POLISI SASA KITANZINI

Na Felix Mwagara

SERIKALI imeagiza kuchukuliwa hatua kali kwa askari polisi wote wenye tabia ya kuwabambikizia kesi raia.

Agizo hilo limetolewa na Katibu Mkuu wa Wizara ya Mambo ya Ndani ya Nchi, Meja Jenerali Projest Rwegasira, ambapo amewataka viongozi wakuu wa Jeshi la Polisi kuhakikisha tabia hizo zinakomeshwa.

Meja Jenerali Rwegasira alisema jeshi hilo lina sifa nzuri nje ya nchi pamoja na hapa nchini, lakini kuna baadhi ya askari wasio waadilifu wanawaonea wananchi mitaani wasiokuwa na hatia.

“Jeshi letu lina sifa nzuri, niliwahi kwenda nchini Kenya nikaambiwa Jeshi la Polisi Tanzania lina maadili kwani hata likimkamata mhalifu, linafuata sheria na utaratibu na sio kutumia nguvu kubwa kama yalivyo majeshi mengine,” alisema Rwegazira.

Aliongeza kuwa amefurahishwa na utendaji kazi wa jeshi hilo na kutaka kuongeza umakini zaidi ili kuliletea sifa zaidi. Alisema binafsi yupo karibu nao katika kuliendeleza jeshi hilo ili liweze kufanya kazi kwa weledi.

Alisema ni askari wachache mno wenye tabia hiyo ya kuwabambikizia kesi wananchi na kutofuata sheria za jeshi, hivyo kazi ya kupambana na askari hao inawezekana endapo viongozi wa jeshi wakiamua kulifanyia kazi.

“Utendaji kazi wenu ni mzuri, nawapongeza sana hasa mlivyosimamia uchaguzi mkuu vizuri kwani wananchi wengi walikuwa na wasiwasi kuhusu usalama wao katika kipindi cha uchaguzi, lakini mlisimama imara kuhakikisha uchaguzi unamalizika salama,” alisema Rwegasira.

Mkuu wa Jeshi hilo nchini, IGP Ernest Mangu, aliwapongeza viongozi hao wa wizara kwa kuwatembelea kwa kuwa ni faraja kubwa kwao.