WASALITI WAWILI WATUMBULIWA MAJIPU UVCCM

UMOJA wa Vijana wa CCM (UVCCM), Wilaya ya Iringa Vijijini, umewasimamisha uanachama, wanachama wake wawili kwa tuhuma za usaliti wakati wa uchuguzi mkuu wa mwaka 2015, ambao ulimpa ushindi Dk. John Magufuli.

Akizungumza na waandishi wa habari jana, wakati wa kikao cha tathmini ya uchaguzi huo, Mwenyekiti wa UVCCM wilayani hapa, Benitho Kayugwa, alisema wametoa maazimio hayo baada ya kubaini makada hao kuwasaliti.

Alisema baada ya kufuata kanuni na taratibu za UVCCM, wameamua kuchukua uamuzi huo na uchunguzi zaidi bado unaendelea kuwabaini wengine.

Aliwataja waliosimamishwa uongozi na Kamati ya Utekelezaji ya UVCCM kuwa ni Mwenyekiti wa Kata ya Mgama, Aidan Kising’a na aliyekuwa Katibu wa Kata ya Luhota, Maria Kibuga.

“Kamati ya Utekekezaji ya UVCCM Wilaya ya Iringa Vijijini, imewasimamisha uongozi makada wake wawili kwa tuhuma za kukisaliti chama,” alisema.

Naye Katibu wa CCM Wilaya ya Iringa Vijijini, Dodo Sambu, alisema hatua waliyofikia ya kuwavua uongozi wanachama waliokisaliti chama ni nzuri na kwamba kazi ya kuwatumbua majipu wasaliti ni endelevu.