MAKONDA AIBUA MADUDU ZAIDI MACHINGA COMPLEX

SAKATA la ufisadi  katika ujenzi na uendeshaji wa soko la wafanyabiashara wadogo, Dar es Salaam, maarufu kama Machinga Complex,  limezidi kuchukua sura mpya baada ya kubainika kwamba, deni la ujenzi  wa jengo hilo  limefikia  sh. bilioni 36 kutoka sh. bilioni 12.

Gharama  hizo zinatokana na uzembe mkubwa uliofanywa na baadhi ya watendaji katika  ujenzi na uendeshaji wa soko hilo, tangu lilipoanza kujengwa mwaka 2010, ambapo mkopo  halisi   ambao Jiji la Dar es Salaam, iliupata kutoka Shirika la Taifa la Hifadhi ya Jamii (NSSF), ulikuwa sh. bilioni 12.7, ambazo ilitakiwa zilipwe baada ya jengo hilo kuanza kufanyakazi.

Lakini kutokana na wasimamizi  wa jengo hilo kuzembea, riba ya  deni, ikijumuishwa na deni halisi, limefikia sh. bilioni 36, ambazo ni mara tatu ya gharama za ujenzi.

Kufuatia kuongezeka kwa gharama hizo maradufu, Mkuu wa Mkoa wa Dar es Salaam, Paul Makonda, jana, alitanga kuunda tume  ndogo ya kuchunguza mkataba wa ujenzi  wa jengo hilo.

Makonda alitoa tamko hilo baada ya kuongoza Kamati ya Ulinzi na Usalama ya Dar es Salaam,  kukagua jengo hilo,  akiwa na baadhi ya wajumbe wake, ambao ni Kamanda wa Polisi Kanda Maalumu ya Dar es Salaam, Simon Sirro, Mkuu wa Wilaya ya  Temeke, Sophia Mjema, Mkuu wa Wilaya ya Ilala, Raymond Mushi na  Ofisa wa Idara ya Uhamiaji mkoa wa Dar es Salaam (RIO), John Msumule.

Alisema kama kuna ufisadi mkubwa uliofanyika hapa nchini, mmojawapo ni ufisadi wa jengo la Machinga Complex, ambapo aliahidi kula sahani moja na wahusika wote watakaobainika kwa namna moja au nyingine  kuhusika.

Makonda alisema baada ya Waziri  wa Nchi Ofisi ya Rais (TAMISEMI) Utumishi na Utawala Bora, George Simbachawene, kutangaza kuvunja bodi ya soko la Machinga Complex, hivi karibuni na kulikabidhi katika ofisi ya Mkuu wa Mkoa wa Dar es Salaam, Kamati ya Ulinzi na Usalama ya mkoa ilikaa kikao cha kulitafutia ufumbuzi suala hilo.

Alisema iliundwa kamati ndogo, ambayo  jukumu lake la kwanza litakuwa ni kuuchunguza na kuupitia mkataba wa ujenzi wa jengo kutokana na kuwepo kwa mkanganyiko mkubwa.

Alisema lengo la kuundwa kwa kamati hiyo ni kupata uhalali wa mkataba wote wa ujenzi, ambapo kamati hiyo ndogo itachunguza kwa kina mkataba huo na wahusika.

“Tulikopeshwa shilingi bilioni 12.7, kwa ajili ya ujenzi wa soko hili, lakini mpaka sasa tunadaiwa shilingi bilioni 36. Fedha hizi mnatakiwa kulipa nyie wafanyabishara mliopanga hapa,”alisema Makonda.

Alisema kamati hiyo ikishapata uhalali wa ujenzi huo, ndipo itajulikana nani wa kuwajibika.

“Rais wetu Dk. John Magufuli anafanya  kila jitihada kutetea  haki za wanyonge. Sisi kama wasaidizi wake ni lazima tuhakikishe tunatekeleza wajibu  huo.

“Lakini sifa ya mnyonge ni lazima awe mkwel, katika kutoa taarifa sahihi  na sifa ya pili ni lazima  achukie rushwa. Hivyo tunawaomba wafanyabishara na mtu yeyote, ambaye anazo taarifa za jengo hili, atoe ushirikiano kwa kutueleza ukweli,”alisema.

Alibainisha kuwa hatua kali zitachukuliwa kwa kila mtu aliyehusika katika kutoa au kupokea rushwa katika jengo hilo, awe mfanyabiashara au kiongozi.

Alisema baada ya kujiridhisha na uhalali wa jengo,  ndipo wataanza kuangalia utaratibu wa kupangisha wafanyabishara  kwa kujali zaidi maslahi  yao kwani serikali iliwajengea jengo hilo ikiwa na nia njema ya kuwasaidia.