MAJALIWA: UKAGUZI WA CAG UMEGUNDUA MADUDU KIBAO, MADENI YA HALMASHAURI YABAINIKA NI HEWA

SERIKALI imesema Mdhibiti na Mkaguzi Mkuu wa Hesabu za Serikali (CAG), anafanya uhakiki wa madeni ya serikali, ambapo amebaini kuna madudu mengi.

Imesema madai mengine yameonyesha mashaka, ambapo amewataka wakurugenzi wa halmashauri na wakaguzi wa ndani, kujiridhisha ukweli wa madai hayo kabla ya kuyafikisha serikalini kwa ajili ya malipo.

Waziri Mkuu, Kassim Majaliwa alisema hayo jana, wakati akizungumza na watumishi wa Hospitali ya Wilaya ya Ruangwa mkoani Lindi, alipoitembelea wakati akiwa katika ziara ya kikazi, iliyolenga kukabidhi msaada wa vifaa tiba alivyovitoa kwa ajili ya hospitali hiyo.

“Madai mengine yanatia mashaka, sisi hatuhitaji kuletewa madeni ya hovyo hovyo, ni vyema wakurugenzi wa halmashauri na wakaguzi wa ndani wakajiridhisha kabla ya kuyapeleka serikalini kwa ajili ya malipo.

“Madeni mengine ya ajabu, mfano unakuta mtumishi mmoja anaidai serikali sh. milioni 30, jambo ambalo ni gumu hata kama alihamishwa, haiwezekani kufikia kiwango hicho, pia kuna baadhi ya majina yamejirudia mara nne,” alisema.

Majaliwa alisema serikali italipa madeni yote inayodaiwa baada ya kumaliza kuyafanyia uhakiki, hivyo aliwaomba watumishi kuwa na subira wakati serikali ikiendelea kuyahakiki ili kuweza kulipa deni sahihi.

Awali, akisoma taarifa ya idara ya afya kwa Waziri Mkuu, Mganga Mkuu wa Halmashauri ya Wilaya ya Ruangwa, Dk. Japhet Simeo, alisema idara ya afya inakabiliwa na madeni ya watumishi, ambayo ni sh. milioni 109.6.

Alisema madeni hayo yalitokana na likizo, matibabu, uhamisho wa ndani na nje ya wilaya, gharama za mizigo kwa watumishi waliostaafu, ambapo halmashauri imejipangia utaratibu wa kulipa madeni hayo pindi inapopokea fedha kutoka serikali kuu.

Hata hivyo, alisema kasi ya mtiririko wa fedha ni ndogo ikilinganishwa na mahitaji halisi ya maslahi ya watumishi, ambapo halmashauri inawapongeza watumishi wa afya kwa kuendelea kuwa wavumilivu na kuwahudumia wananchi.

Dk. Simeo alisema halmashauri inawapongeza Rais Dk. John Magufuli na Waziri Mkuu, Majaliwa kwa juhudi wanazozifanya za kuongeza mapato nchini na kuwa wana matumaini watumishi nao wataboreshewa maslahi na stahiki zao ili kuchochea motisha kiutendaji.

Katika hatua nyingine, Dk. Simeo alizungumzia upatikanaji wa dawa, ambao alisema umeongezeka kutoka asilimia 30 mwaka jana, na kufikia asilimia 80 mwaka huu, na dawa muhimu katika vituo vyote vya kutolea huduma ambavyo viko 32.

Wakati huo huo, serikali imesema haitalipa madeni, ambayo halmashauri zinadaiwa kwa kuwa mengi ni hewa.

Aidha, imesema itazichukulia hatua halmashauri zote zilizoshindwa kujibu hoja, baada ya kuwasilisha ripoti zao kwa Kamati ya Kudumu ya  Bunge ya Hesabu za Serikali za Mitaa (LAAC).

Waziri wa Nchi, Ofisi ya Rais, Tawala za Mikoa na Serikali za Mitaa (TAMISEMI), Utumishi na Utawala Bora, George Simbachawene, alisema hayo jana, jijini Dar es Salaam, baada ya kupokea ripoti kutoka LAAC.

 "Madeni mengi yanatokana na ukiukwaji wa kanuni na taratibu, hususani za manunuzi, ambapo watendaji wamekuwa wakiandika idadi kubwa ya fedha tofauti na manunuzi halisi, huu ni wizi, hatutavumilia," alisema.

Simbachawene alisema serikali inaonekana inadaiwa fedha nyingi, ili hali ni madeni feki kwa kuwa baadhi ya watu wamejitengenezea mianya ya kula fedha.

 Alisema serikali haipo tayari kulipa madeni yasiyoeleweka, isipokuwa yale tu yaliyo wazi na kuahidi kuwachukulia hatua watumishi watakaobainika kufanya michezo hiyo michafu.

 "Tutachukua hatua na kuanzia sasa halmashauri zisizalishe madeni yasiyo ya lazima, isipokuwa yale tu yanayojibu matatizo ya wananchi," aliagiza.

 Hata hivyo, Waziri Simbachawene alisema watazichukulia hatua halmashauri zilizoshindwa kujibu hoja mbalimbali walizoulizwa na LAAC baada ya kupeleka ripoti zao.

 Alisema kutojibu hoja ni ukiukwaji mkubwa wa wajibu, ikiwemo kusababisha kupoteza hoja muhimu, ambazo zingetatua changamoto na kuleta maendeleo kwa wananchi na taifa.

 "Takribani halmashauri 30 ziliwasilisha ripoti kwa kamati hii na takribani zote zimeshindwa kujibu hoja huku baadhi zikipuuza mapendekezo waliyopewa," alisema Simbachawene.

 Alizitaja halmashauri zilizopuuza mapendekezo ya kamati kuwa ni Kigoma Mjini, Kasulu, Mbulu, Kiteto, Kalambo, Longido na Kwimba.

  Waziri Simbachawene alisema kwa sasa TAMISEMI inasisitiza malipo kufanyika kielektroniki, ikiwemo watendaji kuacha kuingia mikataba mibovu ya ukusanyaji mapato katika halmashauri zao,  jambo linalosababisha upotevu wa fedha.