HUJUMA ZANZIBAR

NA MWANDISHI WETU

WAKATI wananchi wa Zanzibar wakisubiri kwa hamu kutangazwa kwa tarehe ya marudio ya uchaguzi, hujuma mbalimbali zimeanza kufanywa ili kuhakikisha uchaguzi huo unavurugika.

Baadhi ya wanasiasa wakiwemo wafanyabiashara wakubwa, wamekuwa wakishiriki kuandaa na kutekeleza hujuma hizo kwa maslahi binafsi na uchu wa madaraka.

Habari za kuaminika zinasema kuwa, miongoni mwa hujuma hizo ni pamoja na ile ya kuvishawishi baadhi ya vyama kususia uchaguzi huo, wakilenga kuiaminisha jumuia ya kimataifa kuwa hali si shwari.

Mikakati ya hujuma hizo imedaiwa kusukwa na wanasiasa (majina na vyama vyao yanahifadhiwa), ambapo tayari baadhi ya viongozi wa vyama kadhaa wamewezeshwa kifedha ili kukubaliana na mpango huo haramu.

“Wapo watu wachache wanapenda kuona Zanzibar ikiwa kwenye mgogoro kwa maslahi yao binafsi, ikiwemo kuendelea kusikika kisiasa licha ya kuwa wamechoka. Hivi sasa wanaendelea na utekelezaji wa hujuma kuhakikisha uchaguzi unakwama kwa kuvishawishi baadhi ya vyama kususia uchaguzi.

“Kuna taarifa za uhakika kuwa baadhi ya viongozi wa vyama wamepewa mgawo ili kufanikisha mpango huo haramu.

“Lakini kamwe hawatafanikiwa kwa sababu wananchi wako pamoja na wanajiandaa kushiriki uchaguzi wa marudio kwa amani na utulivu,” kilisema chanzo chetu.

Chanzo hicho kimesema lengo la mtandao huo ni kuhakikisha kunazuka vurugu pindi tarehe ya uchaguzi itakapotangazwa na kuaminisha umma kuwa mgombea wa chama kimoja cha upinzani, anaungwa mkono.

“Kuna chama kinataka kionekana kinaungwa mkono na vyama vingi vya kisiasa nchini ili vurugu zikianza, kipate huruma na kutetewa na jumuia za kimataifa,” kiliongeza chanzo chetu.

Hata hivyo, kutokana na mikakati ya hujuma hizo, Serikali ya Mapinduzi ya Zanzibar chini ya Dk. Ali Mohammed Shein, imewahakikishia wananchi kuwa suala la amani na utulivu halina mjadala.

Pia, imesema imejipanga kikamilifu kuudhibiti mtandao huo unaojipanga kuvuruga uchaguzi na kuwatoa hofu wananchi, wasisite kujitokeza kushiriki uchaguzi pindi Tume ya Uchaguzi Zanzibar (ZEC) itakapotangaza tarehe rasmi.

Kutokana na kubainika kwa mkakati huo, Chama cha Alliance for Democratic Change (ADC), kimeonya kuwa kamwe hakiko tayari kuhongwa wala kususia marudio ya uchaguzi.

Badala yake ADC kimeitaka ZEC kuharakisha kutangaza tarehe ya marudio ya uchaguzi ili kijiandae kushiriki na kitakuwa mstari wa mbele kuhamasisha wananchi kujitokeza kwa wingi kupigakura.

Kimesema wananchi wanapenda haki, amani na utulivu na kwamba, watatumia sanduku la kura kuwaweka viongozi madarakani na kamwe hakiwezi kuwa sehemu ya kuvuruga amani.

Kimesema hakuna sehemu ya kupata haki ya matokeo ila kupitia ZEC, hivyo wanaosusa ama wanaojipanga kususia kamwe hawajitambui.

Mwenyekiti wa Bodi ya Wadhamini ya ADC, Ayubu Kimangale, alisema hakuna sehemu ya kupata haki ila ni ZEC, kwa kuwa ndio yenye mamlaka ya matokeo kisheria.

“Sisi tunahimiza ZEC itangaze siku ya uchaguzi ili tujiandae kikamilifu, vyama vinavyosusa havijitambui,” alisisitiza.

Alisema kama kuna vyama vimechukua pesa kususia uchaguzi, ADC haitachukua pesa na kitashiriki uchaguzi ipasavyo.

Katika kujipanga kisiasa zaidi, chama hicho kimeteua Kamati ya Uendeshaji Shughuli za Chama, itakayoongozwa na Jumapili Kaliki, Makamu Mwenyekiti wake ni Khamisi Mohamed Kombo, Katibu wa kamati ni Zamila Suleiman Mrisho na Naibu Katibu wa kamati hiyo ni Mvita Mangupili.

Wajumbe wa kamati ni Ibrahin Hassan Pogoro, Rose Swai na Mtumwa Faiz Sadiki.

Kimangale alisema sababu ya bodi ya wadhamini ya chama kuchukua mamlaka ya uendeshaji wa chama ni kutokana na Kamati ya Utendaji ya Taifa, kushindwa kukipatia chama hicho ushindi katika uchaguzi mkuu uliopita.

Alisema chama hicho kimebaini hujuma nyingi zilizofanywa katika uchaguzi, ikiwemo kuhusika na uandikaji wa barua ya kutokuwa na mawakala katika uchaguzi mkuu na kughushi sahihi ya mwenyekiti na makamu mwenyekiti wa bodi ya wadhamini pamoja na kutunga takwimu za fedha ambazo hazikuidhinishwa na kikao.

Alisema bodi hiyo ya wadhamini imewataka viongozi wote wa kanda, mikoa, wilaya, kata, matawi na wanachama, kushirikiana na kamati iliyoteuliwa katika kukiimarisha chama.

Kwa upande wake, Waziri wa Nchi, Ofisi ya Makamu wa Pili wa Rais, Mohamed Aboud Mohamed, alikiri kusikia mipango ya hujuma hizo, ikiwemo baadhi ya vyama kuhongwa na kwamba mamlaka husika inazifanyia kazi kikamilifu.

Alisema serikali inaamini kila chama kitashiriki katika uchaguzi huo na imejipanga kuhakikisha unakuwa huru na haki kwa vyama vyote hivyo, wananchi wasitishwe.

Aboud alisema serikali haipo tayari kuona amani na utulivu vinatoweka kwa sababu ya uchaguzi.

Desemba 28, mwaka jana, Mwenyekiti wa ZEC, Jecha Salim Jecha, alitangaza kufuta matokeo ya uchaguzi wa Zanzibar, baada ya kubainika kuwepo kwa dosari.

Dosari zilizobainika ni kwa mgombea urais kupitia CUF, Seif Sharif Hamad, kujitangazia matokeo pamoja na idadi ya kura kuzidi idadi ya wapiga kura.