MALIMA; MSIPIGE KURA ZA CHUKI

NA ABDALLAH MWERI, MKURANGA

MBUNGE wa Jimbo la Mkuranga (CCM), anayemaliza muda wake, Adam Malima, amewataka Watanzania kutokupiga kura za chuki dhidi ya Chama.

Malima, alitoa kauli hiyo jana katika mkutano wa kampeni za mgombea mwenza wa urais wa CCM, Samia Suluhu Hassan, uliofanyika katika Kijiji cha Kimanzichana mkoani Pwani.

Alisema Watanzania watajutia uamuzi wao endapo watapiga kura za hasira katika uchaguzi mkuu ujao, unaotarajiwa kufanyika Oktoba 25, mwaka huu.

Mbunge huyo alisema Watanzania wapuuze kauli za ubabaishaji zinazotolewa na upinzani kuwa CCM haijafanya lolote tangu ilipoingia madaraka.

Malima alisema CCM ndio Chama pekee kinachotekeleza Ilani ya Uchaguzi kwa vitendo.

“Nawaombeni sana msije mkapiga kura za hasira dhidi ya CCM, mtakuja kujuta. Ndugu zangu wa Mkuranga mpigieni kura Magufuli, mbunge wetu, Abdallah Hamis Ulega na madiwani wote 25 wa CCM,” alisema.

Malima, alitoa mfano wa wakazi wa Mbeya Mjini, ambao walipiga kura za hasira kwa kumchagua Joseph Mbilinyi wa CHADEMA na sasa wanajuta.

"Mbeya walimchagua mtu anaitwa Sugu, jina lenyewe tu tatizo. Haya kule Kilwa walimchagua bwege, hivi kweli mbunge anaitwa bwege,” alihoji.

Alisema CCM imewaletea maendeleo Watanzania katika nyanja mbalimbali, hivyo hawana sababu ya kupiga kura za chuki.

Mbunge huyo alisema Dk. John Magufuli na Samia ni viongozi shupavu ambao, watailetea maendeleo nchi katika serikali ya awamu ya tano.

Pia, alimtaka Waziri Mkuu wa zamani, Fredrick Sumaye kuacha kusema uongo kuwa serikali imeshindwa kuleta maendeleo na aliwataka Watanzania kumpuuza.

“Huyu mzee wa ajabu sana, nimefanya naye kazi akiwa waziri mkuu, kama anadai CCM haijafanya kitu basi hata yeye hakuwa lolote,” alisema.