TUTAFUNGUA OFISI ZA UBALOZI ISRAEL-JPM

RAIS Dk. John Magufuli, amesema serikali ya Tanzania itafungua ubalozi wake nchini Israel muda wowote ili kuendeleza ushirikiano na mahusiano baina ya nchi hizo.

Alisema hayo alipokutana na Balozi wa Israel hapa nchini, Yahel Vilan, Ikulu jijini Dar es Salaam, ambako amemhakikishia kuendeleza ushirikiano na kuimarisha mahusiano yenye manufaa kwa nchi hizo mbili.

Alisema anatambua mahusiano mazuri yaliyopo kati ya Tanzania na Israel na umuhimu wake kwa ustawi wa nchi hizo na kwamba, anataka yaimarishwe zaidi katika kipindi chote cha uongozi wake.

Kwa upande wake, Balozi Yahel, alimpongeza Rais Magufuli kwa kazi kubwa na nzuri inayoendelea kufanywa na uongozi wake katika kipindi kifupi cha miezi miwili tangu aingie madarakani.

Alisema kuwa Israel ina kila sababu ya kuendelea kushirikiana na Tanzania na ipo tayari kuimarisha zaidi mahusiano ya kidiplomasia kwa manufaa ya pande zote katika nyanja zote za maendeleo.

Balozi huyo alitaja baadhi ya maeneo ambayo serikali yake inakusudia kushirikiana na Tanzania kiuchumi kuwa ni pamoja na kilimo, maji, ufugaji wa nyuki, sayansi na teknolojia.

Pamoja na hilo, alibainisha kuwa Israel imewaalika Jumuia ya Wafanyabiashara wa Tanzania, kushiriki katika kongamano la biashara kati ya Tanzania na Israel.

Alisema kongamano hilo linatarajiwa kufanyika mjini Tel Aviv, nchini Israel, Septemba, mwaka huu.

Pia, aliahidi kufikisha ujumbe wa Rais Magufuli kwa Waziri Mkuu wa Israel, Benjamin Netanyahu pamoja na kuahidi kuanzisha haraka ofisi ya kutoa huduma ya vibali vya kusafiria hapa nchini kwenda Israel (visa).