SIASA HIZI ZA MAIGIZO NI KUWAKEJELI WANANCHI

NA CHRISTOPHER LISSA

KWANZA nilipongeze Jeshi la Polisi,   Kanda Maalumu  ya Dar es  Salaam chini ya Kamishna shupavu Suleiman Kova kwa uamuzi  makini wa kukemea ‘rafu’ inayoonekana kuanza kuchezwa  na baadhi ya wagombea wa  urais,  hasa mgombea wa  CHADEMA, Waziri Mkuu aliyejiuzulu kwa kashfa chafu ya Richmond,  Edward Lowassa.

Tunajua wenye midomo wataongea sana, hasa wale ambao kazi yao ni kupinga kila jambo linaloamriwa na serikali  na vyombo vyake vya dola, hata kama ni jema na lipo kwa ajili ya maslahi yao wenyewe.

Hii ndiyo hulka iliyojengeka katika vichwa vya wengi. Kukinzana na maamuzi ya serikali na vyombo vyake, kushindwa kutii mamlaka , sheria, taratibu, kanuni na hata tamaduni za kimazoea zilizopo.

Lakini ni wepesi wa kulaumu na kulaani vyombo vya dola na serikali  pindi  kasoro ndogo inapojitokeza.  Kwa lugha nyingine wagumu wa kuelewa wepesi wa kusahau.

Tunaamini kuwa Jeshi la Polisi hapa nchi liko makini na maamuzi yake kama haya ambayo kwa wengine wanachukulia kwa wepesi wepesi.

Ametajwa  Lowassa  kama mfano tu wa waasisi  wa kampeni za ‘rafu’ kwa sababu ndiye aliyeonekana kuwa ‘wasanii’ kuliko wagombea wengine ambao wako makini na timamu.

Tunajua kuwa hatua hii ya Jeshi la Polisi si ya kukurupuka kwa sababu Lowassa,  juzi alionekana akirandaranda katika vituo  na ndani ya mabasi ya dadalada.

Pia  Jeshi la Polisi  mkoa maalumu wa Ilala, juzi  lilimzua kufanya ziara holela  baada ya kuingia katika mtaa wa Swahili  na wapambe wake na kutaka kuingia  Soko la Kariakoo, akitokea soko la Tandale, Kinondoni.

Hata hivyo, Lowassa alipigana chenga na Polisi na kuonekana wilayani Temeke akiendeleza utaratibu wake wa kampeni. Hili linastahili kulaaniwa.

Kisingizio chake kikubwa ni kuzungumza na wafanyabishara na wananchi ili kujua matatizo yao, wakati anaelewa fika kuwa ratiba ya kampeni aliyonayo mkononi haionyeshi  kwamba atapita maeneo hayo kwa kipindi hicho. Kufanya hivyo ni kinyume cha utaratibu.

Nasema hivyo kwa sababu najua kuwa Lowassa na wapambe wake  ni watu wenye akili timamu. Watu wanaoelewa kanuni zilizotolewa na Tume ya Taifa ya Uchaguzi (NEC), juu ya utaratibu wa kampeni pamoja na kukabidhiwa  ratiba rasmi, ambayo wanatakiwa kuifuata, hawawezi kufanya vitu kama hivyo.

Inashangaza  kuona  kuwa Lowassa anaanza kwenda kinyume kwa kudandia daladala  na  kufanya kampeni  zisizo na msingi pasipo kufuata ratiba aliyonayo mkononi.

Kwa nini anafanya mchezo huu wa kuchepuka? Kwanini asibaki njia kuu ambayo  inamuelekeza afuate ratiba?

Inashangaza mtu kama Lowassa ambaye aliwahi kushika nyadhifa za juu hapa nchini  ukiwemo Uwaziri Mkuu na anajua masuala ya itifaki na usalama  aanze  kupanda daladala kiholela na kutengeneza picha zisizo na msingi.

Katika  miaka yote ambayo Lowassa  tumemfahamu sijawahi kumuona akipanda Daladala.   Au ndiyo  kutafuta  adidu za rejea  katika  Ilani ya Ukawa? Waswahili wanasema kutafuta ‘Kiki’.

Kitendo cha Lowassa kuonekana kunywa maziwa kwa mamantilie Tandale, hasa wakati huu  ambapo Serikali inapambana na  mlipuko wa ugonjwa wa Kipindupindu  huku Tandale likiwa ni eneo ambalo limetajwa kuongoza kwa maambukizi ya ugonjwa huo  ni upotofu wa mawazo yakinifu.

Kwa lugha ya mtaani    unaweza kusema huu ni usanii wa wazi ambao au kiini macho  ambacho kiukweli kinaonesha ni jinsi gani  mgombea huyo anavyojaribu kulaghai  watanzania kwa uchu wa kuingia Ikulu kwa kutumia upanga wake wa fedha.

 Hizi ni kampeni za kejeri. Kampeni za kiini macho kwa wananchi. Kampeni holela. Kampeni chafu. Kampeni  zisizo na  mashiko. 

Ni kwa miaka mingapi Lowassa aliwahi kuonekana Sokoni na kapu au kuwasabahi wafanyabishara na kujua matatizo yao?   Leo huyu Lowassa  anaonekana akigalagala na  kina Mama ntilie, makondakta na watu wanaobangaiza akijifanya Malaika   mtakatifu na mwokozi wao.

Uamuzi huu wa kampeni holela, unatia hofu juu ya uwezo wa kufikiri  na wa kimaamuzi wa  inayojiita ‘Timu Lowassa’. Potelea mbali  ‘Timu Ukawa’ ambayo  tunajua inaburuzwa kimaamuzi. Haina sauti. Imetulizwa  kama siyo kufumbwa mdomo.

Nasema inaburuzwa kwa sababu haingii akilini kama  wangeweza kukubaliana na kampeni kama hizi zisizo na mashiko.

Nazijua kampeni za CHADEMA zilivokuwa zikifanyika  wakati  alipokuwepo  Katibu  Mkuu  wao Willybroad Slaa,  aliyejiuzuru kutokana na kutokukubaliana na hatua ya  chama hicho kumpokea  mtu kama Lowassa.

 Zilikuwa ni kampeni za uhakika na za kuheshimu mamlaka husika.

Lakini pia sina shaka kwamba kwa jinsi ninavyomfahamu Lowassa  sitashangaa sana kama nikiambiwa kuwa maamuzi ya kulandalanda mitaani, kuonjaonja maziwa na visheti,  yametoka katika kichwa chake mwenyewe.  Kwa hilo sina wasiwasi kwa sababu namjua kwa maamuzi yake.

Nakumbuka kipindi  akiwa Waziri Mkuu  kabla ya kushambuliwa kuhusika na kashfa chafu ya Richmond,  aliwahi kuja na wazo la  moango wa  kutengeneza mvua baada ya nchi kukumbwa na ukame. Eti mvua ya kutengenezwa Tanzania.

Kwanini tusiamini hii leo kuwa Lowassa anaweza kushauri apande  Daladala na kukaa vijiweni kuonja maziwa  kama sehemu ya kampeni? Au aende kutalii sokoni ? Kwa uwezo wake wa kufikiri hili linawezekana kuwa ni wazo lake la kiubunifu haswaa.  

Hii ndiyo athari ya kuitikiwa  ya waliokuwa viongozi wa Chadema na Ukawa kufanyangwa kifikra na kuwa waitikiaji wa ‘Ndiyo Mzee’ kwa kila atakalotamka.

Ndiyo! Nafahamu kwamba kama si wazo la ubunifu  lililotoka katika kichwa chake na kuitikiwa ‘Ndiyo Mzee’   basi angelikataa kwa sababu anaelewa fika kuwa si utaratibu,  haifai na  ni kinyume cha ratiba.

Ninaamini kuwa  Lowassa ndiye aliyekabidhiwa kanuni  na taratibu za kampeni,   hivyo asingiweza  kukiuka mapema namna hii hata kabla ya CHADEMA kuzindua kampeni zake.

Nasema haya  kwa sababu,  kwanza ni hatari kwa mgombea    kama Lowassa kuzurula mitaani  na kufanya kampeni holela  pasipo ulinzi makini. 

Nilipongeze tena jeshi la Polisi kwa uamuzi huu   makini kwa sababu wao ndiyo wabeba lawama pindi majanga yanapotokea.

Lakini si kwa Lowassa tu,  bali hata  wagombea wengine ambao  wanawaza kufuata nyendo hizo chafu, kutii taratibu zilizopo na kuheshimu  maagizo yanayotolewa na vyombo vya dola.

Pia kufuata ratiba ya kampeni inayotambulika na NEC, vyama vyao na vyombo vingine likiwemo Jeshi la Polisi.  Nimalizie kwa  kumuasa Lowassa ‘michepuko  ya kampeni siyo dili, afuate njia kuu ambayo ni ratiba ya kampeni.’