MHANDISI SAMBARI ATEULIWA KUWA MKURUGENZI MKUU TAA

WAZIRI wa Ujenzi, Uchukuzi na Mawasiliano, Profesa Makame Mbarawa, amemteua Mhandisi George Sambali, kuwa Kaimu Mkurugenzi Mkuu wa Mamlaka ya Viwanja vya Ndege Tanzania (TAA).

Mhandisi Sambali, ambaye alikuwa Mkurugenzi wa Kiwanja cha Ndege cha Kimataifa cha Julius Nyerere (JNIA), anakaimu nafasi hiyo kutokana na kifo cha Mhandisi Suleiman Suleiman, aliyefariki Januari 18, mwaka huu.

Katibu Mkuu wa wizara hiyo, anayeshughulikia sekta ya uchukuzi,  Dk. Leonard Chamuliho, alisema uteuzi huo ulianzia Januari 20, mwaka huu.

Mhandisi Sambali alizaliwa mwaka 1965, mkoani Tabora na ana shahada ya uzamili ya sayansi ya uhandisi, uchukuzi na barabara, aliyoipata mwaka 2001, nchini Uholanzi.

Mhandisi Sambali alihitimu shahada ya kwanza ya Sayansi ya Uhandisi  Ujenzi katika Chuo Kikuu cha Dar es Salaam (UDSM) mwaka 1995.

Pia, amepata mafunzo na kozi mbalimbali za masuala ya anga kutoka katika vyuo vya hapa nchini na nje ya nchi, ikiwemo Stashahada ya Uongozi wa Viwanja vya Ndege mwaka 2014 huko Montreal, Canada.

Mwaka 2015, alitunukiwa Stashahada ya Wataalamu wa Kimataifa wa Viwanja vya ndege chini ya AMPAP nchini Canada.

Mhandisi Sambali aliajiriwa na TAA mwaka 2001, kama Meneja Mipango, Usanifu na Uthamini na mwaka 2012, aliteuliwa kuwa Kaimu Mkurugenzi wa Huduma za Uhandisi na Ufundi.

Mwaka 2013, Mhandisi Sambali aliteuliwa kuwa Mshauri Maalumu wa Mkurugenzi Mkuu kabla ya mwishoni mwa mwaka jana, kuteuliwa tena kuwa Kaimu Mkurugenzi wa Kiwanja cha Ndege cha JNIA.