NCHEMBA; CHAGUENI WAGOMBEA WA CCM

NA RHODA EZEKIEL, KIGOMA

NAIBU Waziri wa Fedha, ambaye pia ni Mjumbe wa Kamati ya Ushindi ya Chama Cha Mapinduzi (CCM), Mwigulu Nchemba, amewataka wananchi kuhakikisha wanamchagua mgombea urais wa CCM katika uchaguzi mkuu wa Oktoba 25, mwaka huu.

Amesema hawapaswi kuchagua mgombea wa upinzani, ambaye anakabiliwa na tuhuma za kashfa, badala yake wamchague Dk. John Magufuli, kiongozi mchapakazi, mwadilifu na aliye na uchungu na ukombozi wa Watanzania, atakayetatua kero zao.

Mwigulu alitoa rai hiyo juzi mjini Kigoma, wakati wa sherehe za uzinduzi wa  kampeni za wabunge na madiwani wa CCM mkoani humo, zilizofanyika kwenye viwanja vya Kahabwa.

Alisema atahakikisha anazunguka nchi nzima kumnadi mgombea urais wa CCM kwa kuwa ndiye pekee anayefaa kwa kila sifa na utendaji wake umeonekana kwenye wizara mbalimbali alizowahi kuziongoza.

Mwigulu alisema Watanzania wanatakiwa kuzitendea haki nafsi zao na kufanya maamuzi ambayo hawatayajutia baadaye, ambapo Dk. John Magufuli ndiye jibu sahihi katika hilo.

Alisema Magufuli ni mgombea ambaye Chama kilifanya uamuzi sahihi kumteua awe mgombea urais na ambaye Watanzania wanamuhitaji kwa sasa ili awatatulie shida zao na kuwaondoa mafisadi na watendaji wazembe kazini, wanaorudisha nyuma maendeleo ya wananchi na taifa kwa ujumla.

Aidha, aliwaonya wananchi kupuuza vitisho na kudanganywa na wanasiasa ambao wanatumia siasa za kisanii ili kupata kura, na ambao ni mafisadi na hawafai katika jamii huku akiwaita kuwa hawawezi kufanya kitu kutokana na kuwa dhoofu kisera na afya.

Katibu wa Jumuia ya Wazazi Taifa, Abdallah Bulembo, akizungumza kwenye sherehe hizo, alisema mgombea urais wa UKAWA, Edward Lowassa, ni msanii miaka yote.

Alihoji alikuwa wapi miaka yote kujichanganya na wananchi, kuona kero zao na kwamba kama anataka kuona kero za wananchi, aende gerezani akaone wananchi wanapata kero zipi au aende bandarini kubeba mizigo na wananchi.

Bulembo alisema wananchi wanatakiwa kuwa makini na wagombea wenye uchu wa madaraka kama Lowassa, kwa kuwa hawafai na wataipoteza nchi, kwa kuwa wanataka kuingia ikulu kutafuta ulaji, hawawezi kufanya kazi kama iliyofanywa na CCM kwa kipindi cha tangu uhuru.

Alisema Lowassa alipokuwa CCM, UKAWA walikuwa wakimwita fisadi asiyefaa hata kuitwa waziri mkuu mstaafu, lakini sasa wanamwona ni mgombea urais anayefaa kuongoza baada ya kupewa pesa ili kukiuza chama chao.