WAFANYAKAZI TRL WATAKA VIONGOZI WAO WATIMULIWE

MGOMO wa wafanyakazi wa Kampuni ya Reli Tanzania  (TRL), umechukua sura mpya baada ya kuiomba serikali kuwafukuza viongozi wa kampuni hiyo.

Aidha, wameiomba serikali kufanya mabadiliko makubwa ya kiutendaji kutokana na uongozi uliopo kushindwa kutekeleza majukumu yake ipasavyo.

Wafanyakazi wa kampuni hiyo wamedai uongozi huo umeisababishia hasara kubwa kampuni na kwamba inajiendesha bila kupata faida huku ikishindwa kuboresha hali ya maisha ya wafanyakazi.

Naibu Katibu wa Chama cha Wafanyakazi wa Reli Taifa (TRAWU), Boaz Nyakelele, alisema juzi kuwa, uongozi uliopo umechoka na kwamba hauna ubunifu wa kuendesha kampuni hiyo kibiashara na umeshindwa kulipa malimbikizo ya madai ya wafanyakazi.

Alisema uongozi huo umeshindwa kulipa madai ya wafanyakazi, yakiwemo fedha za makato ya mifuko ya jamii na mifuko ya bima ya afya zaidi ya sh. bilioni mbili.

“Hatujalipwa madai yetu ya fedha za malimbikizo kuanzia Julai hadi Novemba, 2014. Mkurugenzi Mtendaji wa TRL alimuahidi Waziri Mkuu, Kasim Majaliwa wakati wa ziara yake kuwa atahakikisha analipa madai hayo Desemba 31, mwaka jana, lakini hadi sasa hajafanya hivyo,” alisema.

Alisema uongozi wa TRL umekaidi ahadi ya  kulipa madeni ya wafanyakazi, badala yake umetumia kigezo cha kubana matumizi kutowalipa kwa kusitisha kufanyakazi saa za ziada.

Nyakelele alisema uongozi wa kampuni hiyo umesitisha saa za ziada za kufanyakazi, lakini umewaajiri vibarua maarufu kwa jina la ‘viarusi’, ambao wanafanyakazi kwenye treni za kusafirisha abiria, ikiwemo treni inayotoa huduma katikati ya jiji, maarufu kama ‘Treni ya Mwakyembe’.

“Uongozi umeshindwa kabisa kuboresha maslahi ya wafanyakazi, ikiwemo mkataba wa hali bora, ambao ni chachu ya kufanyakazi katika kampuni hii na hivi sasa wafanyakazi wengi tumekata tamaa,” alisema.

Kwa upande wake, Katibu Mkuu wa Wizara ya Uchukuzi, Dk.Leonard Chamuliho, alisema serikali imesikia kilio cha wafanyakazi hao na kwamba, kuna mambo yanafanyiwa kazi, ikiwemo masuala ya kisheria kuhusu madudu ya waliohujumu mabehewa ‘feki; na mengineyo ya utendajikazi.

“Najua mnahamu ya kutaka kufahamu hatima ya wabadhirifu hao, lakini naahidi kuwa nitawapa mrejesho hivi karibuni,” alisema.

Dk. Chamuliho alisema mambo ya kisheria yataendelea kisheria ili kutoleta sintofahamu kuhusu tuhuma hizo na kwamba hali hiyo itakwisha hivi karibuni.