TRL KUHAMISHIA HUDUMA ZAKE DODOMA

UONGOZI wa Kampuni ya Reli Tanzania (TRL), umetangaza kuhamishia huduma zake za usafirishaji  mjini Dodoma, kuanzia keshokutwa.

Taarifa iliyotolewa na Kaimu Mkurugenzi Mtendaji wa TRL, Mhandisi Elias Mshana, imesema huduma hizo zinahamishiwa kwa muda mjini Dodoma, hadi pale kazi ya ukarabati ya tuta la reli, litakapotengemaa kati ya stesheni za Kidete na Kilosa mkoani Morogoro.

Hata hivyo, alisema kutokana na mafuriko ya eneo hilo, bado haijajulikana tuta hilo litatengemaa lini.

Alisema uongozi umeamua kwa sasa kusitisha zoezi la ukarabati ili kuokoa rasilimali zinazotumika katika ukarabatiwa wa eneo hilo.

Hata hivyo, alisema kazi ya kuzuia uharibifu zaidi dhidi ya tuta la reli inaendelea kulingana na hali inavyojitokeza.

 Wakati huo huo, uongozi wa TRL umeandaa utaratibu na wamiliki wa mabasi, kuwasafirisha abiria wake watakaotumia huduma zake zinazoanzia Jumanne na Ijumaa, mjini Dodoma, wakitokea Dar es Salaam.

TRL imesema maombi ya huduma za kusafirisha shehena yataanza kupokelewa keshokutwa, lakini treni ya kwanza ya abiria imepangwa kuondoka Dodoma, Februari 2, mwaka huu, saa  mbili usiku.

Kwa mujibu wa taarifa ya TRL, wananchi wanaweza kuanza kukata tiketi za safari ya Jumanne, wakati wowote baada ya kusoma taarifa hii katika stesheni za reli ya kati  zilizo karibu  yao.

TRL imesema mabadiliko hayo ya usafiri yataongeza gharama, lakini ni muhimu kwa huduma za usafirishaji ziendelee ili kuwasaidia Watanzania  kiuchumi na kijamii kadri inavyowezekana.

Miaka ya 1998 na 2010, huduma za reli zilihamishiwa Dodoma kwa muda baada ya eneo kati ya Gulwe, Godegode mkoani  Dodoma, Kidete na Kilosa mkoani Morogoro,  kukumbwa na mafuriko makubwa na kuisambaratisha njia ya reli.