CHADEMA WAINGIZA MSITUNI VIJANA 3,000

Wananchi akishangilia wakati wa mkutano wa kampeni uliofanywa na Mgombea Mwenza wa Urais kwa tiketi ya CCM, Mama Samia Suluhu Hassan leo katika eneo la Mnazi Mmoja mkoani Lindi

 Katibu wa NEC, Itkadi na Uenezi wa CCM, Nape Nnauye akimkaribisha jukwaani, Aliyekuwa Katibu wa wilaya ya Lindi mjini wa Chadema, Abdalla Madebe ambaye alikuwa ndiye mpiga debe mkubwa wa Mbunge wa CUF anayemaliza mda wake wa Lindi mjini, Salum Baruani, wakati alipoamua  kutangaza kuhamia CCM, katika mkutano wa kampeni uliofanywa na Mgombea Mwenza wa Urais kwa tiketi ya CCM, Mama Samia Suluhu Hassan katika eneo la Mnazi Mmoja, mkoani Lindi leo. Kulia ni Mama Salma Kikwete.

Yajipanga kwa vurugu baada ya uchaguzi

Kigogo CHADEMA afichua, aiasa serikali

NA ABDALLAH MWERI

WAKATI Watanzania wakijiandaa kupiga kura kumchagua rais, wabunge na madiwani Oktoba 25, mwaka huu, CHADEMA imeendelea na mikakati ya kuzusha vurugu na imebainika kimepeleka msituni zaidi ya vijana 3,000 kupatiwa mafunzo maalumu kwa ajili ya kutekeleza mpango huo.

Tayari CHADEMA imehusishwa kwenye matukio kadhaa ya vurugu zikiwemo zilizotokea wilayani Kyela, Tarime, Dar es Salaam na maeneo mengi ambako wafuasi wake walivamia mikutano ya wagombea wa vyama vingine na kuzusha vurugu.

Katika vurugu hizo, mtu mmoja amepoteza maisha wilayani Tarime, huku maeneo mengine wananchi wakijeruhiwa vibaya, ambapo ni utekelezaji wa mikakati na maagizo yanayotolewa na viongozi wa chama hicho na vile vinavyounda kundi la UKAWA.

Mbali na hilo, viongozi wa vyama hivyo mara kadhaa wamekuwa wakitoa kauli zinazoashiria kuna njama mbaya ambazo wamepanga kuzitekeleza baada ya uchaguzi, ikiwemo kudai wataibiwa kura na ile ya kuwataka wananchi kutoondoka kwenye vituo vya kupigia kura ili kulinda kura za wagombea wao, jambo ambalo ni kinyume.

Hata hivyo, aliyekuwa Katibu wa Uhamasishaji na Uenezi wa Vijana wa CHADEMA, Grayson Nyakarungu, amefichua kuwa vijana hao 3,000 wamepelekwa msituni na sasa wanaendelea na mafunzo maalumu.

Kigogo huyo, ambaye ameamua kukihama chama hicho kutokana na mchezo huo mchafu na wa hatari kwa taifa, alifichua siri hiyo katika mkutano wa mgombea mwenza wa urais, Samia Suluhu Hassan, uliofanyika juzi kwenye uwanja wa Mailimoja Kibaha, Pwani.

Pia, alimkabidhi Samia rundo la kadi za CHADEMA kutoka kwa vijana wenzake walioamua kurejea CCM, baada ya kuchoshwa na ubabaishaji wa viongozi wa chama hicho.

Alisema wamefikia uamuzi wa kukabidhi kadi za CHADEMA na kurejea CCM kwa sababu hawamkubali mgombea wa urais wa chama hicho, Edward Lowassa.

"Huwezi kunishawishi nimpigie kura Lowassa wakati alipokuwa CCM tulikuwa mstari wa mbele kumtaja kuwa ni fisadi, leo CHADEMA imempokea huu ni ubabaishaji wa viongozi," alisema Nyakarungu.

Pia, alisema kigogo wa CHADEMA, John Mnyika, hamkubali Lowassa na alikuwa akimuunga mkono aliyekuwa Katibu Mkuu wa chama hicho, Dk. Wilbroad Slaa, kumkataa Waziri Mkuu huyo wa zamani aliyejiuzulu kwa kashfa ya Richmond.

Nyakarungu alisema CHADEMA ina vijana 3,000 ambao wako mafichoni wakipewa mafunzo maalumu ya kujiandaa kufanya vurugu endapo Lowassa, atashindwa katika uchaguzi mkuu.

Alisema alikuwa miongoni mwa viongozi wa CHADEMA akishirikiana na Mnyika, kuwakusanya vijana kutoka katika maeneo mbalimbali  nchini kujiandaa na mapambano baada ya uchaguzi huo uliopangwa kufanyika Oktoba 25, mwaka huu.

"Nilikuwa msaidizi wa Mnyika kupanga mikakati ya kuandaa jeshi la vijana, ambao kwa sasa wako msituni, kwa leo naishia hapa, mengi nitazungumza baadaye, mtu yeyote akijitokeza kujibu," alisema Nyakarungu.

Kigogo huyo alisema CHADEMA imejipanga kufanya vurugu baada ya kuona CCM imejipanga kikamilifu kushinda katika uchaguzi huo wa urais, ubunge na madiwani.

Nyakarungu alivitaka vyombo vya dola kufuatilia mwenendo wa CHADEMA kwa sababu chama hicho kimejiandaa kuhatarisha usalama wa Watanzania.

"Niko tayari kutoa ushirikiano kuhusu jambo hili, nina uhakika na maneno yangu kwa sababu mimi nilikuwa mmoja wa viongozi nilioshiriki kukusanya vijana na kuwapeleka msituni kwa mafunzo," alionya Nyakarungu.

Kigogo huyo aliwataka wamiliki wa vituo vya mafuta na bandari kavu, kutofanya kazi Oktoba 25, mwaka huu, kwa kuwa vijana hao wamepewa amri ya kuvamia na kupora muda mfupi baada ya muda wa kupigakura kumalizika.

Akizungumzia kurejea kwake CCM, Nyakarungu, alisema nyuma yake kuna idadi kubwa ya vijana ambao baadhi yao walikuwa mafichoni, lakini wamerejea nyumbani kuimarisha chama.

Nyakarungu alimuomba mgombea mwenza na viongozi wa CCM kuwapokea na wako tayari kuhamasisha vijana wa Kibaha na maeneo mbalimbali kumchagua Dk. John Magufuli katika uchaguzi mkuu ujao.

Alisema vijana waliorejea CCM wataanza kazi ya kumpigia debe mbunge aliyemaliza muda wake, Sylvester Koka, kupata kura za kishindo sanjari na kuwachagua madiwani wa chama hicho.

Kwa upande wake, Samia alisema kuwa watafanya kazi na vijana hao kwa kuwa CCM ni chama madhubuti ambacho kimejipanga vyema katika kuwaletea maendeleo Watanzania.

"Karibuni nyumbani na ninawapongeza. CCM ni chama imara ambacho kinatekeleza vyema ilani ya uchaguzi, nawaomba tushirikiane tupate ushindi wa kishindo kwa kumchagua Dk. Magufuli kuwa Rais wa Awamu ya Tano," alisema Samia.