SABABU ZA ONGEZEKO LA JOTO ZATAJWA

ELNINO iliyojitokeza mwaka 2015 na kuendelea hadi mwaka huu,  ndicho chanzo kikuu cha ongezeko kubwa la joto hapa nchini.

Viwango vya joto vilivyorekodiwa hivi karibuni na Mamlaka ya

Hali ya Hewa Tanzania (TMA), vilifikia hadi nyuzi joto 36, hususan katika maeneo ya Ukanda wa Pwani  na yale ya Nyanda za Juu Kaskazini Mashariki,  kiwango ambacho ni cha juu ya wastani kwa takribani nyuzi joto  1.7 hadi  2.0.

Tofauti hiyo ya hali ya joto ni kubwa, ikilinganishwa na viwango

vilivyowahi kupimwa katika miaka mingi iliyopita katika kipindi

hicho, ambapo kwa mujibu wa taarifa za Shirika la Hali ya Hewa

Duniani (WMO), ongezeko la joto limejitokeza katika maeneo

mengine duniani.

Dk. Agnes Kijazi, ambaye ni Mkurugenzi Mkuu wa TMA, aliyasema hayo jana, jijini Dar es Salaam, wakati wa upandaji miti kwenye eneo linalotarajiwa kujengwa makao makuu ya mamlaka hiyo, Sinza, kama moja ya maadhimisho ya Siku ya Kimataifa ya Hali ya Hewa.

Alisema katika kuadhimisha Siku ya Hali ya Hewa Duniani kwa

mwaka huu, TMA ilitumia fursa hiyo kuuhamasisha umma

kutembelea vituo vya hali ya hewa vilivyogawanywa kwa kanda

nane nchi nzima, ili kufahamu huduma zitolewazo na mamlaka

hiyo.

Aidha, alisema kwa kutembelea vituo hivyo, wananchi watajifunza na kuona namna watakavyoweza kufaidika na huduma za hali ya hewa katika maisha yao na shughuli za kila siku kwa maendeleo endelevu ya Taifa la Tanzania.

Mkurugenzi huyo pia alitumia nafasi hiyo kuwataka watumishi wa Mamlaka ya Hali ya Hewa, kupanda miti katika siku hiyo

maalumu, inayoadhimishwa kukumbuka kuzaliwa kwa Shirika la

Hali ya Hewa Duniani (WMO), miaka 66 iliyopita.

Alisema wamepanda miti hiyo iliyotolewa kwa hisani ya Wakala

wa Misitu Tanzania (TFS), katika maeneo mbalimbali nchini yenye ofisi za TMA, ili kuonyesha umma juu ya umuhimu wa kutunza mazingira kama njia mojawapo ya kukabiliana na mabadiliko yajayo ya hali ya hewa.

“Hali ya hewa itaendelea kubadilika kwa miongo ijayo kwa kadri,

ambavyo shughuli za kibinadamu zitaendelea kufanyika na

kusababisha ongezeko la gesi joto katika anga, hususan kwa

kukata miti,” alisema.

Aidha, alisema kwa miongo kadhaa iliyopita, joto la wastani la

kila mwaka, limekuwa likiongezeka zaidi, ikilinganishwa na

mwaka uliotangulia na hiyo ni kutokana na taarifa za nchi

mbalimbali, ikiwemo Tanzania, ambazo zimekuwa zikirekodi

ongezeko la viwango vya juu na vya chini vya joto.

Alisema matukio ya hali mbaya ya hewa kama vile ukame na

mafuriko, yamekuwa yakitokea katika sehemu mbalimbali duniani na kwamba, mabadiliko haya ya hali ya hewa yamekuwa yakibadilisha mifumo ya asili ya misimu na ongezeko la ukubwa  wa matukio ya hali mbaya ya hewa. 

“Joto kali, ukame na mvua nyingi ni mabadiliko ya hali ya hewa,

ambayo yanatarajiwa kuendelea kuchangia kuwepo kwa joto kali, ukame, mafuriko katika nyakati zijazo, hivyo kupanda miti ni

suluhusho zuri,” alisema.