MUDHIHIR AMPASUA LOWASSA

 Mbunge wa zamani wa Jimbo la Mchinga, Mudhihir Mudhihir akihutubia katika mkutano wa kampeni uliofanyika leo katika jimbo hilo mkoani Lindi

Mbunge wa zamani wa Mchinga,Muhdhihir Mudhihir akiteta jambo na Mwenyekiti wa CCM mkoa wa Lindi Mzee Mtopa katika mkuano wa kampeni uliofanyika katika jimbo hilo

MBUNGE wa zamani wa jimbo la Mchinga (CCM), Mudhihir Mudhihir, amesema hana mpango wa kujiunga na Ukawa, licha ya kuombwa na vigogo wake.

Mudhihir alisema Ukawa walimfuata wakimtaka kujiunga na CUF ili kuitoa madarakani CCM katika uchaguzi mkuu ujao, lakini hakuwasikiliza kwa kuwa ni wababaishaji.

Alifichua siri hiyo jana katika mkutano wa kampeni uliofanyika Jimbo la Mchinga mkoani Lindi.

Alisema viongozi wa kundi hilo walimfuata na alikataa ombi hilo kwa kuwa CCM ni chama madhubuti kinachotekeleza vyema ilani ya uchaguzi.

Aliwataka watu wanaoeneza uvumi kuwa ameihama CCM, kupuuzwa kwa kuwa hana mpango wa kujiunga na UKAWA inayoongozwa na viongozi wabovu.

“Ukawa walinifuata nijiunge nao, siwezi kufanya upuuzi wa aina hiyo…CCM ndio chama ambacho kimenilea, siwezi kuwafuata watu wasiokuwa na dira,” alisema Mudhihir.

Aliongeza kuwa CCM imeleta maendeleo makubwa nchini na kuwashangaa viongozi wa UKAWA wanaodai hakuna jambo lolote lililofanyika.

Mudhihir, ambaye amewahi kuwa Naibu Waziri, aliwashambulia Lowassa na Sumaye kuwa viongozi waliokosa shukurani baada ya kulelewa na CCM.

“Mlinitaka nije siji ng'o! Halafu Lowassa na Sumaye watu wa ajabu sana, wanadai CCM haijafanya kitu wakati wao walikuwa mawaziri wakuu,” alisema Mudhihir.

Alisema wakazi wa Mchinga wamepiga hatua na alitolea mfano wa kuongezeka kwa shule za msingi, usafiri na miundombinu na kuwaasa kumchagua Dk. Magufuli na wagombea wengine wa CCM.