ASKOFU MOKIWA AYALIPUA MAKANISA

ASKOFU wa Kanisa la Anglikana Dayosisi ya Dar es Salaam, Dk. Valentino Mokiwa, ameweka hadharani mawe (majipu) yanayolikumba kanisa na kuwataka waumini kujisafisha kwa kuwa na moyo mweupe.

Ameyataja majipu hayo kuwa ni pamoja na baadhi ya maaskofu kuzushiana figisufigisu, wizi, ulaghai, chuki na kutukanana, hivyo kukwamisha makanisa kusonga mbele.

Dk. Mokiwa aliweka hadharani matendo hayo yanayotishia uhai wa kanisa jana, alipokuwa akiongoza Ibada Kuu  ya Pasaka, ambayo kitaifa ilifanyika kwenye Kanisa la St. Albans, lililoko Dar es Salaam. 

Katika ibada hiyo, Mkuu wa Mkoa wa Dar es Salaam, Paul Makonda, alikuwa miongoni mwa waumini waliohudhuria, ambapo aliowaonya viongozi wa dini wanaochochea uvunjifu wa amani makanisani.

Alisema hatawafumbia macho viongozi watakaoomba wapatiwe polisi kwa lengo la kutuliza migogoro kwenye makanisa, hivyo viongozi wa dini watakaofanya hivyo atawaweka ndani.

Dk. Mokiwa katika mahubiri yake alisema, kuna masuala lukuki yenye kuhusu kanisa, hivyo yanapaswa kuwekwa wazi.

"Kanisani kuna mawe (majipu) makubwa, ambayo yanazuia kanisa kutoka pale lilipo. Kuna mashindano ya taasisi na madhehebu, ambako watu wanakaa na kuangalia kanisa lipi kubwa, lina watu gani, askofu gani, idadi ya shule inazomikili," alisema Dk. Mokiwa.

Alibainisha kuwa kila kipindi cha sikukuu wamekuwa wakiangalia ya nje ya kanisa na sasa wameamua kujitazama wenyewe nyumbani.

Aliyataja majipu mengine kuwa ni maaskofu kupigana vita kwa kila mmoja kumchimbua mwenzake na kuanzishiana figisufigisu huku wakiacha kufuatilia maeneo yao.

“Viongozi wa kiroho wanatukanana, tumeona wachungaji nao wakikosa utii na kukataa mahali pale walipo. Dhambi ya mapinduzi na ugumu wa moyo, tumeona kanisani kusemana na kusingiziana," alisema.

Dk. Mokiwa alisema kwa sasa kanisani uongo umekuwa nyumbani kwake na kumekuwa na nguvu ya makundi, jambo ambalo limekuwa likivuruga kanisa.

Aidha, alibainisha kuwa roho ya uchochezi, dhambi ya wivu, uzushi na tabia ya chuki iko kanisani, wizi na ulaghai, jambo ambalo limepunguza upendo.

Pia, alisema injili za kibiashara nazo ni miongoni mwa majipu yanayotesa kanisa, kwani kuna makanisa mengi yameanzishwa kwa dhumuni la kufanya injili za namna hiyo.

Dk. Mokiwa alisema makanisa hayo yanayofanya injili za kibiashara, yamekuwa yakisisitiza utoaji wa sadaka ili muumini apokee miujiza.

"Mkristo anayempenda Mungu anashindwa kumuona Mungu wake kutokana na watu waliopo kanisani. Kwa kuwa utakuta kanisa halina nidhamu, haliheshimiani, lina mawe haya. Mawe haya ni majipu, ambayo yanalifanya kanisa lishindwe kutoka," alisema.

Aliwataka waumini kujisafisha kwa kuwataka kutosherehekea Sikukuu ya Pasaka ya kukufuka kwa Yesu Kristo kwa mioyo yao iliyopita, bali kwa moyo mpya uliosafishika.

Alisema iwapo Wakristo watakuwa na mioyo myeupe, hakuna kitakachoshindikana huku akiwakemea wale wanaoombea mabaya kanisa kwa kuwataka washindwe.

Pia, aliyapongeza makanisa yanayokataa mawe hayo na kuyataka yasikae kimya, bali wasaidie makanisa mengine yaliyopotea ili yarudi na kufanya yale waliyoagizwa na Mwenyezi Mungu.

"Pasaka ya mwaka huu, Mungu anataka wote tuwe na moyo mweupe na maombi yasiyokoma ili sote tusimame katika njia nyeupe.

"Kanisa lisiwe ni mahali ambapo halitajizungumza lenyewe, tukatae kwa kuwa kanisa sasa limekuwa la aibu. Nayapongeza makanisa yote yanayomuenzi Mungu na siyapongezi yale, ambayo hayamtunzi masikini, bali yanatafuta vyombo vya habari kwa kujivua yenyewe," alisisitiza.

Katika ibada hiyo, waumini wa kanisa hilo wakiongozwa na Askofu Mokiwa, waliwaombea watoto yatima na wale wenye wazazi, lakini wanaishi maishi ya uyatima,

Kwa upande wake, Mkuu wa Mkoa wa Dar es Salaam, Makonda, alionya kuwa hataki kusikia viongozi wa dini mkoani humu wakihitaji polisi kwenda kulinda amani kutokana na mitafaruku baina ya waumini.

"Ni aibu kubwa sana kwa kanisa kukimbilia katika vyombo vya dola, sisi wanasiasa tunatakiwa kukimbilia kanisani mambo yanapotushinda. Kwani  kufanya hivyo tunamwaibisha Yesu Kristo, wale watakaomba polisi ndio watakaokuwa wa kwanza kuwaweka ndani," alisisitiza.

Makonda alieleza namna alivyopigiwa simu na mwanamama aliyedai kutoka kanisa lililoko Kimara, akiomba msaada wa polisi, akidai kuna watu wanatoa rushwa kanisani.

"Nilimwambia mama kaa kimya, tunao mfumo wa kushughulikia watu hao na hakuna mahala kwenye maandiko panasema tukishindwa tumuite polisi," alisema.

Makonda alisema serikali inahitaji msaada wa taasisi za dini kuisaidia katika masuala mbalimbali na sio taasisi hizo kuomba msaada wa polisi.

"Katika mkoa huu, atakayepeleka taarifa ya kuomba polisi ili waje kulinda amani kutokana na mitafaruku, namtia ndani," alisema.

Aidha, aliwaomba waumini wa dini hiyo kumwombea Rais Dk. John Magufuli, kutokana na kazi kubwa anayoifanya, ikiwemo ya kutumbua majipu kwa kuwa sio kazi rahisi.

Kuhusu elimu, Makonda alisema Dk. Magufuli amekubali kutoa elimu bure na ina changamoto zake, hivyo wanapaswa kumsaidia kwa kumuunga mkono.

Mbali na hayo, aliwaomba viongozi wa dini kusaidia katika kuhamasisha usafi kwa kuwa kuna watu wengi hawataki kufanya usafi.

Pia, aliwaomba kumsaidia katika masuala ya ulinzi na usalama na kuwa kwa sasa Dar es Salaam, haiko salama.

Makonda alisema juzi, polisi walifanikiwa kuua majambazi yakiwa na mabomu maeneo ya Sea Cliff na kwamba, kwenye mpaka wa Mkoa wa Dar es Salaam na Pwani, wamebaini kuna watoto wadogo wanafundishwa namna ya kutumia silaha na mabomu.

Alisema baada ya kukamilika kwa siku 90, za uhakiki wa silaha, ataongoza operesheni maalumu ili kuwakamata watu wanaomiliki silaha kinyume na utaratibu.

WATANZANIA WAHIMIZWA
KUDUMISHA AMANI,  UMOJA

Katika hatua nyingine, Watanzania wametakiwa kuwa na umoja na kudumisha amani na kuacha vitendo vya kibaguzi katika kipindi cha Sikukuu ya Pasaka.

Wito huo ulitolewa jana na Padri Deogratius Charles wa Parokia ya Mburahati, Dar es Salaam, wakati wa Ibada ya Misa ya Sikukuu ya kukumbuka kufufuka kwa Yesu Kristo, ambaye alisema kwa sasa ni vyema Watanzania wakaondokana na dhana ya ubaguzi.

Padri Charles alisema dhana hiyo imejikita sana katika mioyo ya Watanzania wa sasa, ikilinganishwa na kipindi kilichopita  na kwamba, ni dhambi kubwa na ni kikwazo katika umoja na mshikamano uliojengwa na viongozi waasisi wa taifa.

“Mfano Magdalena alikuwa wa kwanza kushuhudia ufufuko wa Yesu Kristo na huo ni ushuhuda mzuri kwetu binadamu kuona maisha yasiyokuwa ya kibaguzi, hivyo lazima tubadilike na kuwa kitu kimoja,”alisema.

Alisema katika maisha ya sasa, vitendo vya kikatili vimeendelea kushamiri, ikiwemo ukatili wa kijinsia, ambao unatakiwa kupigwa vita kwa kuwa unazorotesha hali ya umoja, mshikamano na amani.

“Katika kipindi hiki cha kukumbuka ufufuko wa Yesu Kristo, inatupasa tujifunze kuishi maisha ya unyenyekevu na ya upendo pasipo kuwa na vitendo vya kibaguzi,” alisisitiza.

Aliwataka Watanzania kuliombea taifa liwe na amani katika kipindi kigumu kilichopita cha kisiasa na kwamba, kwa sasa wanapaswa kuwa na moyo mmoja wenye imani wa kiutu na kuacha vitendo vya kinyama.

WAUMINI MBEYA WATAKIWA
KUMUOMBEA RAIS MAGUFULI

Kutoka mkoani Mbeya, Askofu wa Kanisa Katoliki Jimbo la Mbeya,  Mhashamu Evarist Chengula, amewataka Watanzania kumwombea Rais Dk.John Magufuli, ili wabaya wake washindwe kumzuia katika kutekeleza majukumu yake kwa taifa.

Alisema nchi hii ina majipu mengi na serikali ya Rais Dk. Magufuli imekuwa ikifanya kazi zake kwa uwazi bila kufichaficha mambo.

Askofu Chengula aliyasema hayo jana, wakati wa mkesha wa Sikukuu ya Pasaka, uliofanyika katika kanisa hilo lililoko mjini Mbeya.

Alisema Watanzania leo wanaongea sana juu ya mambo ya ufisadi na mafisadi, hivyo wanatakiwa kumshukuru Mungu kwa kuwapatia kiongozi aliyeonyesha dhamira ya dhati ya kulishughulikia donda hilo.

"Lengo la Mungu kutuletea kiongozi huyu ni kutufanya Watanzania turudi katika mstari, ambao Mwenyezi Mungu anaupenda, ndio maana tumekuwa tunafurahia utendaji kazi wake,"alisema Askofu Chengula.

Aliongeza kuwa  anaamini hata wale wanaokamatwa wamekuwa wanaihujumu nchi, hivyo anachokifanya Rais Dk. Magufuli katika kuchukua hatua hizo ni kuwaonya ili wasirudie tena kufanya hivyo.

Askofu Chengula alisema kazi ya Watanzania hivi sasa ni kuwaombea waliokuwa wanaiharibu nchi ili Mwenyezi Mungu aweze kuwasamehe na kwamba, wasiache kuwaombea ili watubu makosa yao.

Aliongeza kuwa wengine licha ya kukamatwa, bado wamekuwa wanatafuta jinsi ya kujinasua katika tuhuma hizo zinazowakabili.

Aliwafananisha watu wa aina hiyo sawa na Wamisri na kwamba, Mungu anawataka hao wanaoiba mali za nchi watubu dhambi zao.

Askofu Chengula aliongeza kuwa hivi sasa jambo pungufu analoliona ni katika shule za serikali, lakini hakuna anayekiri kuwa majengo hayatoshi huku walimu wakiandikisha watoto wengi kuliko uwezo wa kuwamudu na hiyo yote inafanywa kwa kuogopa kufukuzwa kazi.

"Hivi kweli mnataka mpaka serikali ije iwajengee vyoo? Hawa ndio sawa na wauaji, ambao hawastahili kusamehewa. Hili ni tatizo, ambalo Wakristo tunaweza kuchokoza kwa kueleza tunatakiwa tuwe na madarasa yanayotosheleza watoto kadri ya taaluma inavyoeleza,"alisema.

Askofu Chengula alisema watoto wakiwa wengi darasani, mwalimu anakuwa sawa na mhubiri, ambaye kawaida huwa ni vigumu na hawezi kumuuliza swali na kuwataka Wakristo wawaombee wenzao. ambao hawafikirii kuwatengenezea watoto mahali pazuri ili waweze kusoma.

Aliongeza kuwa kwa sasa Watanzania wengi wamekuwa wanamshangilia Rais Dk. Magufuli kutokana na utendaji wake wa kazi hadi kufika hatua ya kusema hatimaye Baba wa Taifa Mwalimu Julius Nyerere amefufuka na kwamba, yote ni mema, lakini Wakristo wanatakiwa kumuombea kwani kuna maadui wengi.

Alisema Watanzania wanatakiwa wamuombee Rais Dk.Magufuli ili wale wabaya wake washindwe kama vile mwovu shetani alivyoshindwa na Yesu Kristo na kisha kufufuka kutoka kwa wafu.

Aidha,aliwataka Watanzania kushirikiana kwa karibu na serikali iliyopo madarakani ili iweze kuwatekelezea yale yote iliyowaahidi kupitia Ilani ya Uchaguzi.

WAUMINI SHINYANGA WAHIMIZWA

KUACHANA NA VURUGU NA CHUKI

Mkoani Shinyanga, Askofu Mkuu Mhashamu  Liberatus Sangu  wa Kanisa Katoliki  Jimbo Kuu la Shinyanga, amewataka  waumini kuwa na upendo na kutotanguliza chuki na vurugu kwa wengine.

Askofu huyo aliyasema hayo  jana,  katika Ibada Maalumu ya Siku ya Mkesha wa Sikukuu ya Pasaka, iliyofanyika kwenye Kanisa Kuu la Mama Mwenye Huruma  Parokia  ya  Ngokolo lililoko mjini Shinyanga.

Alisema  mwanga huashiria upendo na giza ni mapigano, chuki na vurugu, hivyo aliwataka Wakristo kuishi katika mwanga zaidi na kutoiga  baadhi ya maataifa ambayo kila siku wao ni giza.

“Leo  ni siku ya pekee tangu kuchaguliwa kwangu kuwa askofu mkuu jimbo la Shinyanga, ni Pasaka  ya kwanza, hivyo nawashukuru  wote ila natanguliza salamu zangu  kuieleza jamii  waimarishe  katika amani na upendo wa pamoja katika makundi ya wafungwa, yatima na wagonjwa,” alisema Askofu Sangu.

Askofu huyo aliwabatiza  waumini wapatao  41 na kuwapatia kipaimara kwa ishara ya kumpokea Yesu Kristo,  hivyo aliwataka kufuata matendo  mema waliyokuwa wakiyafuata kwenye kipindi kilichopita cha  kwaresima na kuyaendeleza.

Paroko Msaidizi  wa kanisa hilo, Pastory  Masunga, alipokuwa akitoa salamu kwa waumini wa parokia hiyo, aliwataka wazazi pia kuhakikisha  siku ya Pasaka hawawaruhusu watoto wao  kwenda kuzurula,  kwani kumepitwa na wakati  na kuiheshimu familia ili kuondokana na vitendo viovu, ikiwemo majanga kwao.

RUVUMA WATAKIWA KUWA

NA NYENDO ZA KIZALENDO

Kwenye ibada hiyo iliyofanyika mkoani Ruvuma, Askofu wa Kanisa Katoliki Jimbo la Mbinga, Mhashamu John Ndimbo, amewataka Watanzania kuhakikisha wanafuata  nyendo za kizalendo anazoendelea

kuonyesha Rais DK.Magufuli kwa taifa ili wananchi waweze kuyafikia maendeleo yanayokusudiwa kwa haraka.

Akiongea wakati wa mahubiri ya Sikukuu ya Pasaka katika Kanisa la Mtakatifu Wilhelm mjini hapa, Askofu Ndimbo alisema kasi ya Rais Magufuli ni mfano mzuri wa kuigwa kwani tangu aingie madarakani, Watanzania wameonyesha kuwa na imani naye.

Alisema  hali hiyo ikiendelea, kutakuwa na mabadiliko makubwa katika sekta mbalimbali.

Alisema binafsi anafurahishwa na utendaji kazi wa Rais Magufuli kutokana na ukweli kwamba, anachokifanya kitasaidia kupeleka taifa kwenye mapinduzi makubwa ya kiuchumi baada ya miaka mitano ijayo.

Askofu Ndimbo alisema  kinachotakiwa kwa Watanzania pamoja na kuunga mkono juhudi hizo, pia wasisite kumwombea kwa Mungu kila mara.

“Kumbukeni vigezo vya Rais wetu Magufuli anavyovitaka katika nchi yetu ili iweze kusonga mbele ni kuwa wazalendo kwa mali zetu kwa manufaa ya wananchi,” alisema Ndimbo.

Askofu Ndimbo alifafanua kuwa ili Tanzania iweze kupiga hatua za kimaendeleo haraka kulingana na rasilimali zilizopo, ni lazima kila mmoja aweke uzalendo mbele, badala ya kutaka kujilimbikizia mali kwa watu wachache huku walio wengi na hasa wanyonge wakiendelea kubaki masikini.

Alisema kitendo kinachofanywa na serikali ya awamu ya tano cha kutumbua majipu ni kizuri, kwani kwa miaka mingi nchi ilikuwa ikionekana haina uwezo wa kujiendesha yenyewe huku nyuma ya pazia kukiwa na watendaji na viongozi wachache, ambao walikuwa wakiliingiza taifa kwenye lindi la umasikini.

Alisema watendaji hao wamekuwa wakishirikiana na wafanyabiashara, ambao walikuwa wakwepaji wakubwa wa kulipa kodi.

Askofu Ndimbo alisema matumizi mabaya ya madaraka yaliyokuwa yakifanywa na vigogo wa ngazi ya juu sio peke yao, bali katika halmashauri za wilaya, miji, manispaa na hata majiji, wao vibaraka ambao kimsingi hushirikiana na walioko wizarani kufanya hujuma, hivyo kinachotakiwa kwa serikali ni kuhakikisha safisha safisha inahamia huko.

 “Matumizi mabaya ya madaraka tuyaache, muda mwingi tunapokuwa katika ofisi za umma tufanye kazi kwa kuzingatia maadili ya utumishi wa umma, hali hiyo itasababisha tujijengee historia nzuri katika maisha yetu”, alisema.

Askofu huyo aliwataka wananchi bila kujali itikadi zao za kidini au vyama vyao, kuungana na kutekeleza maagizo yanayotolewa na Rais kwani uzoefu wa siku chache za uongozi wake, umedhihirika wazi kwamba, kila anachokiagiza kinalenga kuwasaidia Watanzania wote bila ubaguzi.

Alisema iwapo itaonekana kujitokeza kwa baadhi ya watu kubeza shughuli zinazofanywa na serikali iliyopo madarakani, watapaswa kutoungwa mkono na si vinginevyo.

Hata hivyo, alisema ili maendeleo yaweze kupatikana kwa haraka, amani na utulivu uliopo nchini lazima uenziwe kwa kulindwa na kwamba, pasitokee mtu au kikundi cha watu kutaka kuvuruga hali hiyo, ambayo imedumu tangu nchi kupata uhuru wake mwaka 1961.

 ASKOFU DODOMA AWAHUBIRIA

WAUMINI UMUHIMU WA UPENDO

Mkoani Dodoma, imeelezwa kuwa kukosekana kwa hofu ya Mungu miongoni mwa watu, kumechangia kwa kiasi kikubwa kutokuwepo kwa upendo miongoni mwa jamii.

Kauli hiyo ilitolewa mjini hapa jana na Mchungaji Kiongozi wa Kanisa la Anglikana Parish ya Mlimwa, Robert Ligolei,  alipokuwa akihubiri katika ibada ya Sikukuu ya Pasaka, ambapo Wakristo wanakumbuka kukufuka kwa Yesu Kristo, ambaye alikufa ili kuwakomboa binadamu.

Alisema Wakristo wanaposherehekea sikukuu ya Pasaka, wanapaswa kukumbuka upendo mkuu aliouonyesha Yesu Kristo katika kuwakomboa binadamu na kuitumia siku hiyo kama fundisho.

Mchungaji huyo alisema kanisa na waumini kwa ujumla wana jukumu la kutunza na kuwalea yatima, wajane na watu wasiojiweza, hivyo katika siku hii ni wajibu wa kila mmoja kukumbuka hilo.

“Sio wewe na familia yako mnakula na kusaza bila kujua kuna watu wanauhitaji na maandiko yametuagiza kuwasaidia na kuonyesha upendo kwao ili nao wajione kama ni sehemu ya binadamu,”alisema.

Alifafanua kuwa kukosekana kwa hofu ya Mungu na kutokuwa na upendo, kumesababisha jamii kushindwa kusaidia kundi hilo lenye mahitaji.

Ligolei alisema hivi sasa kila familia kwa familia, ukoo kwa ukoo na jamii kwa ujumla, zote zimekosa upendo, hivyo kujikuta kila mmoja akiishi kivyake, tofauti na miaka iliyopita, ambapo watu walikuwa wakiishi kwa upendo, umoja na mshikamano.

Alisema kifo cha Yesu Kristo ni ukombozi na ishara ya upendo mkuu kwa binadamu na ndio mana alikubali kujitoa na kufa kifo cha aibu pale msalabani ili binadamu waweze kukombolewa.

Mchungaji huyo alisema hivi sasa jamii imetawaliwa na ubinafsi mkubwa kiasi, ambacho watu wanathubutu kuuana kwa kugombania mali na hata mambo mengine yasiyo na msingi na kusahau kuwa tayari walishapata ukombozi.

Alisema Yesu kabla ya kufa msalabani, aliagiza upendo kwa binadamu,   pia aliwapenda watoto hata akasema wawaache waende kwao maana ufalme wa mbinguni ni wao.

Sambamba na hilo aliwasihi kutoitumia siku hii kama siku ya kufanya uovu na kuchafua toba yote waliotubu kwa siku 40, wakati wa kipindi cha kwaresma kabla ya Pasaka.

Alisema waumini watakuwa ni watu wa ajabu kama watatumia kipindi hiki kutubu na kumuomba Mungu awasamehe, lakini wakati wa pasaka wanatumia nafasi hiyo kujipaka matope kwa madai ya kusherekea sikukuu hiyo si sawa kabisa.