MAGUFULI MOTO, LAKE OIL YAKAMULIWA BILIONI 8.5/-, VIGOGO TRA, NIDA, TRL MIKONONI MWA TAKUKURU

WAKATI Rais Dk. John Magufuli akiendeleza kasi ya utumbuaji majipu, Taasisi ya Kuzuia na Kupambana na Rushwa (TAKUKURU), imecharuka kwa kuwashushia rungu vigogo na kampuni zilizohusika kwenye kashfa za ukwepaji kodi na ubadhirifu wa mali za umma.

Kampuni na vigogo waliokumbwa na rungu hilo ni Kampuni ya Mafuta ya Lake Oil, vigogo waliohusika kwenye sakata la Benki ya Stanbic, Shirika Hodhi la Reli (RAHACO) na kashfa ya mabehewa mabovu ya Kampuni ya Reli Tanzania (TRL).

Pia, TAKUKURU imeanza uchunguzi kwa vigogo wa Mamlaka ya Vitambulisho vya Taifa (NIDA), kufuatia matumizi makubwa ya kisasi cha shilingi bilioni 179.6, ambazo licha ya fedha hizo kutumika kwenye mradi wa vitambulisho vya taifa, bado idadi kubwa ya wananchi hawajapata vitambulisho hivyo.

Hatua hiyo ni muendelezo wa TAKUKURU wa kupambana na rushwa, ambapo kuanzia sasa taasisi hiyo itanza uchunguzi mara moja kwa watumishi wote wa serikali watakaosimamishwa kazi kwa tuhuma za rushwa.

Akizungumza na waandishi wa habari Dar es Salaam, jana, Kaimu Mkurugenzi Mkuu wa TAKUKURU, Valentino Mlowola, ametoa onyo kwa maofisa maduhuli, wafanyabiashara, watoa huduma kwa umma pamoja na wanachi kuacha kujihusisha na vitendo vya rushwa.

“Watu nataka wafahamu kuwa, ile tabia ya kutoa na kupokea rushwa imefikia kikomo, hatutajali nafasi ya mtu wala hadhi yake kwenye jamii,” alisisitiza Mlolowa.

KASHFA YA LAKE OIL

Kampuni hiyo ilidanganya kusafirisha mafuta ya petrol  lita 17,461,111.58, kwenda Jamhuri ya Kidemokrasi ya Congo (DRC).

Kwa mujibu wa Mlowola, Lake Oil badala ya kusafirisha mafuta hayo kwenda DRC, iliyauza kwenye soko la ndani na kuisababishia serikali hasara ya sh. bilioni 8.5.

Baada ya TAKUKURU kukamilisha uchunguzi, kampuni hiyo pamoja na washirika wake walipewa miezi miwili kurejesha fedha hizo serikalini na endapo itashindwa kufanya hivyo, watawafikisha mahakamani.

Kwa mujibu wa kamishna huyo, Lake Oil imeridhia kuilipa serikali fedha hizo, ambazo serikali ililipa hasara kufuatia kampuni hiyo kukwepa kodi.

SAKATA LA STANBIC

TAKUKURU imendeleza moto kwenye sakata hilo linalohusu malipo ya Dola za Marekani milioni sita kwa kampuni ya Enterprise Growth Market Advisor (EGMA).

Kampuni hiyo ililipwa fedha hizo kwa madai ya malipo kwa kuisaidia serikali kupata mkopo wa Dola za Marekani milioni 600.

Kampuni   hiyo  ilihusika katika uwezeshaji wa upatikanaji wa mkopo wa serikali ya Tanzania,  ambao Standar Bank Plc (ambayo kwa sasa inajulikana kama ICBC Standard  Bank) na Benki ya Stanbic kwa pamoja  walikuwa wawezeshaji wakuu (Lead Arranger).

Baada ya kumalizika kwa uchunguzi wa serikali, ilibainika kuwa malipo ya kampuni ya EGMA yalikuwa yamefanyika kinyume cha taratibu za kibenki na yalihusisha uongozi wa Benki ya Stanbic.

Fedha hizo zilitakatishwa na baadhi ya watumishi wa umma, wakishirikiana na baadhi ya watu kutoka sekta binafsi huku wakifahamu kuwa fedha hizo wamezipata kwa njia haramu.

Mlolowa, ambaye awali alikuwa Kamishna wa Polisi anayehusika na mapambano dhidi ya ugaidi, alibainisha kuwa, upelelezi huo umefikia kwenye hatua nzuri na wahusika watafikishwa mahakamani kwa mujibu wa sheria.

“Watuhumiwa wote bila kujali hadhi au nafasi yao na taasisi zinazohusika, watachukuliwa hatua za kisheria,” alisema.

Tayari Benki Kuu ya Tanzania (BOT), imeitoza faini ya sh. bilioni tatu, Benki ya Stanbic, ikiwa ni moja ya hatua zilizochukuliwa kutokana na kushiriki katika sakata hilo.

Aidha, BOT imeitaka benki hiyo kuwasilisha utetezi wake katika kipindi cha siku 20, ambacho kitaisha baadaye mwezi huu.

Desemba 2, mwaka jana, serikali ilimtaka kiongozi wa Kampuni ya EGMA, Harry Kitilya, ambaye alikuwa Kamishna Mkuu wa Mamlaka ya Mapato Tanzania (TRA), kutoa ushirikiano kwa vyombo vya serikali kuhusu fedha hizo.

Mbali na Kitilya, kampuni hiyo inamilikiwa na Fartern Mboya, inadaiwa kufanya udanganyifu wa ada ya mkopo wa fedha hizo, ambazo zilipewa serikali na benki ya Standard ya Uingereza.

Kampuni hiyo ililipwa dola milioni sita, sawa na sh. bilioni 15, za Tanzania, kwa ajili ya malipo ya hati fungani wakati serikali haikupaswa kulipa.

JIPU LA RAHCO

Jipu hilo, limeshatumbuliwa na Rais Dk. Magufuli kwa kutengua uteuzi na kumsimamisha kazi, aliyekuwa Mkurugenzi Mkuu wa shirika hilo, Mhandisi Benhadard Tito.

Mhandisi huyo alisimamishwa kazi kutokana na tuhuma mbalimbali zilizokuwa zikimkabili, ambazo TAKUKURU imeanza kuzichunguza.

Uchunguzi huo unahusisha ukiukwaji wa sheria na taratibu za kuwapata wazabuni kwenye ujenzi wa reli ya kisasa (Standard Gauge), uliokuwa ukisimamiwa na RAHCO.

Kamishna Mlowola alisema baadhi ya watuhumiwa kwenye kesi hiyo wameshakamatwa, akiwemo raia wa Kenya, Kanji Muhando. aliyekuwa kiungo muhimu katika mchakato wa kumpata mzabuni.

UFISADI WA MABEHEWA TRL

Kwa mujibu wa Mlowola, shauri hilo linahusu ukiukwaji wa Sheria ya Manunuzi ya Umma pamoja na kanuni zake, katika ununuzi wa mabehewa 25 ya kokoto kutoka kampuni ya Hindusthan Engineering and Industries Limited.

Alisema shauri hilo limeshakamilika uchunguzi wake na limefikishwa kwa Mkurugenzi wa Mashitaka ili kuomba kibali cha kuwafikisha mahakamani watuhumiwa waliohusika na vitendo hivyo vya rushwa.

Kwa mujibu wa ripoti ya awali kuhusu uchunguzi wa mchakato wa ununuzi wa mabehewa mabovu uliofanywa na TRL, umebaini kuwa menejimenti ya kampuni hiyo haikuwa makini kushughulikia maombi ya kuongezewa muda, yaliyowasilishwa na Kampuni ya Hindusthan Engineering and Industries Limited.
Uchunguzi ulibaini kuwa, mkataba wa zabuni namba PA/113/2012-13/ME/G/OE/014 ya ununuzi wa mabehewa 274, ya mizigo, Kampuni ya Hindusthan Engineering and Industries Limited, iliwasilisha maombi ya kuongezewa muda Juni 13, 2014 na kurudia tena ombi hilo Septemba 12, 2014, lakini menejimenti ya TRL ilidaiwa kupuuza kwa kutojibu maombi hayo.
Zabuni nyingine inayochunguzwa ni namba PA/113/2012-13/ME/G/OE/013 iliyosainiwa kati ya TRL na kampuni hiyo Machi 21, 2013, inayohusu ununuzi wa mabehewa 25 ya mizigo yenye thamani ya Dola za Marekani 2,561,187.50.
Taarifa ya uchunguzi wa awali kutoka Mamlaka ya Udhibiti wa Ununuzi wa Umma (PPRA), inaeleza kwamba, zabuni hiyo iligawanywa katika makundi matatu, ikiwa ni pamoja na ununuzi wa mabehewa 174 ya mizigo, mabehewa 50 ya kusafirisha mafuta ya petroli na mengine 50 kwa ajili ya mizigo.