UKAWA WAPANGA MKAKATI WA KISIASA ZANZIBAR

MWENYEKITI Mwenza wa Umoja wa Katiba ya Wananchi (UKAWA), Freeman Mbowe, amesema kuna mkakati mbadala kuhusu mgogoro wa kisiasa Zanzibar, ambao utatangazwa baada ya kikao cha Baraza Kuu la chama cha CUF.

Mbowe alisema hayo jana, Bungeni mjini hapa na kuongeza kuwa, mkakati huo utatangazwa Januari 28, mwaka huu, baada ya kikao cha kamati tendaji cha baraza hilo kitakachokutana Januari 27, mwaka huu.

Alisema wameamua kuja na mkakati huo baada ya kufanya mazungumzo ya mashauriano kuhusiana na hali ya kisiasa ya Zanzibar, baada ya kupokea taarifa ya mazungumzo ya awali yaliyofanyika kati ya Maalim Seif Sharif Hamad na serikali, ambayo hayakufikiwa muafaka.

Mbowe alisema: “Sisi tutaunga mkono msimamo wa baraza hilo na kikao hicho ndicho kitakachotoa muelekeo wa siasa gani tufanye, kwa sababu tumeshaona serikali ya CCM na wenye maamuzi wanataka kutuyumbisha, hivyo ni vyema wakatambua kuwa amani ya taifa haiwezi kudumu kama haki haitazingatiwa.”

Alisema haki haiwezi kupatikana kwa vitisho bali maamuzi ya wananchi yatakapoheshimiwa na kwamba Rais John Magufuli hapaswi kujitoa kwa namna yoyote kwa sababu ndiye amiri jeshi mkuu na majeshi.

Mnadhimu Mkuu wa kambi ya upinzani Bungeni, Tundu Lissu alisema hawana mpango wa kulipeleka suala hilo mahakamani kwani linapaswa kumalizwa kisiasa.

Alisema suala la mgogoro wowote unaohusisha matokeo ya urais, kisheria hauruhusiwi kupingwa katika mahakama yoyote ile kwa mujibu wa katiba.

Lissu alisema njia pekee iliyobaki ya kumaliza mgogoro huo ni ya kisiasa na kwamba, matokeo ya uchaguzi wa Zanzibar, yalifutwa na mtu ambaye hamna mamlaka ya kikatiba ya kufanya hivyo.

Mbunge wa Jimbo la Malindi, Ali Salehe, alisema iwapo watarudia ama kutorudia uchaguzi, CUF haiwezi kujimaliza kisiasa. Alisema Rais Magufuli anayo nafasi kubwa ya kuingilia kati mgogoro huo.