CHILIGATI; LOWASSA, SUMAYE NI WANAFIKI

Na Mwandishi Wetu, Manyoni

WAZIRI wa zamani na Mbunge Mstaafu wa Manyoni, Kapteni John Chiligati, amewalipua mawaziri wakuu wa zamani, Frederick Sumaye na Edward Lowassa, ambao wamejiengua CCM na kujiunga na upinzani.

Akizungumza kwenye mkutano wa kampeni wa mgombea mwenza wa urais wa CCM kwenye viwanja vya CCM Wilaya ya Manyoni, mjini hapa, Chiligati alisema kitendo kilichofanywa na wanasiasa hao ni cha usaliti mkubwa.

Alisema anashangazwa na kauli zilizokuwa zikitolewa na wanasiasa hao kabla hawajaondoka CCM, ambazo zimeonyesha kuwa ni wanafiki wakubwa na hawapaswi kuaminiwa.

“Wakati wa harakati za kuwania urais, Lowassa alisema asiyempenda na anayemchukia aondoke CCM. Lakini hilo limekuwa kinyume kwani ni yeye aliyeondoka.

“Alipokuwa akitoa kauli hiyo alionekana ana mapenzi ya dhati kwa CCM, lakini kitendo chake cha kuondoka kimeonyesha alivyo kigeugeu,” alisema.

Kwa upande wa Sumaye, alisema naye ameonyesha kuwa kigeugeu na unafiki wa hali ya juu kutokana na kauli zake kwamba anamchukia Lowassa na kwamba CCM ingempitisha kuwa mgombea urais, angejiondoa kwenye Chama.

“Lakini ukweli umeonekana wazi kwamba alichokuwa akisema sicho alichokuwa akimaanisha. Badala yake amemfuata yule aliyekuwa akisema hafai kuongoza Tanzania. Huu ni unafiki wa hali ya juu,” alisema.

Chiligati pia aliwashangaa wapinzani kwa unafiki ambapo walikuwa wakisema Lowassa ni miongoni mwa mafisadi, lakini baada ya kutemwa kugombea urais, wamemchukua na kumteua kugombea.

Kutokana na hali hiyo, alisema Watanzania wanapaswa kutambua kuwa wapinzani ni wasanii na hawapaswi kupewa uongozi wa nafasi yoyote kwani hawajakomaa.

Chiligati, ambaye aliwahi kuwa Naibu Waziri wa Mambo ya Ndani ya Nchi; Kazi, Vijana na Ajira na baadaye Ardhi, Nyumba na Maendeleo ya Makazi,  alipasua jipu kwa kusema wananchi wa Manyoni watamchagua mgombea urais wa CCM, Dk. John Magufuli, kwa kuwa ni mchapakazi na mtu wa vitendo.

“Hivi mmewahi kusikia habari zozote za kashfa dhidi ya Magufuli?” alihoji na kujibiwa: “Hakuna”. Aliendelea kuuliza: “Hivi mliwahi kusikia Magufuli ana chembe zozote za ufisadi?” alijibiwa “hapana”.

Kutokana na majibu hayo, aliwaambia wananchi wa Manyoni kuwa kamwe wasifanye kosa kwa kufanya majaribio kwa kuuchagua upinzani bali wamchague Magufuli pekee ili aendeleze gurudumu la maendeleo.

Alisema Magufuli amejenga barabara ambapo sasa Manyoni inafikika kwa urahisi na pia serikali ya CCM imefanya mambo makubwa.

000000