MPASUKO WANUKIA CUF

CHAMA cha CUF kimeingia kwenye mpasuko kutokana na kuibuka kwa makundi yanayokinzana ndani ya chama hicho.

Imeelezwa kuwa kutokana na kuzuka kwa makundi hayo, wanachama wamedhamiria kurejeshwa kwenye uongozi, aliyekuwa Mwenyekiti wa chama hicho, Profesa Ibrahim Lipumba.

Habari za kuaminika kutoka ndani ya chama hicho zimeeleza kuwa, ili kufanikisha mpango huo,  wanachama, wapenzi na mashabiki wametakiwa kuanzisha vuguvugu hadi Profesa Lipumba arudishwe kukiongaza chama hicho.

Wakizungumza katika kongamano la CUF,  lililofanyika jana, Manzese, Dar es Salaam, baadhi ya viongozi na wanachama walisema wanamhitaji Profesa Lipumba arudi ndani ya chama hicho.

Rashid Athumani, mwanachama kutoka Mtwara, aliwataka wanachama, wapenzi na mashabiki kuanzisha vuguvugu hadi Profesa Lipumba arudi kwenye chama hicho.

Alisema wanachama wanamhitaji kiongozi huyo na kwamba, aliamua kukaa pembeni baada ya kuona mapungufu kwenye Umoja wa Katiba ya Wananchi (UKAWA).

Aliongeza kuwa ndani ya UKAWA, kulikuwa na mapungufu, hivyo Profesa Lipumba aliamua kujiweka pembeni.

Mjumbe wa Baraza Kuu la CUF, Masoud Mhina, ambaye pia ni Diwani wa Kata ya Mabanda mkoani Tanga, alisema wakati umefika kwa chama hicho kuwa na viongozi wenye uwezo wa kuongoza ndani na nje ya nchi.

Alisema uchaguzi umemalizika, hivyo ni wakati sasa viongozi na wanachama kukijenga chama kwa ajili ya uchaguzi wa serikali za mitaa na uchaguzi mkuu wa mwaka 2020.

“Uchaguzi umemalizika, tuliingia kwenye misingi ya UKAWA, ingawa kuna changamoto zake, hivyo ni vyema tukajenga chama chetu,” alisema.

Ashura Mustapher, ambaye ni Mjumbe wa Baraza Kuu la CUF, aliwataka wanachama kujiepusha na makundi yenye lengo la kukigawa chama hicho.

Alisema makundi ndani ya chama hayaepukiki, lakini yasiyokuwa na tija ni vyema yakaepukwa.

Mkurugenzi wa Ulinzi na Usalama wa CUF, Mustapher Wandwi, aliwataka wanachama wasikubali kutengana na kwamba, iwapo watatengana, wanaweza kusababisha mpasuko mkubwa.

“Ninawaomba wanachama wenzangu tujiepushe kujiingiza kwenye makundi kwani yanaweza kukiingiza chama kwenye matatizo,” alisema.

Alisema iwapo wanachama wanataka kufanya mabadiliko ya uongozi, hakuna tatizo, lakini wanapaswa kuchagua kiongozi ambaye wanamfahamu.

Wandwi aliwataka wanachama wasikubali kubaguliwa kutokana na suala la uongozi kwani viongozi wa ngazi za juu wa chama hicho ni kitu kimoja.

“Suala la uongozi msikubali kuchanganywa kwani Maalimu Seif, Lipumba na Duni (Juma) ni kitu kimoja na siku zote wako pamoja,” alisisitiza.

Alisema Profesa Lipumba alijivua uongozi, lakini hajatoka ndani ya CUF na kwamba, hadi sasa anashiriki vikao vya chama hicho.

Aliwataka wanachama wasikubali kutengana kwani wakifanya hivyo, watagawanyika na kusababisha mpasuko.

Mmoja wa wanachama, ambaye hakufahamika jina lake, alisema ndani ya chama hicho kuna uonevu mkubwa na kwamba viongozi wanawakandamiza wanachama wa chini.

Alisema katika uchaguzi uliopita, waliingia kwenye uchaguzi bila kuwa na bendera.

Mwanachama huyo alisema ni vyema uonevu huo ukaondolewa ndani ya chama hicho ili kukiacha kikiwa salama.

“Ndani ya chama chetu kuna makundi, ambayo si mazuri na yanakiweka chama kwenye wakati mgumu,” alisema.