SIMBACHAWENE KUONGOZA MAZISHI YA KABWE LEO

WAZIRI wa Ofisi ya Rais (TAMISEMI) Utumishi na Utawala Bora, George Simbachawene, ataongoza mazishi ya aliyekuwa Mkurugenzi wa Jiji la Dar es Salaam, Wilson Kabwe, yatakayofanyika leo katika Kijiji cha Mamba, wilayani Same, Kilimanjaro.

Akiwasilisha salamu za serikali kwa niaba ya  Rais Dk. John Magufuli, Simbachawene alisema serikali imempoteza kiongozi, ambaye alikuwa bado anatagemewa katika kuendeleza  gurudumu  la maendeleo nchini.

Pia, aliwataka wananchi kumkumbuka kwa yale mema  aliyoyafanya, hasa kuuenzi  mchango wake alioufanya kwa muda mrefu akiwa mamlaka za serikali za mitaa.

"Kabwe amefanya kazi na mamlaka ya serikali ya mitaa kwa  takribani  miaka 37 hadi kifo kinamkuta, kwa hiyo ni jukumu letu sote  kumkumbuka kwa mchango wake alioutoa kwa jamii kwa muda wote huo na kuhakikisha maendeleo yanaendelea kuwepo,’’ alisema.

Kwa upande mwingine, aliwataka wanafamilia kuwa na subira katika kipindi hiki kigumu  na kumuomba Mwenyezi Mungu ili awape amani, umoja na upendo.

Mkuu wa Mkoa wa Dar es Salaam, Paul  Makonda, akiwasilisha salamu za mkoa, aliwataka wale waliosoma na marehemu katika fani ya sheria, kuwa waaminifu na waadilifu katika mema na aliyoyafundisha wakati akiwa hai.

"Ninawataka Watanzania kutokuwa na maneno tusiyoyajua, kwa hiyo tusimvishe mzigo marehemu kwani yuko mbele za haki, bali kila mtu ajiangalie mwenyewe jinsi anavyoenda mbele za Mungu,” alisema Makonda.

Meya wa Jiji la Dar es Salaam, Isaya Mwita, alisema atamkumbuka marehemu Kabwe, hasa siku alipokwenda kumuona hospitali na kumtaka afanye kazi kwa bidii.

Alisema atahakikisha wosia alioachiwa na marehemu  anaufanyia kazi na kuitaka familia, hasa watoto kuambatana na mama ili aweze kuishi miaka mingi.

Mwenyekiti wa Jumuia ya Serikali za Mitaa Tanzania(ALAT), Gulamhafeez Mukadam, akimzungumzia Kabwe, alisema alikuwa na moyo wa kufanya kazi kwa bidii, kusaidia, kusimamia maendeleo yote yaliyopo ndani ya ALAT.

Pia, alisema kiongozi huyo  alifanya kazi ya  ujumbe katika kamati hiyo kwa muda wa miaka 15,  kwa hiyo aliwataka wanafamilia kuwa wavumilivu na kuahidi kuwa pamoja nao na kumkumbuka katika mema yote aliyoyafanya.

Wakati huo huo, Naibu Makamu wa Chuo Kikuu cha Dar es Salaam (Taaluma), Frorience  Luoga, alisema marehemu alikuwa mtu wa mfano wa kuigwa kwani alikuwa mstari wa mbele  kuhimiza wenzake kusoma kwa bidii.

Akisoma  wasifu,  Francis  Kabwe alisema  marehemu alizaliwa  Julai  Mosi,  mwaka 1956, katika kijiji cha  Mamba Mpinji, wilayani Same, Mkoa wa Kilimanjaro na alisoma elimu ya msingi  Shule ya  Ivuga,  elimu ya sekondari shule ya  Mzumbe  (Morogoro) kidato cha  tano na sita shule ya Mirambo.

Pia, alisoma shahada  ya sheria  katika Chuo  Kikuu  cha Dar es Salaam na baada ya kumaliza masomo yake, alisajiliwa kama  wakili wa kujitegemea.

Marehemu alifanya kazi katika wilaya ya Same kama  Ofisa  Utumishi, Mbeya kama Mwanasheria wa Manispaa ya Mbeya na aliwahi kufanyakazi Ofisi ya Waziri Mkuu Dodoma, Mkurugenzi wa Halmashauri ya Mbeya, Mkurugennzi wa Jiji la Mbeya, Mkurugenzi wa Jiji la  Mwanza  na Dar es Salaam.

Marehemu ameacha mke  na watoto  watano .

Kabwe alifariki dunia Mei  20, mwaka  huu, katika Hospitali ya Mama Ngoma, iliyoko Sinza, Dar es Salaam  alipokwenda  kwa ajili ya matibabu kutokana na kusumbuliwa na ugonjwa wa tezi dume.