CCM YAIBOMOA CHADEMA MOROGORO

ZIARA ya  Naibu Katibu wa Oganaizesheni na Siasa  ya Umoja wa Vijana wa Chama Cha Mapinduzi (UVCCM), mkoani Morogoro, Pili Agustino, imeleta maumivu makubwa kwa  CHADEMA na UKAWA, baada ya wafuasi wake kumiminika kuhamia CCM, wakiwemo vigogo.

Miongoni mwa watu tegemeo walioihama CHADEMA na kujiunga na CCM, ni  Steven Daza, ambaye katika uchaguzi mkuu uliopita, alitangaza nia ya kuwania ubunge kupitia UKAWA na kushika nafasi ya pili katika kura za maoni.

Daza, ambaye alikuwa mwiba kwa CCM wakati wa kampeni, hatimaye aliamua kubwaga manyanga juzi na kutaja sababu kuwa ni kutokana na kuukubali utendaji uliotukuka wa Rais Dk. John Magufuli, hali iliyomfanya afute fikra potofu kwamba mabadiliko hayawezi kutoka ndani ya CCM.

“Nawaomba radhi wana Morogoro kwa sababu nikiwa CHADEMA, nilifundishwa kutukana matusi, kufanya fujo, kulazimisha maandamano na kutumia watu kama mpira wa kiume yaani kondomu. Nimerejea nyumbani CCM, naomba mnipokee, mnilee nami niweze kuwa mtu makini,”alisema Daza.

Aliongeza:”CCM ni  chama makini, ambacho kiliangalia kushoto, kiliangalia na kulia, kikaangalia  nyuma na kikaangalia mbele, kikamchagua mtu makini, jemedari wa kweli, si mwingine bali ni John Pombe Magufuli. Nataka niwaambie, huyu jamaa ni noma, alinifanya  tangu achaguliwe  nikose usingizi, nikihangaika jinsi ya kujiunga na kurudi ndani ya Chama Cha Mapinduzi.”

Alisema hayuko peke yake, wapo wengi ndani ya UKAWA, ambao  waliamini kwamba mabadiliko hayawezi kutoka ndani ya CCM, lakini hivi sasa gurudumu limebadilika  na wanaamini mabadiliko ya kweli yanatoka ndani ya CCM, kutokana na kazi kubwa anayoifanya  Rais Magufuli.

“Kipindi hicho tuliambiwa mabadiliko yanatoka ndani ya UKAWA, lakini baadaye tukaambiwa mabadiliko yanaletwa na mtu, Lowassa (Edward).Tunataja jina  la mtu. Lakini mpambanaji  wa kweli ni Magufuli, amenisuuza kwa utendaji wake, nimeamua kurudi ndani ya Chama. Muda wa kuvaa gwanda umekwisha na hivi sasa  kila kitu mbele kwa mbele. Kila mtu sasa hivi anaona kinachotokea,”alisema.

Alisema wakati wa kutumia watu kama mpira wa kiume, umekwisha na  Watanzania waamke, hasa walioko upinzani kwani vyama hivyo vinawapotezea muda.

Akimkabidhi  kadi  ya CCM , Pili alisema ni wakati kwa vijana walioko upinzani kurejea  ndani ya Chama,  kwani  kuna mabadiliko makubwa yanakuja.

“Wanaohitaji kurudi warudi ndani ya CCM tutawapokea. Tumedhamiria kuleta mabadiliko makubwa ya maendeleo na kuhakikisha kwamba,  Ilani ya  CCM inatekelezwa ipasavyo kwa manufaa ya wote,”alisema Pili.

Aliupongeza uongozi wa CCM na UVCCM kwa kazi kubwa  waliyoifanya kwa kukiletea Chama ushindi wakati wa uchaguzi mkuu.

Kaimu Katibu wa CCM Mkoa wa Morogoro, Kulwa Milonge, alimhakikishia Pili kwamba, Chama mkoani humo kiko timamu  na kumpongeza Daza kwa kuhamia katika chama makini.

Katibu wa UVCCM Mkoa wa Morogoro, Issaki Ole Kalleiya, alisema jumuia hiyo imejipanga kikamilifu katika kuleta mageuzi ya kweli  ndani ya Chama,  kwa kuhakikisha inakuwa tanuru la kuoka vijana watakaoshika hatamu katika nafasi mbalimbali za uongozi.

“Tumedhamiria na tumejipanga kikamilifu kuwaletea maendeleo wananchi wetu. Tunawaomba wananchi wamuunge mkono Rais Dk. Magufuli kwa kila hatua njema anayofanya ili tuweze kuneemeka na matunda ya nchi hii.

"Sisi UVCCM tumeamka na tutahakikisha kwamba mtendaji yeyote, ambaye atajaribu  kuhujumu utekelezaji wa Ilani yetu, tutamfichua na kumtumbua jipu,”alisema Ole-Kalleiya.