MAKONDA AAHIDI DONGE NONO LA PESA KWA WALIMU DAR

MKUU wa Mkoa wa Dar es Salaam, Paul Makonda,

ameahidi kutoa donge nono la sh. milioni 15, kwa mwalimu wa somo la sayansi katika shule za sekondari, ambaye mwanafunzi wake atafanya vizuri mtihani wa kidato cha pili.

Aidha, Makonda ameahidi kutoa zawadi ya kitita cha sh. milioni 10, kwa mwalimu, ambaye wanafunzi wake watafanya vizuri kitaifa katika somo la sayansi.

Pia, amesema atatoa zawadi ya sh. milioni tano kwa mwalimu wa sekondari, ambaye wanafunzi wake watafaulu vizuri somo lake kitaifa.

Makonda, alitoa ahadi hiyo mwishoni mwa wiki, Dar es Salaam, katika hafla ya uzinduzi wa udhamini kwa wanafunzi kutoka kaya masikini, wanaosoma katika shule za serikali, unaoendeshwa na shule za Feza.

Mkuu huyo wa mkoa ametangaza ofa hiyo siku chache baada ya kuwaanzishia walimu wote wa shule za serikali katika mkoa wa Dar es Salaam, utaratibu wa kupanda mabasi ya daladala bure.

Makonda alisema ameamua kutangaza ofa hiyo kwa walimu wa mkoa huo kutokana na kutambua umuhimu na uzito wa kazi yao.

 “Pamoja na kutoa motisha hiyo, mwalimu atakayefaulisha wanafunzi wake vizuri kitaifa, nitampa ofa ya kwenda kutalii katika mbuga yoyote ya wanyama, yeye na familia yake ya watu watatu,”alisema.

Makonda alisema kwake hakuna tatizo la fedha kwa sababu wadau mbalimbali wa elimu nchini, wameamua kuisaidia serikali yao, hivyo chochote anachokihitaji, hujitokeza kumsaidia.

 “Watu hivi sasa wanaichangia serikali yao, tofauti na awali. Ndiyo maana ninasema pesa siyo tatizo.

“Awali walikuwa wanatoa fedha, lakini zililikuwa hazitumiki ipasavyo. Zilikuwa zinaishia katika mifuko ya wajanja wachache,” alibainisha.

Aliupongeza uongozi wa shule za kimataifa za Feza, kwa kubuni programu muhimu ya kuwasaidia wanafunzi wanaotoka katika kaya masikini  na kuwataka wanafunzi waliopata fursa hiyo kutobweteka.

“Wanafunzi msome kwa bidii  ili msiwavunje moyo  wadhamini hawa. Pia nitoe wito kwa wazazi kuendelea kuchangia elimu, hata kama huna uwezo wa kuchangia, basi fanya hata maombi kwa Rais Dk. Magufuli, ambaye anafanyakazi kubwa kuhakikisha nchi yetu inasonga mbele,”alisema Makonda.

Mkurugenzi Mkuu wa shule za Feza,  Issa Otcu,  alisema, programu hiyo  ya kusaidia wanafunzi wa shule za msingi wanaotoka katika kaya masikini,  itagharimu  sh. milioni 37.5, kwa mwaka huu.

Alisema program hiyo inajumuisha wanafunzi 150, kutoka shule mbalimbali za msingi mkoani Dar es Salaam, ambapo kila mwanafunzi ataingiziwa sh. 250,000,  katika akaunti yake,  zitakazomsaidia kupata mahitaji muhimu ya shule, ikiwa ni pamoja na kununua sare.

“Nia yetu ni kuunga mkono jitihada za Rais wetu Dk. John Magufuli  katika kutekeleza sera yake ya elimu bure. Kama wadau, tumeona tuna wajibu mkubwa wa kushiriki katika kufanikisha hilo, ambapo mpaka sasa  tumewaingizia wanafunzi hawa shilingi milioni moja katika akaunti zao,”alisema Otcu.