VIGOGO KITANZINI KWA KUTAFUNA MAMILIONI

VIGOGO wa Halmashauri ya Mji wa Kahama mkoani Shinyanga, wamengia kitanzini kutokana na upotevu wa fedha zinazotolewa na kampuni ya ACACIA inayoendesha mgodi wa Buzwagi.

Fedha hizo ni zile zinazotolewa kwa halmashauri kila baada ya robo ya mwaka kwa ajili ya kuendeleza miradi ya maendeleo.

Mwenyekiti wa Halmashauri ya Mji wa Kahama, Abel Shija, alisema jana kuwa, hatua hiyo inatokana na taarifa ya uchunguzi iliyotolewa na Mkuu wa Wilaya, Vita Kawawa.

Alisema taarifa hiyo ilililazimu Baraza la Madiwani kukutana kuijadili pamoja na kuchukua hatua dhidi ya watendaji na watumishi wanaohusika na kashfa hiyo.

Alisema watumishi watano wamesimamishwa kazi, ambao ni Wilfred Kishere (Mweka Hazina),  Alex Mroso (Mhasibu), Michael Nzingula (Mwenyekiti wa Bodi ya Wadhamini) na Katibu wake, Joseph Maziku  pamoja na Elius Mollel, ambaye ni Ofisa Biashara.

Hata hivyo, alisema kuna watumishi wengine watano wanaoguswa na kashfa hiyo na kwamba, wataendelea na kazi wakati uchunguzi dhidi yao ukiendelea.

Aliwataja watumishi hao kuwa ni Anastazia Manumbu, Joakim Henjewele, Kulwa S.N, Neema Lema na Angela Clavel.

Aliongeza kuwa tayari aliyekuwa Mkurugenzi Mtendaji wa Halmashauri hiyo, Felix Kimaryo na Msumba Msoka, aliyekuwa Mhandisi, wameshahamishwa vituo vya kazi.

Hata hivyo, alisema anaamini kuhamishwa kwa watendaji hao kumelenga kuwalinda ili wasijibu tuhuma zinazowakabili na kwamba, watapambana kuhakikisha wanarudi kuzijibu.

“Tuna imani idara ya utumishi itawarejesha hapa kujibu tuhuma zinazowakabili. Taasisi ya Kuzuia na Kupambana na Rushwa (TAKUKURU) inaendelea na uchunguzi zaidi kuhusiana na hili,” alisema.