EL- MAAMRY AWASHUKIA VIONGOZI WA UWT

VIONGOZI na wanachama wa Umoja wa Wanawake Tanzania (UWT), wametakiwa kuzitambua na kuzisimamia rasilimali  za umoja huo ili zitumike kwa manufaa ya umoja huo na Chama Cha Mapinduzi (CCM).

Hayo yalisemwa jana na Mwenyekiti wa Baraza la Wadhamini la UWT, Said El- Maamry, alipozungumza na wajumbe wa Baraza la Utekelezaji la umoja huo wa wilaya ya Kinondoni, Dar es Salaam.

El-Maamry alikuwa katika siku ya mwisho ya ziara ya siku tatu ya kukagua mali za UWT mkoani Dar es Salaam, akiwa amefuatana na Katibu Mkuu wa umoja huo, Amina Makilagi na mjumbe wa Baraza Utekelezaji,  Angella Kairuki.

Alisema UWT inazo rasilimali za kutosha, vikiwemo viwanja na majengo,  lakini  haziunufaishi umoja huo na CCM, kutokana na  usimamizi dhaifu wa viongozi wake.

Aidha, alisema kutotumika kwa rasilimali hizo kuunufaisha umoja huo na Chama, pia kumechangiwa na viongozi wake kutokuwa wabunifu wa kuifanya miradi hiyo kuwa endelevu na yenye tija.

Alisema kutokana na udhaifu wa baadhi ya viongozi na watendaji, majengo na viwanja vya umoja huo, havina hati na kusababisha katika baadhi ya maeneo rasilimali hizo kuvamiwa na kusababisha mgogoro kati ya wananchi na UWT.

El-Maamry alisema hata miradi ya ubia kati ya UWT na wawekezaji, iliyoko katika baadhi ya matawi, kata, wilaya na mikoa, haiunufaishi umoja huo kutokana na baadhi ya viongozi na watendaji kutokuwa waadilifu.

Aliwataka viongozi na watendaji wa UWT katika ngazi zote, kuwa wabunifu wa kuanzisha miradi katika viwanja na majengo kwa kushirikiana na wawekezaji, wakizingatia kuweka mbele maslahi ya UWT na CCM wakati wa kutia saini mikataba na wawekezaji hao.

Kwa upande wake, Katibu Mkuu wa UWT, Amina Makilagi, alisema uamuzi wa kukagua mali za UWT ni agizo la CCM ili kutambua changamoto zilizopo, ili ifikapo mwaka 2019, umoja huo ujitegemee katika uendeshaji, ikiwemo mishahara ya watumishi wake. 

Amina alisema ziara hiyo ya wajumbe wa Baraza la Wadhamini kukagua mali za UWT, imeanzia mkoa wa Dar es Salaam, kwa kutembelea wilaya za Temeke, Ilala na Kinondoni, na itaendelea katika mikoa yote nchini.