SAMIA: HATUTAMWACHA MLA RUSHWA BILA KUJALI HADHI YAKE

NA MWANDISHI MAALUMU, MOROGORO

SERIKALI imewaasa watumishi wa umma na wa sekta binafsi, kujiepusha na vitendo vya rushwa na kutekeleza majukumu yao kwa kuzingatia katiba, sheria, kanuni, miongozo na taratibu zilizowekwa.

Imeonya kuwa mkono wa serikali hautamwacha mtu anayejihusisha na vitendo hivyo bila ya kujali hadhi yake.

Kauli hiyo imetolewa na Makamu wa Rais Samia Suluhu Hassan, wakati wa uzinduzi wa mbio za Mwenge wa Uhuru, uliofanyika jana, katika Uwanja wa Jamhuri mkoani Morogoro.

Makamu wa Rais alisema mpaka sasa jumla ya kesi 596 za rushwa zinaendelea mahakamani na jumla ya shilingi bilioni 6.5 tayari zimeokolewa.

Samia alisema falsafa ya Mwenge wa Uhuru inahitajika zaidi hivi sasa kuliko wakati wowote ule ili kukabiliana na changamoto zinazojitokeza za kitaifa na kimataifa.

Alisema tangu kuanzishwa kwa mbio za Mwenge wa Uhuru mwaka 1964 na kukimbizwa katika Jamhuri ya Muungano wa Tanzania, umekuwa kichocheo kikubwa katika kuhamasisha maendeleo, umoja, mshikamano na kudumisha amani ambayo ni tunu pekee ndani ya taifa

Makamu wa Rais alizitaja baadhi ya changamoto hizo kuwa ni kuanza kujengeka hali ya kudharauliana ndani ya jamii, kuchukiana na kukatishana tamaa.

Samia alisema kuna haja ya kuzikabili changamoto hizo kwa ujasiri wa hali ya juu, kwa malengo yale yale ya kudumisha amani, upendo, umoja na mshikamano kupitia mbio za mwenge huo.

"Hilo ndilo tunalolifanya viongozi wenu wa serikali kitaifa. Hatua zote tunazozichukua za kutumbua majipu ni kurudisha heshima na kurudisha matumaini kwa wale waliokata tama. Serikali yenu inaendeleza falsafa hii, naomba nanyi mtuunge mkono," alisema Makamu wa Rais.

Akizungumzia ujumbe wa mbio za Mwenge wa Uhuru kwa mwaka huu wa ‘Vijana ni Nguvu Kazi ya Taifa, Washirikishwe na Wawezeshwe,’ Samia alisema mbali na kuhitaji kupatiwa elimu na ujuzi wa stadi za kazi,  wakuu wa mikoa na wilaya nchini wanapaswa kutenga maeneo rasmi kwa vijana ya kuendesha shughuli zao za kiuchumi.

Alisema wakati taratibu za kutafuta maeneo rasmi zinafanywa, viongozi hao watenge maeneo maalumu kwa siku za Jumapili na kuwataka vijana walipe ushuru, waimarishe usafi na waweke ulinzi wakati wakiendesha shughuli zao.

Samia pia alitumia fursa hiyo kuelezea azma ya serikali ya kuendelea kupambana na vitendo vya rushwa na ufisadi kwa lengo la kudhibiti mianya ya upotevu wa mapato ya serikali na kuboresha uwajibikaji katika usimamizi wa rasilimali na utoaji wa huduma kwa wananchi.

Aidha, alisema serikali inaendelea kupambana na malaria, ukimwi pamoja na matumizi ya dawa za kulevya, hatua ambayo itawafanya wananchi kuwa wenye afya bora, nguvu na ari ya kufanya kazi,hivyo kuongeza tija kwa Taifa na kutokomeza maadui umaskini, ujinga na maradhi.

Akizungumza katika hafla hiyo, Waziri wa Nchi Ofisi ya Waziri Mkuu Sera, Bunge, Vijana, Ajira na Walemavu, Jenister Mhagama, alisema  mwenge huo utakimbizwa kwa siku 179, katika mikoa na halmashauri zote nchini.

Uzinduzi huo ulihudhuriwa na viongozi mbalimbali, wakiwemo mawaziri, makatibu wakuu, wakuu  wa mikoa na wilaya kutoka Tanzania Bara na Visiwani.