SAMIA AWATAKA WANA-CCM KUJIPIGA DEKI

MAKAMU wa Rais Samia Suluhu Hassan, amewataka wana-CCM mkoani Tanga, kuhakikisha wanajisafisha na kuongeza uadilifu, ikiwa ni pamoja na kuzuia mianya ya ukwepaji wa mapato unaofanyika kupitia bandari bubu zilizopo Pangani na Mkinga.

Alitoa wito huo juzi, kwenye mkutano wake na makatibu wa CCM, makatibu uenezi, makatibu uchumi, wenyeviti wa halmashauri na viongozi wengine, ambapo alielezea kushangazwa kwake na bandari hizo bubu kutumiwa na baadhi ya watu ili kukwepa kodi za serikali.

Katika mkutano wake huo, Samia alisema litakuwa jambo la busara kama wakazi wa Tanga, wataanza kulishungulikia wenyewe suala hilo kabla ya serikali kuu kuwanyooshea vidole, akisema kwamba kufanya hivyo itakuwa sehemu ya mchango wao kuunga mkono jitihada za serikali.

Alisema serikali iliyoko madarakani imeanza kuchukua hatua kwa kubana vitendo vya ufisadi na ubadhilifu wa fedha, ambapo wana-CCM ambao ndio wasimamizi wa Ilani ya Chama chenye serikali iliyoko madarakani, wanatakiwa kuongoza mapambano dhidi ya vita hiyo inayoendelea.

“Serikali imeanza vizuri katika kuchukua hatua kwa vile inachukia vitendo vya ufisadi na ubadhilifu wa namna mbalimbali, kwa hiyo mnatakiwa kuiunga mkono. Hapa Tanga kuna bandari bubu za Mkinga na Pangani, zinazotumika kukwepa mapato, ni vyema mkaliona hili kabla hamjanyooshewa vidole,” alisema.

Mbali na hilo, Makamu wa Rais pia alitumia fursa hiyo kuwataka wana-CCM kuimarisha umoja miongoni mwao huku wakiimarisha jumuia zao, lengo likiwa kukiwezesha Chama kuendelea kushika dola na nchi kuwa katika hali ya amani na utulivu muda wote.

Aliongeza kuwa kuna kila sababu kwa jumuia hiyo kufanya kila jitihada katika kuhakikisha zinaendesha shughuli zao kwa tija, akitolea mfano uendelezaji wa miradi, lengo likiwa kukiwezesha Chama kuwa na nguvu za ziada huku akisisitiza kuwa miradi isiyo na tija ni sawa na hakuna.