WANANCHI WANAHITAJI HOJA SIYO MAHABA

NA CHRISTOPHER LISSA

UZINDUZI wa  kampeni za  umoja  usio rasmi wa katiba ya wananchi (UKAWA) uliofanyika juzi, viwanja vya Jangwani, jijini Dar es Salaam,  ni kielelezo tosha kwamba umoja huo ni kundi dogo la wababaishaji dhaifu  wenye nia rasmi ya kurubuni na kupotosha umma wa Watanzania.

Kwa kiswahili  cha mtaani, huu ni usanii  wa wazi  ambao  viongozi wa UKAWA  wanawafanyia Watanzania  kwa nia ya kuwapanda mabegani  ili waweze kuingia Ikulu.

Inaashangaza kuona kuwa wafuasi wa umoja huu wana macho, lakini hawaoni,  wana masikio lakini  hawatathmini nyimbo za kisanii wanazoimbiwa.

Wana akili lakini  hawatambui kabisa kuwa wameingizwa ndani ya jumba kubwa la  sanaa na wasanii.

Moja ya mambo yanayothibitisha  udhaifu mkubwa wa UKAWA ni wanachama kutokuelewa wanalolifanya na wanalofanyiwa na viongozi wao.  Ni kama waliofanyiwa mazingaombwe ya kutokujielewa.

Wafuasi hao wanatumia muda na nguvu nyingi kujikusanya  kwa wingi ili kushindana na wafuasi wa CCM.  Watanzania hawataki kuona umati. Wanataka kusikiliza sera za msingi.

Yaliyojiri katika uzinduzi huo  ni kielelezo tosha kwamba  umoja huo unaongozwa na  kundi dogo la wababaishaji dhaifu  wenye nia  thabiti  ya kurubuni na kuupotosha umma wa Watanzania.

Jambo la kushangaza zaidi  ni  udhaifu mkubwa wa hoja katika mikutano hiyo. Yaani ni vichekesho tupu. Kwa kimombo tunaita  ‘komedi’.

Umati wa watu uliofika katika uzinduzi wa UKAWA,  ulikuwa na matumaini makubwa kwamba viongozi wao wangekuwa na hoja za haja za kuwaeleza.

Waswahili wanasema ukishangaa ya Musa utaona ya Firauni. Hivi wenzangu mlielewa nini cha msingi kiliochojiri na kuzungumzwa  na UKAWA?

Katika historia ya mambo ya siasa hapa duniani,  sijawahi kushuhudia mgombea urais,  ambaye anadai eti yuko kwenye harakati za kuleta mabadiliko, halafu  anawaambia wafuasi wake hawezi kuhutubia, badala yake  wasome  hotuba hiyo kwenye tovuti. Huu ni udhaifu.

Hivi wafuasi wa UKAWA  kusoma hamjui, hata picha  halisi ya aina ya mgombea wenu, Edward Lowassa hamuioni?

Hali yake hamuioni? Hata anavyosimama na kwenda  kwenye kizimba cha kuhutubia hamuitathmini kabisa?

Hata anavyosimama mbele yenu na jinsi anavyoongea  hammuoni? Hata kutoka kwa sauti yake kwenye vipaza sauti  hamuisikii?

Hivi  tangu Lowassa aingie UKAWA ni lini aliwahi kuhutubia  wafuasi wake walau kwa dakika hata 20 tu na kuzungumza  hoja zenye mashiko? Hoja zinazomaanisha kwamba  ni mtu aliye  kwenye harakati za mabadiliko?

Inashangaza kwa mtu mzima kama  Frederick Sumaye, kujibebesha  udaktari wa kujua  ukweli wa  afya ya Lowassa na kuthubutu kutamka mbele ya wafuasi  kwamba eti afya ya  Lowassa   haina maana kubwa kwa sababu yeye anaenda Ikulu kuwa meneja tu.

Hivi Watanzania kweli  tunahitaji meneja Ikulu? Wafuasi wa UKAWA mnampigia kura Lowassa ili awe meneja wa Watanzania Ikulu? Haya ndiyo mabadiliko mnayoyataka?

Emmanuel Makaidi,  naye  na uzee wake  alipewa nafasi ya kuhutubia, lakini  badala ya kujenga hoja  alianza kusifia uzuri wa Lowassa.

Eti ni mweupe, ana nywele nyeupe, yuko safi!  Toba! Tena bila aibu wafuasi wanashangilia.

Mgombea mwenza,  Juma Haji Duni,  kama kawaida  alipopanda jukwaani,  aliendeleza mipasho yake. Huyo siku zote hana jipya. Hata uwaziri wa afya katika serikali ya Umoja wa Kitaifa Zanzibar ulimshinda.

Mtu ambaye alitegemewa kujenga hoja UKAWA, alikuwa James Mbatia. Lakini ajabu ni kwamba aligeuka  mwimbaji wa kwaya.  Wakati wananchi wanasubiri kusikiliza hoja za nguvu,  Mbatia alitumia muda  mwingi  kuimbisha watu kwaya jukwaani. Huu si usanii jamani?

Wafuasi wa UKAWA wakawa na matumaini makubwa  kwamba Lowassa atalipuka kisawasawa. 

Ndiyo siku yake ya ‘kufunguka na hata pengine kujisafisha na kashfa chafu ya Richmond.

Ajabu Lowassa  alihutubia kwa  kubabaikababaika huku akitamka ‘peoples’, salamu ya CHADEMA mara nyingi.

Mgombea huyu  alithubutu kuwaeleza wafuasi wake kwamba hotuba yake wakaisome kwenye tovuti.

Ni ajabu kwa UKAWA kushangilia  mtu anayeongea  pasipo na hoja za msingi.

Eti  Lowassa  anaahidi kumtoa  ‘Babu Seya’ jela pamoja na masheikh wa Zanzibar. Hivi ni vitu ambavyo havina mantiki kwa jamii ya  wale wanaojiita wana mabadiliko.

Kumtoa Babu Seya jela ndiyo mabadiliko wanayoyataka UKAWA?  Ajabu ni kwamba wanashangilia hoja dhaifu na zisizo na mashiko. Hoja mbovu, zilizochoka na zisizo na mbele wala nyuma.

Utamkuta mfuasi wa UKAWA anatoka kijasho chembamba  akiwa katikati ya umati wa watu, wakati hakuna chochote ambacho viongozi wake wanamweleza kikakaa akilini.

Hivi wafuasi wa UKAWA wanajitambua kweli?  Naweza kusema pengo la  Willbroad Slaa na Profesa Ibrahim Lipumba, kutokuwepo kwenye majukwaa ya umoja huo limeanza kuonekana. Watu ambao angalau walikuwa wanajenga hoja za haja kiasi kwamba wakipanda jukwaani,  mambo wanayozungumza yanaingia akilini.

Watanzania mnapaswa kutafakari.