MUTUNGI: VYAMA VYA SIASA VISISUSIE UCHAGUZI

MSAJILI wa Vyama vya Siasa nchini, Jaji Francis Mutungi, ameviasa vyama vya siasa kushiriki kwenye uchaguzi utakaotangazwa na Tume ya Taifa ya  Uchaguzi (NEC) pamoja na uchaguzi wa marudio wa Zanzibar, utakaofanyika Machi 20, mwaka huu.

Kwa mujibu wa barua iliyotolewa  kwa vyama hivyo jana, Jaji Mutungi alisema, kimsingi Sheria ya Vyama Vya Siasa Sura ya 258, inasisitiza vyama vya siasa  kushiriki katika chaguzi zote zinazotangazwa na tume za uchaguzi ili kufikia malengo yake ya kushika dola.

“Ni wajibu wa kila chama cha siasa nchini,  kama wakala wa kukuza demokrasia, utawala wa sheria na amani ya nchi, kuwa wa kwanza kutii matamko ya kisheria yanayotolewa na mamlaka  husika .

“Kama kuna chama cha siasa hakiridhiki au kimekwazwa kwa njia moja au nyingine na suala lolote kuhusu masuala ya uchaguzi, njia stahiki na inayoonyesha ukomavu wa kisiasa si kuhamasisha kugomea uchaguzi, bali ni vema kikafuata utaratibu uliowekwa katika sheria za uchaguzi,” alisema Jaji Mutungi.

Aidha, Msajili huyo alisema kwa mujibu wa sheria za nchi, bado ni suala la hiari kwa chama kushiriki uchaguzi, lakini utashi huo wa hiari unaenda sanjari na umuhimu wa kila chama kushiriki kila uchaguzi unaotangazwa na tume ya uchaguzi.

“Hivyo ni muhimu  kila chama cha siasa kuelewa kuwa, uchaguzi ni kipimo cha uhai wa chama cha siasa. Chama cha siasa kisiposhiriki uchaguzi, kinaua uhai wake katika mtazamo wa harakati za kisiasa,” alisisitiza.

Aliongeza kuwa mfumo wa demokrasia ya vyama vingi na vyama vya siasa umeimarika, hivyo sio vyema kwa chama cha siasa kujirudisha nyuma au kujiua kisiasa kwa kutoshiriki uchaguzi wakati kina uwezo wa kufanya hivyo.