POLISI YATOA ONYO KALI

JESHI  la Polisi limewaonya vijana wanaoshawishiwa kufanya fujo kwa kigezo cha kucheleweshwa matokeo, kuacha kufanya hivyo kwa kuwa ni uvunjifu wa amani na sheria za nchi.

Pia, limesema limepata taarifa kuwa kundi la vijana limetoka mikoa ya jirani kuja Dar es Salaam, kufanya vurugu katika kipindi hiki cha uchaguzi  na kuonya kuwa watambue watakutana na mkono wa sheria.

Msimamo wa Polisi ulitolewa jana na Kamishina wa Polisi wa Operesheni na Mafunzo, Paulo Chagonja, katika mkutano wake na waandishi wa habari jijini Dar es Salaam.

Chagonja alisema licha ya kuwepo kwa vurugu kwenye maeneo mbalimbali, lakini Polisi inawapongeza wananchi kwa kushiriki kwenye uchaguzi mkuu kwa amani na utulivu mkubwa.

Alisema wanawapongeza sana wananchi, lakini pia wanawatahadharisha vijana kuacha fujo kwa kigezo cha kucheleweshwa matokeo, jambo ambalo halikubaliki hata kidogo na Polisi.

"Tunawaonya vijana wanaoletwa na viongozi wa vyama vya siasa kutoka mikoa ya jirani kuja Dar es Salaam kufanya fujo. Tunawaonya na tunawataka vijana mbalimbali watulie na wafuate sheria," alisema.

Aliongeza kuwa vijana wote waliokamatwa wakifanya fujo sehemu mbalimbali, watafikishwa mahakamani kwa mujibu wa sheria za nchi na kuwataka kila mtu kutii sheria bila shurti.