LUKUVI ATUMBUA MAJIPU MATATU MONDULI

WAZIRI wa Ardhi, Nyumba na Maendeleo ya Makazi, William Lukuvi, ameagiza watumishi watatu wa idara ya ardhi katika halmashauri ya wilaya ya Monduli, kupandishwa kizimbani mara moja kutokana na wizi wa fedha za halmashauri hiyo.

Wizi huo unatokana na watumishi hao kuuza viwanja zaidi ya 200, kwa bei ya kati ya sh. milioni mbili hadi nne, bila kuingiza fedha hizo katika akaunti ya halmashauri hiyo.

Lukuvi alitoa agizo hilo juzi, mbele ya Mkuu wa Wilaya ya Monduli, Francis Miti, kwenye mkutano wa hadhara, wakati wa ziara yake ya siku moja wilayani hapa, baada ya wananchi hao kutoa malalamiko ya kuuziwa viwanja hewa na watumishi hao wa halmsahauri hiyo.

Watumishi hao ni pamoja na Kitundu Mkumbo, ambaye ni Ofisa Ardhi Mteule wa wilaya hiyo,

Leonard Haule (mpimaji wa ardhi) na Leonard Mkwavi, ambaye ni mchora ramani .

Lukuvi alisema kuwasimamisha kazi kwa watumishi hao haitoshi, hivyo ni vyema wakafikishwa mahakamani kwa kukiuka maadili ya watumishi wa umma pamoja na kurudisha fedha zote za wananchi hao waliowatapeli, kwani wanatumia stakabadhi za halmashauri.

Aidha, aliiagiza Taasisi ya Kuzuia na Kupambana na Rushwa Tanzania (TAKUKURU) kwa kushirikiana na polisi katika wilaya hiyo, kufanya uchunguzi wa haraka na wa kina kisha kuwafikisha mahakamani watumishi hao.

"Huu ni utovu mkubwa wa nidhamu, ninaagiza uchunguzi ufanyike mara moja dhidi ya watumishi hawa na wafikishwe mahakamani mara moja, ikiwa ni pamoja na kulipa fedha zote walizochukua kwa wananchi," alisema.

Akipokea maagizo hayo, Miti alisema baada ya kutambua ubadhilifu huo, aliagiza watumishi hao kuwekwa ndani kwa saa 24 pamoja na kuwasimamisha kazi.

Alisema uchunguzi umeanza na kwamba  ukikamilika, watafikishwa mahakamani mara moja.

Naye Mwenyekiti wa CCM wilayani humo, Loota Sanare, alimuomba Lukuvi kufikisha ombi lao kwa Rais Dk. John Magufuli, kufuta hati za mashamba 39, ambayo wawekezaji wanayoyamiliki bila kuyaendeleza.

Alisema wananchi wanakabiliwa na changamoto kubwa ya ardhi kutokana na wengi kutokuwa na ardhi ya kutosha kwa ajili ya kilimo na mifugo.

Kufuatia ombi hilo, Lukuvi aliuagiza uongozi wa halmashauri hiyo kuhakiki mashamba yote wilayani humo ili hati zake zifutwe na kurejeshwa kwa wananchi.