WALIOFUNGUA KESI KUPINGA BOMOABOMOA WAPEWA SIKU 60 KUJITATHMINI

MAHAKAMA Kuu ya Tanzania,  Kitengo cha Ardhi, imetoa siku 60 kwa wakazi zaidi ya 681 wa Manispaa ya Kinondoni, kujitathmini iwapo wanaweza kufungua kesi ya kupinga bomoa bomoa na wakishindwa kufanya hivyo katika muda huo, serikali inaweza kuendelea na kubomoa nyumba zao.

Jaji Penterine Kente, alitoa uamuzi huo jana, ambao ulikuwa unasubiriwa kwa hamu na wakazi hao kutokana na maombi yaliyokuwa yamewasilishwa na wakazi saba, wakiomba waruhusiwe kufungua kesi kwa niaba ya wenzao 674.

Wakazi hao waliowasilisha maombi hayo  namba 822 dhidi ya Manispaa ya Kinondoni, Baraza la Taifa la Usimamizi wa Mazingira (NEMC) na Mwanasheria Mkuu wa Serikali (AG).

Akisoma uamuzi huo uliochukua takriban saa moja, Jaji Kente alisema mahakama imekubali maombi ya wakazi hao saba kwa niaba ya wenzao baada ya kupitia hoja za pande zote husika.

Jaji Kente alisema mahakama hiyo inatoa muda wa siku 60 kwa wananchi hao kujitathmini kama wanaweza kufungua kesi ya kupinga bomoa bomoa ama la.

Alisema kukubaliwa kwa ombi hilo kunatokana na mahakama kufuata misingi ya haki na ubinaadamu kutokana na wakazi hao kushindwa kutimiza baadhi ya masharti yaliyotolewa.

Jaji huyo aliyataja masharti hayo kwamba ni kama waombaji hao wanaonyesha wana kesi dhidi ya serikali, kuna uzito wa kufungua kesi hiyo kwa misingi ya haki, kwamba inaangukia wapi sambamba na kama waombaji watapata hasara isiyopingika.

Katika masharti hayo, Jaji Kente alisema waombaji wamekidhi sharti la kwamba watapata hasara  isiyopingika kutokana na kuvunjiwa nyumba zao.

Jaji huyo alisema baada ya kuisha siku 60, zilizotolewa kwa waombaji hao, serikali inaweza kuendelea na bomoabomoa mara baada ya kuisha siku hizo Machi 27, mwaka huu.

Alisema serikali inaweza kuendelea na bomoabomoa kama kawaida, endapo waombaji hao watakuwa hawafungua kesi ya msingi, kikubwa ifuate misingi ya haki na sheria katika utekelezaji wake.