WAZAZI CCM KUIKABILI CUF

UMOJA wa Wazazi wa CCM, umepitisha azimio la kwenda Zanzibar ili pamoja na mambo mengine, kukikabili chama cha CUF ili kukizuia kwa mara nyingine tena katika harakati zake za kutaka kutawala visiwani humo. 

Uamuzi huo ni moja kati ya maazimio yaliyopitishwa na Baraza Kuu la Taifa la Umoja huo juzi, Jumapili, katika kikao chake cha siku moja kilichofanyika kwenye ukumbi wa Halmashauri Kuu ya Taifa (NEC), ulioko katika Makao Makuu ya Chama, Barabara ya Nyerere mjini hapa. 

Akizungumza na waandishi wa habari muda mfupi baada ya kikao hicho kumalizika, Mwenyekiti wa Umoja wa Wazazi wa CCM, Alhaji Abdallah Bulembo, alisema katika kikao hicho cha kawaida, Baraza Kuu liliamua kupeleka timu maalumu  Unguja na Pemba, lakini hakutaja majina ya viongozi wanaotarajiwa kupiga kambi katika visiwa hivyo. 

Hata hivyo, Alhaji Bulembo aliweka angalizo kuwa timu hiyo ya viongozi wa ngazi za juu ndani ya jumuia hiyo, watakwenda huko baada ya Tume ya Uchaguzi Zanzibar (ZEC), kutangaza tarehe ya kurudiwa kwa uchaguzi mkuu wa Rais wa Zanzibar, Wajumbe wa Baraza la Wawakilishi na Madiwani. 

Jumatano, Oktoba 28, mwaka jana, ikiwa ni siku tatu tu baada ya kufanyika kwa uchaguzi mkuu uliopita, Mwenyekiti wa ZEC, Jecha Salim Jecha, kwa niaba ya tume hiyo, alitangaza kufutwa kwa uchaguzi huo, hatua ambayo hata hivyo imekuwa ikipingwa na wanachama na viongozi wa CUF, na pia wamekuwa wakisisitiza kuwa hawatashiriki katika uchaguzi wa marudio pindi ukitangazwa kufanyika. 

Pamoja na Alhaji Bulembo kutotaja majina ya viongozi watakaokwenda kupiga kambi Unguja na Pemba kwa ajili hiyo, uwezekano mkubwa ni kuwa timu hiyo itaundwa na wajumbe wa Kamati ya Utekelezaji ya Taifa, baadhi ya wajumbe wa Baraza Kuu na kuongozwa ama na yeye mwenyewe au Katibu Mkuu wa Jumuia hiyo, Mohammed Seif Othman. 

Akizungumzia masuala mengine, alisema Baraza Kuu la Taifa katika kikao chake hicho, lilifanya uteuzi wa mwisho wa wanachama 12 wa jumuia hiyo, ambao wameomba kugombea nafasi nne zilizo wazi ndani ya chombo hicho. 

Alisema sababu ya nafasi hizo kuwa wazi ni wajumbe wa Baraza Kuu la Taifa waliokuwa wakiwakilisha mikoa ya Pwani, Njombe, Kagera na Kigoma, kuhamia katika vyama vitatu vya upinzani vya CUF, Chadema na ACT– Wazalendo, mwaka jana. 

“Hivyo tumeteua wagombea watatu katika kila mkoa ili wakachuane kutafuta mshindi atakayeingia katika Baraza Kuu (la Taifa) kwa ajili ya kujaza nafasi hizo nne,” alisema Alhaji Bulembo, ambaye pia ni Mjumbe wa Kamati Kuu ya CCM, kwa mujibu wa Katiba ya Chama hicho ya mwaka 1977, toleo la 2012 inayotumika sasa. 

Akizungumzia hatua nyingine, alisema jumuia hiyo inakusudia kujenga jengo la kitegauchumi lenye urefu wa ghorofa 14, katika eneo la Mchikichini, Ilala jijini Dar es Salaam, ambalo litagharimu sh. bilioni 13.5. 

Aidha, Alhaji Bulembo aliwaambia waandishi hao wa habari kwamba, wakuu wa shule tatu za sekondari za Mwembetogwa, iliyoko mjini Iringa, Tegeta na Tabata za jijini Dar es Salaam, wamefikishwa mahakamani ili kujibu mashitaka ya ubadhirifu wa mamilioni ya fedha za ada kutoka kwa wanafunzi. 

Sambamba na wakuu wa shule hizo, ambao hata hivyo hakutaka kuwataja majina yao, wengine wanaoshitakiwa nao ni pamoja na wahasibu na maofisa ununuzi. 

Alisema ubadhirifu huo umetokana na fedha za manunuzi ya mahitaji ya wanafunzi, ikiwemo chakula, ambapo kwa kushirikiana na mkuu wa shule, maofisa ugavi na wahasibu wametumia mwanya huo kuiba fedha hizo.

“Katika hatua ya kuwafikisha mahakamani sio wakuu wa shule pekee ndo waliofikishwa mahakamani, bali watu wote waliohusika katika wizi huo,”alisema.

Alizitaja jumla ya fedha zilizopotea kuwa ni zaidi ya sh. bilioni mbili, ambapo katika shule ya sekondari Tegata ni milioni 690, Tabata milioni 470 na Mwembetogwa ni sh. milioni 920.

Alisema wapo walimu wakuu wa shule mbili, wanaotarajiwa kufikishwa mahakamani wakati wowote kuanzia sasa huku akigoma kuwataja mapema ili wasije wakawatoroka.

“Lakini pia tunakusudia kuvunja bodi za shule zote zilizokithiri kwa ubadhirifu wa fedha za shule zetu”, alisema na kuongeza kwamba, Baraza Kuu la Taifa la Jumuia hiyo pia limewakemea na kuwaonya viongozi wake wanaojaribu kuwakingia ‘kifua’ wahusika wa tuhuma hizo na kuwataka waache tabia hiyo mara moja.

Wiki iliyopita, Mwenyekiti wa Umoja wa Wazazi wa Mkoa wa Mbeya, Fatuma Kasenga, alitoa taarifa iliyoonekana kuukingia ‘kifua’ ubadhirifu huo wa mamilioni ya fedha za shule zinazomilikiwa na jumuia hiyo mkoani kwake, hivyo hatua ya Baraza Kuu la Taifa ya kutoa onyo hilo inaweza kuwa mwiba wa kisiasa kwake na viongozi wenzake wa mkoa huo.