MAGUFULI GUMZO EAC

RAIS Dk. John Magufuli, amekuwa gumzo katika mkutano wa viongozi wakuu wa Jumuia ya Afrika Mashariki (EAC), kutokana na uchapakazi wake, hivyo wameamua kumteua kuwa Mwenyekiti wa Jumuia hiyo.

Saa chache baada ya kupewa uenyekiti huo, Dk. Magufuli, aliwashushia rungu watumishi wa Sekretarieti ya EAC, kuwa yeyote atakayebainika kufuja mali za jumuia hiyo, atamtumbua jipu mara moja.

Alishangazwa na sekretarieti hiyo kutumia gharama kubwa kuandaa mkutano huo, badala ya kubana matumzi ili fedha zitumike katika shughuli zingine za maendeleo na kusaidia wananchi masikini wa nchi wanachama.

“Marais hawa wamefanya kosa kubwa kunichagua, sasa kama kuna mtumishi wa jumuia anayekwenda kinyume na matakwa ya EAC, atatumbuliwa jipu, fedha zilizotumika kuandaa mkutano huu zingeweza kununulia madawati.

“Sekretarieti lazima mfahamu kuwa mnaongoza nchi za watu masikini, hivyo lazima mbadilike kuendana na matarajio ya wananchi, nitawafuatilia,” alisema Dk. Magufuli huku akishangiliwa.

Pia, kauli mbiu ya Hapa KaziTu, imeendelea kutekelezwa kwa vitendo baada ya Dk. Magufuli, kuongoza kikao hicho kwa ustadi wa hali ya juu.

Licha ya kuongoza kikao cha wakuu hao kwa mara ya kwanza, Dk. Magufuli aliongoza kwa kujiamini huku wakati wote akisisitiza wajumbe kuzingatia muda.

Awali, Tanzania ilikuwa imekwishamaliza kipindi cha kuongoza EAC, ambapo ilitakiwa kukabidhi kijiti kwa mwanachama mwingine.  Rais Jakaya Kikwete ndiye alikuwa na kijiti hicho na kumwachia Dk. Magufuli, ambaye ndiye kilikuwa kikao chake cha kwanza.

Hata hivyo, wakuu wa EAC, Yoweri Museveni (Uganda), Uhuru Kenyatta (Kenya), Paul Kagame (Rwanda) na Pierre Nkuruzinza wa Burundi, walimuomba Dk. Magufuli kuendelea kuwa mwenyekiti kwa mwaka mmoja zaidi.

Hatua hiyo iliashiria wazi kuwa, viongozi hao wameridhishwa na kumkubali Dk. Magufuli, ambaye ana miezi mitatu tu tangu aapishwe kuwa rais.

Mwenyekiti huyo mpya, amezitaka nchi wanachama kuvumiliana na kushikamana ili kufikia maendeleo yaliyokusudiwa kwa sababu kila nchi ina matatizo yake.

Alishauri ukanda wa Afrika Mashariki kuongozwa na uchumi wa viwanda kutokana na kuwa na nguvukazi na ardhi ya kutosha.

Kufuatia hatua hiyo, amesema jumuia hiyo itaweza kuuza nje bidhaa zilizosindikwa ili kuingiza pato kubwa, badala ya kuuza malighafi ambapo hakuna faida yoyote.

 “Ukanda huu una ardhi kubwa yenye rutuba, watu wengi kiasi ambacho wanaweza kuinua uchumi wa Afrika Mashariki kupitia viwanda,” alisema.

Alisema anaamini mkutano huo utatoka na ajenda itakayosaidia kuanzishwa kwa suala hilo, jambo litakalosaidia kupunguza umaskini na kupanua wigo wa ajira kwa raia wa jumuia hiyo.

Vilevile, Dk. Magufuli alishauri lugha ya kiswahili kutumika kama lugha kuu kwa jumuia hiyo, kwa kuwa anaamini kama lugha mama, itasaidia kuwaleta pamoja wana Afrika Mashariki, ikiwemo kuchochea maendeleo.

“Ni vema tukatumia lugha ya asili inayoeleweka na kila mmoja, Afrika Mashariki tunacho kiswahili, tubadilike na kufanya ndio lugha ya msingi ya mawasiliano, badala ya kiingereza, ambayo kwetu ni lugha ya kigeni,” alisema.

Aliipongeza kwa hatua ya jumuia hiyo ya kuipokea Sudan Kusini kama mwanachama wa EAC na uteuzi wa Liberate Mukeko wa Burundi, kuwa katibu mkuu wake.

Katika hatua nyingine, Rais Magufuli alisema jumuia hiyo imewachagua Rais mtaafu wa Tanzania, Benjamin Mkapa na Museveni kuwa wasuluhishi wa mgogoro wa Burundi.

“Lengo ni kuharakisha kutatua mgogoro huo, ambao umekuwa dosari kwa jumuia hii, ili tuweze kusonga mbele kimaendeleo,” alisema.

Naye Mwenyekiti wa Baraza la Biashara la EAC, Kaea, alishauri kuboreshwa kwa miundombinu ili kurahisisha usafirishaji wa bidhaa katika ukanda huu na nje, kupunguza gharama za usafiri hususani wa anga na kudhibitiwa kwa suala la rushwa, ambalo limekithiri katika sekta hiyo.

Katika mkutano huo, Rais Magufuli, pia alizindua pasi mpya za kusafiria za kieletroniki, zitakazotumika na nchi wanachama wa Jumuia ya Afrika Mashariki.

Pasi hizo zimetengenezwa ili kuendana na viwango vya Shirika la Kimataifa la Usafiri wa Anga (ICAO), ambazo zitamwezesha mtumiaji kusafiri nchi yeyote duniani.

Dk. Magufuli alisema pasi hizo zitapunguza gharama za uchapishaji zilizokuwa zikitumika katika kutayarishia pasi za karatasi.

Aidha, alisema matumizi ya pasi hizo  ni salama na ni vigumu kughushiwa au kutumiwa na mtu mwingine.

Mkutano huo uliipitisha Sudan Kusini kuwa mwanachama mpya wa jumuia hiyo.

Akizungumzia uteuzi huo, Makamu wa Pili wa Rais wa nchi hiyo, James Wani Igga, alisema nchi hiyo itashirikiana na wanachama kuongeza mafanikio ya kiuchumi, kisiasa na kiusalama.

Alisema nchi hiyo kwa sasa inasonga mbele baada ya kufikiwa makubaliano ya kusitisha mapigano.

Aliishukuru Tanzania kwa kutoa mchango mkubwa kwenye kutafuta suluhu ya nchi hiyo, hivyo watahakikisha wanaitumia fursa hiyo kuongeza kasi ya ukuaji wa uchumi wa taifa hilo changa Afrika.

ATETA NA KENYATTA, KAGAME
Awali, Dk. Magufuli, alikutana na kufanya mazungumzo na Rais wa Kenya, Uhuru Kenyatta, kando ya mkutano mkuu wa 17 wa wakuu wa nchi wanachama wa Jumuia ya Afrika Mashariki unaofanyika jijini hapa.
Viongozi hao wamekubaliana kuimarisha uhusiano, hususan katika masuala ya kiuchumi.

Baadhi ya maeneo waliyokubaliana kutilia mkazo katika uhusiano huo ni kutekeleza miradi ya maendeleo inayounganisha nchi mbili, ikiwemo miundombinu, kukuza biashara na kuzalisha ajira kupitia viwanda.

Rais Kenyatta alisema amefurahishwa kuona Rais Magufuli yupo tayari kuhakikisha nchi ya Kenya na Tanzania zinakuwa karibu na miradi ya maendeleo inaharakishwa.

"Kwa sababu nia yetu sisi ni kuona maendeleo ambayo yatagusa mwananchi wa kawaida, tumalize umasikini, uchumi ukue, na hivyo hatuwezi kufanya tukiwa tumetengana," alisema.

Kwa upande wake, Rais Magufuli alisema Tanzania na Kenya zina kila sababu ya kuimarisha mahusiano ya kibiashara, hasa katika ujenzi wa viwanda utakaozalisha ajira kwa kuwa watu wake ni wamoja.

"Wazee wetu Mzee Kenyatta na Mzee Nyerere walijenga mazingira mazuri ya kuwa na nchi hizi mbili wakati wakipigania uhuru, sasa sisi vijana wao ni wakati wetu kwenda mbele kwa ajili ya maendeleo," alisema Rais Magufuli.

Rais Magufuli alibainisha kuwa nchi wanachama wa Jumuia ya Afrika Mashariki zinajenga mahusiano na ushirikiano, unaolenga kupata manufaa hayo ya kiuchumi kwa manufaa ya wananchi wake.

Aliutaja mradi mmoja wapo kuwa ni ujenzi wa njia ya kusafirisha umeme kutoka Tanzania kwenda nchini Kenya kupitia Namanga na akaongeza kuwa, Tanzania itakapoongeza uzalishaji wa umeme na kuanza kuvuna gesi, itaiuzia pia Kenya, halikadhalika Kenya nayo itauza bidhaa zake Tanzania.

Kabla ya kukutana na Rais Kenyatta, Dk. Magufuli alikutana na kufanya mazungumzo na Rais wa Rwanda, Paul Kagame, ambapo viongozi hao wamekubaliana kuzidisha mahusiano kati ya Tanzania na Rwanda.

Dk. Magufuli alimhakikishia Rais Kagame kuwa serikali itakamilisha ujenzi wa reli ya kati kwa kiwango cha kisasa, yaani ‘Standard Gauge’ ili kurahisisha usafirishaji wa bidhaa na watu.

Rais Kagame alimpongeza Dk. Magufuli kwa uongozi wake bora uliolenga kuimarisha uchumi, ikiwemo kuimarisha Bandari ya Dar es Salaam, ambayo Rwanda inaitegemea na ujenzi wa reli ya kati, ambayo pia ni tegemeo kubwa kwa uchumi wa Rwanda.