugonjwa huo, kati yao watu 228, wamefariki dunia na kwamba mikoa ya Njombe, Ruvuma na Mtwara ndio pekee ambayo haijawahi kuripoti mgonjwa yoyote wa kipindupindu.

Ummy alisema mikoa 15, imeripoti kuwa na wagonjwa wa kipindupindu, ambapo idadi ya wagonjwa kwenye mikoa hiyo ni 524 na vifo vilivyoripotiwa ni 10.

Hata hivyo, alisema mkoa wa Morogoro bado unaendelea kuwa na idadi kubwa ya wagonjwa, ikilinganishwa na mikoa mingine na kwamba, mkoa wa Dar es Salaam, hauna mgonjwa yoyote katika kipindi cha mwezi mmoja sasa.

Ummy alizitaja manispaa zenye wagonjwa kuwa ni Morogoro (89), Halmashauri ya Morogoro (36), Mvomero (17), Ukerewe (36), Nyamagana (19), Ilemela (13) mkoani Mwanza, Bariadi (29), Bariadi Manispaa (23) mkoani Simiyu.

Mikoa mingine yenye wagonjwa wa kipindupindu ni Manyara, Mara, Geita, Mbeya, Dodoma, Arusha, Tabora, Singida, Lindi, Rukwa, Kilimanjaro na Kagera.

Ummy alizitaka mamlaka za mikoa, halmashauri pamoja na watendaji, kuendeleza juhudi za kuzuia kusambaa kwa mlipuko wa ugonjwa huo.

Alisema ugonjwa wa kipindupindu bado upo, hivyo kila mwananchi ana wajibu wa kuzuia ugonjwa huo.

Ummy alisema wizara hiyo inaangalia kufanya marekebisho ya sera ya afya, ambayo ni kuzuia badala ya kutibu ugonjwa huo.